Drjúptu höfði því að það er meinið, þú ert sjálfur Jónas inn við beinið..

Í dag er jónasarhátíð á þessu bloggi. 

Dagskráin er metnaðarfull, ég frumsýni tvær stuttmyndir eftir sjálfa mig  helgaða Jónasi, sú fyrri heitir Bein Jónasar Hallgrímssonar  (7 mínútur) og er eins konar jarðteiknasaga um dýrlinginn Jónas og hvernig hann vitrast nútímamönnum gegnum beinamálið.  Sögusviðið er náttúrulega Þingvellir, hvað annað, hvar gæti maður minnst beina Jónasar á fegurri hátt en á stekkjunum sem grænka af berjum hvert ár, börnum og hröfnum að  leik.

Seinni stuttmyndin er svona stutt stuttmynd, bara ein mínúta og heitir Skjaldbreiður  og  fjallar um vísindamanninn Jónas og hvernig hann komst að kolvitlausri niðurstöðu um tilurði fjallsins Skjaldbreiður  og hvernig hann glæddi list sína með pælingum úr vísindum, úr jarðfræði. Það fara ekki miklar frægðarsögur af jarðfræðiafrekum Jónasar, hann var meira skáld en vísindamaður  og það er kannski ekki svo skrýtið vegna þess að hann var í Kaupmannahöfn í skjóli Finns Magnússonar rúnasérfræðings.

Í anda nútímans og remix tíðarandans og youtube kynslóðarinnar þá náttúrulega er sýningarsalur þessara kvikmynda Youtube og svo nýti ég mér sem leikendur fólk sem er að leika sjálfa sig á helgisamkomu um Jónas sem var á þingvöllum síðasta sumar. Titill bloggsins er svo útúrsnúningur á ljóðlínum eftir okkar núlífandi þjóðskáld hann Þórarinn Eldjárn þegar hann orti ungur um Guðjóninn sem býr í okkur öllum.

 Bein Jónasar (7 mínútur)

 

Fjallið Skjaldbreiður (1 mín)

Ómetanlegar heimildir

Raddþræðir

Ég er að prófa nýja græju hjá voicethread.com  þar  getur  maður  skráð sig  inn (það er ókeypis) og byrjað að  taka sjálfa sig upp. Það er líka hægt að hlaða inn myndum og ég hlóð inn tveimur myndum til að prófa það. Það á líka að vera hægt að hlaða inn vídeó en það virkaði nú ekki hjá mér.

Þessi græja er hugsun  til  nota  með  nemendur og fyrir kennara að ég held.  Krakkarnir geta  tekið upp sögurnar sínar.  Þetta  virðist  mjög  aðgengilegt  og  gæti  ekki  verið  einfaldara.

Það virkaði þrælvel að líma þetta inn á blogg strax í fyrstu atrennu. Það fer sjálfkrafa á næstu mynd þegar þetta spilast. Þetta kom hins vegar risastórt á  bloggið, best að prófa að setja þetta inn í minni útgáfu, best að velja "Put a small version on your site or blog":

 

 

Vonandi kemur þessi seinni í skaplegri stærð. Ég hugsa að sjálfgefna stærðin sé svona stór af því þetta er kerfi sem litlir krakkar geta unnið  og þau eru að segja sögur.

Þetta voicethread.com er dæmigert fyrir þau verkfæri eða netþjónustur sem nú spretta upp. Ef maður er með ókeypis skráningu þá  má maður mest geyma 75 mb og þrjá raddþræði og mest 30 mínútur af vídeó.

Ég rakst á þessa sniðugu græju þannig að á netnámskeiði sem ég er í Kanada þá voru þátttakendur beðnir að kynna sig þegar þeir byrjuðu námskeiðið með að taka upp eitthvað sem þeir sögðu og setja inn mynd.

Hérna fann ég svo dæmi um voicethread hjá notanda sem setti inn söguna sem litla stelpan hans talaði inn á.  Mér sýnist hægt að nota þetta með ungum börnum. 

 

 

 

Kínversk stjórnvöld og Falun Gong - Bandarísk stjórnvöld og Guantanamo, Íslensk stjórnvöld og vítisenglar

 

Við ættum að vita það á Íslandi hve viðkvæm kínversk stjórnvöld eru fyrir Falun Gong. Árið 2002 þegar varaforsetinn kínverski kom í opinbera heimsókn hingað þá var af og frá að hann þyldi einhverja gagnrýni eða mótmæli frá Falun Gong en þau samtök nota svona opinberar heimsóknir til að vekja athygli á  mannréttindabrotum gagnvart meðlimum samtakanna í Kína. Nú hafa kínversk stjórnvöld amast við heimildarmynd um Falun Gong og haft það upp úr krafsinu að Ríkissjónvarpið í Kanada hætti við að sýna heimildarmynd um samtökin.

Hvernig skyldi RÚV hegða sér við svipaðar aðstæður. Ég er ekki alltof bjartsýn, minnug þess að íslensk stjórnvöld fangelsuðu Falun Gong fólk við komuna til landsins árið 2002.

Svo brá við þegar Falun Gong fólkið kom í landið að það var sett í fangelsi í Njarðvík. Þetta er afar fátítt á Íslandi, fólk sem var með gild vegabréf til landsins og kom hingað í sumarfríinu sínu til að styðja á friðsamlegan hátt ákveðinn málstað var hneppt í fangelsi og sumum snúið frá landinu. Ég held að það hafi verið á grundvelli sama stjórnarskrárákvæðis  og varð til þess að  Vítisenglum var snúið frá landinu. Samkvæmt fréttum á þessum tíma þá réði lika miklu að íslensk stjórnvöld töldu sig ekki geta tryggt öryggi erlendra þjóðhöfðingja ef fjöldi mótmælenda streymdi til landsins. Mestu réði þá að kínversk stjórnvöld þoldu ekki á þessum tíma og þola sennilega ekki ennþá það sem við köllum lýðræðislega umræðu og tjáningarfrelsi - tjáningarfrelsi þeirra sem eru á móti einhverju eða telja sig vera órétti beitta.

Ég gat ekki mikið gert í þessu máli, eina sem ég gat var að fara til Njarðvíkur og reyna að fylgjast eins vel með þessu máli og ég gat sem almennur borgari. Ég tók myndir frá mótmælum við Njarðvíkurskóla (ég vann myndirnar þannig að mótmælendur þekktust ekki til að myndatakan ylli þeim ekki óþægindum í framtíðinni). Ég held að almennt hafi fólk á Íslandi verið mjög ósátt við hvernig komið var fram við gulklæddu Falun gong liðanna. Þetta leystist nú samt allt í friðsemd, þeir fengu að vera og settu svip á bæinn með skrýtnum leikfimisæfingum í nokkra daga. Ég skrifaði nokkur blogg um málið fyrir fimm árum:

Gongóblíða - gjörningaveður 

 Friðsamleg mótmæli við Narðvíkurskóla

Falun Gong í Njarðvíkurskóla 11. júní 2002

Falun Gong 

Það er mikilvægt að við pössum upp á mannréttindi, sérstaklega mannréttindi þeirra sem eiga undir högg að sækja og eru fyrirlitnir og smáðir af stjórnvöldum, sérstaklega þeirra sem eru hnepptir í fangelsi vegna skoðana sinna og vegna þess að stjórnvöld telja þá óæskilega. Það eru gífurlega mikilvæg mannréttindi að þeir sem eru settir í fangelsi njóti einhverra réttinda, alla vega þeirra réttinda að réttað sé í máli þeirra og þeir séu ákærðir og þeir viti hver glæpurinn er sem þeir eiga að hafa framið og fái tækifæri til að verja sig. Fangelsi án dóms og laga er einkenni á voðastjórn og alræðisríki. Núna í kvöld var ég að horfa á leikna heimildarmynd um Guantanamo fangabúðirnar. Ef það er satt sem kemur fram í þeirri mynd þá get ég ekki séð að bandarísk stjórnvöld sem eru ábyrg fyrir þeim fangabúðum séu neitt skárri en sú ógnarstjórn sem sendi fólk í Gulagið á sínum tíma.

Það sem ég hef kynnt mér um Falun Gong hefur nú eiginlega sannfært mig um að þetta eru skrýtin trúarbrögð og stórundarlegt að fólk heilt á geði aðhyllist þessa trúarstefnu. Það sem ég hef lesið um Vítisengla er alls ekki neitt gott, ég held að margir innan þeirra samtaka séu fólk sem ég hef ekki mikinn áhuga á að umgangast og það sem ég hef lesið um marga þeirra sem voru í fangageymslum Bandaríkjanna í Guantamo er að þar hafi verið margir hættulegir menn. Ég held að bresku fangarnir sem sögðu sögu sína í heimildarmyndinni hafi ekki verið neinir englar, einhverjir þeirra höfðu sakarferil í Bretlandi. 

En hvort sem það gulklæddur Falun Gong liði að iðka leikfimi til að ná sambandi við almættið og vekja athygli á ofsóknum kínverskra stjórnvalda, leðurbrynjaður og ógnvekjandi Vítisengill sem tætir um á mótorhjólatryllitæki og reynir að hræða fólk með útliti sínu og viðmóti eða skikkjuklæddur ofsatrúarmúslími sem heldur að hann eigi í heilögu stríði gegn spillingu okkar á Vesturlöndum - þá á allt þetta fólk rétt á mannréttindum, rétt á sömu mannréttindum og þeir sem okkur þykja skynsamir, hófsamir og stunda fagurt líferni.  

Hætt var við sýningu heimildarmyndar um Falun Gong

Samningar RÚV við einkaaðila

Eru einhverjar reglur um hvernig samninga RÚV getur gert við einkaaðila? Geta t.d. einkaðilar sem vilja koma vörum sínum á framfæri gert samninga við RÚV um kostun á einhverjum sjónvarpsþáttum? Það er hið besta mál að fjársterkir einstaklingar styrki RÚV en eru það samningar? Ef þetta er fjárstyrkur þá þarf engan samning. Þá væri fréttin Björgólfur Guðmundsson styrkir íslenska dagskrárgerð um þetta margar krónur. Hann setur eftirfarandi skilyrði fyrir styrknum.... og svo myndi vera talið upp hver skilyrðin fyrir fjárstyrknum væru.   Ég vona að Björgólfi gangi gott eitt til með þessu, hann er áhrifamikill á íslenskum fjölmiðlamarkaði, svo árhrifamikill að það er erfitt fyrir fjölmiðlamenn sem og aðra að halda uppi umræðu sem honum er ekki þóknanleg.

Er það ekki rétt munað hjá mér að hann hafi viljað kaupa DV á sínum tíma til að leggja það niður vegna greinar sem birtist þar og fjallaði um fjölskyldumálefni hans á þann hátt sem honum líkaði ekki? 

Bendi líka á bloggið mitt frá því dag um RÚV :
Veruleikafirring hjá Rúv - útvarpsstjóralaun og kvenkynsþulur

 

Björgólfur Guðmundsson leggur fram fé til framleiðslu sjónvarpmynda

Veruleikafirring hjá Rúv - útvarpsstjóralaun og kvenkynsþulur

Það eru furðulegar fréttir  um laun útvarpsstjóra og það veitir svo sannarlega ekki af því að farið sé ofan í saumana á rekstri þar. Ég skora á stjórn RÚV að gæta hagsmuna almennings á Íslandi, það er hvergi nauðsynlegra en í fyrirtæki sem rukkar toll af öllum landsmönnum að hafa eftirlit með hvernig er farið með það fé. Reyndar finnst mér margt í rekstri RÚV vera afar steinrunnið og miðað við fjölmiðlalandslag sem er löngu fokið út í veður og vind með breyttri miðlunartækni m.a. vefmiðlun. 

Það er kannski skýrasta dæmið um hversu steinrunnið skipulagið er hjá RÚV þessi síðasta ráðning á þulum. Það voru fjórar konur ráðnar úr hópi 103 umsækjenda, þar af voru 18 karlmenn. Þó ég persónulega skilji alls ekki tilganginn í þulum, af hverju þarf einhver að þylja upp dagskrána þegar hún er hvort sem er prentuð í mörgum fjölmiðlum og auðvelt er að fara á Netið eða á textavarpið til að fá hana og kynningu á dagskránni (ég smelli bara á takkann I fyrir information á fjarstýringunni á sjónvarpinu)... en þó ég skilji ekki tilganginn með þulum þá ætla ég ekki að gerast neinn dómari yfir að það fyrirbæri eigi rétt á sér, það getur vel verið að  áhorfendur á RÚV séu mestmegnis aldrað fólk sem villstöðugleika í framsetningu og helst hafa dagskrána eins framreidda og hún var á þeim tíma sem sjónvarpið fór í frí á fimmtudögum og aðeins var sent út í sauðalitunum. Það er líka bara gaman að sumri forneskju og sjálfsagt að halda í siði eins og að baka kleinur, borða hangikjöt á jólunum og láta lögsögumann þylja upp lögin á alþingi, hafa þulur á Rúv, láta eins og ekkert hafi breyst, eins og ennþá sé ekki fundið upp ritmál eða einhvers konar önnur miðlunartækni.

 En látum nú vera þó það séu hafðar þulur, það er sennilega ódýrar útsendingamínútur, sennilega er ekkert ódýrara en að borga förðun á manneskju sem les texta úr lesvél og brosir,  hvað er ekki ódýrara en talandi hausar. En það sem stuðar mig er þessi kynjavídd sem hefur nánast alltaf verið í þessu, þulurnar hafa verið fallegar stúlkur sem maður hefur á tilfinningunni að hafi verið ráðnar í starfið til að vera fallegar og brosa.  Núna í dag kom það í Fréttblaðinu (bls44) að Þórhallur Gunnarsson dagskrárstjóri RÚV hefði ráðið fjórar nýjar þulur úr hópi 103 sem sóttu um. 

það sem er verulega stuðandi er hvernig viðhörf Þórhalls speglast í hvernig ráðið var í starfið. Það voru bara ráðnar konur. Þórhallur segir "Þessar fjórar voru þær hæfileikaríkustu". Hann segir tilviljun eina ráða því að hópinn skipi eingöngu konur.

"Það voru átján strákar í hópi umsækjenda. Stelpurnar voru einfaldlega betri og við völdum út frá hæfileikum og getu.  Þetta starf mun gefa möguleika á að koma að annarri dagskrárgerð og umsækjendur voru valdir með tilliti til þess"

Það er nú reyndar gleðilegt að þulastarfið sé hugsað sem stökkpallur í önnur störf hjá RÚV en það er einkennilegt ef í auglýsingu um starf er valið með tilliti til annarra starfa sem viðkomandi mun hugsanlega hafa möguleika á að komast í. Það er líka fáránlegt að velja á svona kynjabundinn hátt í starf þegar úr svona stórum hópi umsækjenda er að velja. Með þessum orðum dagskrárstjóra er hann að ulla framan í allt jafnréttisstarf og jafnréttisráð. 

Það er gríðarlega mikilvægt að störf í áberandi stofnun eins og Rúv virði þær leikreglur sem í gildi eru m.a. jafnréttislög og það sé ljóst eftir hverju er farið við mannaráðningar. Í þessu tilviki er það afar óljóst og það verður að spyrja dagskrárstjórann nánar út í þessa ráðningu. 

Ég skoða á stjórn Ríkisútvarpsins að gæta hagsmuna almennings varðandi hvernig farið er með fé hjá RÚV m.a. laun útvarpsstjóra og hvernig stendur á þessari slagsíðu í mannaráðningar varðandi kynhlutfall í starf sem hingað til hefur verið tengt við brosandi fallegar konur að lesa upp orð af lesvél.

Stjórn Ríkisútvarpsins ohf. skipa:
Ómar Benediktsson
Kristín Edwald
Páll Magnússon
Svanhildur Kaaber
Svanfríður Jónasdóttir

Varastjórn skipa:
Signý Ormarsdóttir
Sigurður Aðils Guðmundsson
Árelía Eydís Guðmundsdóttir
Kjartan Eggertsson

Flatt torg er ekki bautasteinn

Það var svo mikil rigning þegar minnisvarðinn um Bríeti var vígður að ég fór ekki í vígsluna  heldur bara í athöfnina á Hallveigarstöðum. Ég hef aðeins séð þetta torg á myndum. En ég er alls ekkert hrifin af því sem ég sé. Ef til vill er þetta tíska í gerð minnisvarða, svona tvívíð en ekki þrívíð minnismerki. Líka að fólk gangi á einhvern hátt inn í minnisverkið eða ofan á því.

Sú hugmynd  að hafa minningarsteina sem maður labbar á er nú samt fín. Ég hef séð í borgum í Póllandi  götur sem eru hellulagðar með hellum sem eru seldar þar merktar ákveðnu fólki, afkomendur styrkja endurgerð gatna með að kaupa hellur með ágröfnum nöfnum. Þetta tengir sögu borgarbúa við göturnar og götumyndina og þetta mun vera mjög vinsælt.

En það er barasta búið að vera baráttumál í fjöldamörg ár að einhver af styttum bæjarins væri kvenkyns og það er fyndið að þegar loksins var sett fé í minnisvarða um frumkvöðul kvenfrelsisbaráttunnar á Íslandi þá verði ávöxturinn af því útflatt torg, persónan sem minningin átti að vera um sé orðin ósýnileg, aðaláherslan er komin á eitthvað blómamynstur.  Það er gaman að spá i hvers konar minnisvarða við myndum reisa um Davíð Oddson í sama anda.  Eða Ólaf Ragnar Grímsson.  Kannski Íslendingar eigi einhvern tíma í framtíðinni eftir að trampa á torgum helguðum þeim eins og á Bríeti.  Spurning bara hvaða tákn verða í staðinn fyrir blómamynstrið.

Í ljóði sem ég samdi einu sinni um þær Fenju og Menju sem möluðu gull í kvörn sinni fyrir konunga þá eru þessar ljóðlínur:

Bautasteina
þá er standa brautu að
reisat man að mani.

Minnisvarði um Bríeti Bjarnhéðinsdóttur afhjúpaður

Skólamorð

Fjöldamorðin í finnska menntaskólanum í dag eru átakanlega lík fjöldamorðunum í háskólanum í Virginia Tech og sálarástand og geðtruflun morðingjans eins slæmt. Því miður má búast við að því meiri umfjöllun sem svona morð fá, þeim mun líklegra er að sagan endurtaki sig og við munum sjá í framtíðinni einhvers konar útþynnta eftiröpun á svona morðum. Í báðum tilvikum er þessum veiku ungu voðamönnum mikið í mun að almenningur taki eftir voðaverkum þeirra og þeir taka sjálfa sig upp á band og dreifa. Í morðunum í dag mun morðinginn hafa sett inn vídeó á yotube, sjá þessa frétt:

The YouTube video, entitled "Jokela High School Massacre 11/7/2007", was posted by a user called Sturmgeist89. "I am prepared to fight and die for my cause," read a posting by a user of the same name. "I, as a natural selector, will eliminate all who I see unfit, disgraces of human race and failures of natural selection." "Sturmgeist" means storm ghost, or "intention of storming", in German.

 Það er komin lýsing á voðaverkunum í dag inn á Wikinews og það bætist í sívaxandi greinaflokk á Wikipedia um fjöldamorð í skólum

Það er átakanlegt að  sjá í wikipedia greininni hvernig voðaverkin eru sett fram eins og mælanleg niðurstaða í tölvuleik og kvarði í stigagjöf. Þar stendur: "Auvinen's killing spree holds the 27th highest kill count in modern history"

Þetta er eins og uppskrift og áskorun til einhverra í framtíðinni að ná hærra marki til að komast á næsta borð.

Árásarmaðurinn í Finnlandi reyndi að fyrirfara sér

Hvernig er maturinn þinn búinn til? Ríkisstyrkt þrælahald á Íslandi?

Það skiptir vissulega máli hvað matur kostar en það skiptir líka miklu máli hvernig maturinn er búinn til, hvernig er farið með umhverfið og dýr og starfsfólk í fæðuframleiðslunni og hvaða efni og aðferðir eru notaðar við framleiðslu og dreifingu. Það er sennilega best að hverfa aftur til upprunans, það er vistvænast að nota sem mest vörur sem framleiddar eru í grennd við búsetusvæði okkar t.d. eins og hafragrjón og minna vörur  sem fluttar eru langt að. Það er líka sniðugra að elda sjálfur og kaupa landbúnaðarafurðir beint frá framleiðanda sem maður þekkir og treystir því að þá  getur maður fylgst betur með hráefnum og matreiðsluaðferðum.

Allir vita að það er hollt að borða sem mest af grænmeti og ávöxtum. En sumt (megnið?) af því grænmeti sem við borðum kemur frá Almeria héraðinu á Suður-Spáni. Á síðustu kvikmyndahátíð fór ég á sýningu á heimildarmynd um hvernig líf ólöglegra landbúnaðarverkamanna frá Marókkó er þarna í Almeria.

Hvað eru margir erlendir landbúnaðarverkamenn á Íslandi? Hvaða réttlæti er í því að niðurgreiða mjólkurframleiðslu á Íslandi fyrir kvótakónga og eigendur stórbúa sem gera út á erlent og innlent farandverkafólk? Ég held að fólk átti sig ekki á hvernig staðan er að verða í íslenskum landbúnaði á kúabúum, það er verið að taka upp ríkisstyrkt þrælahald í íslenskum landbúnaði ef ríkið er að greiða niður landbúnaðarvörur frá framleiðendum sem notast að miklu leyti við farandverkafólk.

Annars er hérna fyndið vídeó um stjörnustríð grænmetisins:

 

Heimildarmyndin á kvikmyndahátíð var nú alvarlegri en höfðar sennilega ekki til eins margra. Hér eru upplýsingar um þá mynd:

"El Ejido, lögmál hagnaðarins | El Ejido, la loi du profit

Almeria-svæðið á Suður-Spáni framleiðir þriðjung af vetrarneyslu Evrópubúa á grænmeti og ávöxtum. Þetta er ekkert kraftaverk. Í gróðurhúsaþyrpingunni vinna um 80,000 innflytjendur í ónýtu umhverfi þar sem loftið er skemmt af skordýraeitri og grunnvatn af skornum skammti. Lögmál hagnaðarins segir frá verkamönnum í þorpinu El Ejido sem hafa ekki séð fjölskyldur sínar í fjölda ára, búa í heimagerðum kofum úr plasti og pappa og njóta engra vinnuréttinda. Áhorfendur eyða með þeim stuttri stund sem gefur ómetanlega innsýn í daglegt líf verkafólks sem stritar fyrir skít og kanil svo við hin fáum matvörurnar ódýrt. Myndin er mikilvægt innlegg í umræðu um lífræna ræktun og sannskipti („fair trade“) og lifandi dæmi um hvernig þrælahald hefur ekki yfirgefið siðmenninguna, heldur aðeins skipt um yfirborðsmynd."

Það er nú ekki hægt annað en láta hugann reika til Bubba ef maður er kominn út í hugleiðingu um  matvælaframleiðslu og faraldverkafólk.

Þetta er  meitluðustu og dýpstu  ljóðlínur í  íslenskru dægurlagi: 

"Stál og hnífur  er merki mitt
merki farandverkamanna.
Þitt var mitt og mitt var þitt
meðan ég bjó á meðal manna. "

Svo finnst mér Bubbi alveg ná stemmingunni og slættinum og skarkalanum í íshúsinu þegar farandverkafólkið er í viðbragðstöðu að taka við aflanum:

"Hrognin eru að koma, gerið kerin klár,
Hrognin eru að koma, gerið kerin klár.
Setjið dælurnar í samband, takið svo seglin frá
Hrognin eru að koma gerið kerin klár.

Vinnið nógu mikið, peninga munuð þið fá,
vinnið nógu mikið, svo verki niður í stórutá.
Það er hagur þeirra að ykkur flökri
þegar hugsun ykkar fer á stjá.
Vinnið nógu mikið og peninga munuð þið fá.

Uppá verbúð blómstrar menningin,
komið og þið munuð sjá
slagsmál, ríðingar, fyllirí,
Jack London horfa á.
Engin pólitísk slagyrði, Maó myndir veggjum á
þá færðu reisupassann vinur minn,
staðnum verður, staðnum verður frystur frá.

Stæltur er skrokkur þinn, djöfull sljór hugurinn,
ykkar er jú hagurinn, hagurinn ekki hússins.
Það vita þeir og þjarma á ykkur refsibónusinn,
það er, - það er allur munurinn.

Stæltur er skrokkur þinn, djöfull sljór hugurinn"

Ég held að fólkið í verbúðum á Íslandi hafi ekki litið á sig sem þræla. En það fékk ekkert af kvótanum.

Maturinn dýrari á morgun

Áfengi í matvörubúðum - vodkasala Íslands - vörumerkið Ísland REI og REYKA

Sigurður Kári alþingismaður og Guðlaugur Þór heilbrigðisráðherra eru í krossferð fyrir því mikla baráttumáli að selja skuli áfengi í matvörubúðum. Það er kostulegt að heyra Sigurð Kára tala um þetta eins og mikið frelsismál, hann talar eins og trúboði. Ekki það að mér finnist neitt óskynsamlegt sem hann segir, ég tek alveg undir það að almennt á frelsi að vera sem mest og það á ekki að refsa fjöldanum þó einhverjir fáir kunni ekki fótum sínum forráð og fari sér að voða, séu blindfullir og og sökkvi í sukk og óreglu ef aðgengi að vímuefnum verður frjálst. 

Það sem mér finnst hins vegar kostulegt er að Sigurður Kári skuli nenna að eyða orku sinni í svo lítilfjörlegt og ámátlegt mál þegar það eru mörg miklu stærri mál þar sem okkur fjöldanum er refsað vegna þess að einhverjir fáir kunna ekki fótum sínum forráð - eða eru glæponar sem brjóta lög.  Sérstaklega finnst mér ömurlegt hvernig vestræn ríki eru smám saman að breytast í lögregluríki og lögregluyfirvöld fá alltaf meira og meira vald til að njósna um þegnanna og takmarka ferðafrelsi þeirra, ekki síst í hinu stafræna rými  og í því skjóli að það sé verið að berjast gegn einhverjum örfáum hryðjuverkamönnum. Þannig er líf okkar allra hinna gert óþægilegt og erfitt og yfir samfélagið leggst lamandi krumla lögregluríkis.  Mikið vildi ég að Sigurður Kári nennti að berjast fyrir þannig frelsi, frelsi borgara til að ferðast og til athafna en einblíndi ekki á hvernig eitthvað vín og bjórgutl getur flætt inn í landið. 

Það er líka þannig að við berum ábyrgð á samferðafólki okkar og okkur sem vitum betur ber skylda til að passa að fólk detti ekki ofan í opna brunna og slasi sig og aðra í kringum sig, við sem förum varfærnislega um og kunnum fótum okkar forráð, við eigum ekki að hugsa bara um sjálfa okkur og ímynda okkur að við lifum í heimi þar sem hægt er að útiloka þá sem ekki fara þá leið sem er skynsamlegust og réttust. Við verðum að reikna með því að þegar höndlað er með svo hættulegt eitur eins og sumt áfengi er þá séu sumir sem kunni ekki  að umgangast það og það getur haft hryllilegar afleiðingar, ekki bara fyrir viðkomandi einstakling heldur einnig fyrir alla aðstandendur og börn viðkomandi.

Sumar afleiðingar þess að fólk kunni ekki að umgangast vín eru auk þess lífshættulegar og má þar nefna að sumt fólk missir svo mikið dómgreind við vínneyslu að það keyrir ölvað og stofnar lífi fjölda fólks í hættu. Þó ég og Sigurður Kári  og aðrir talsmenn fresisins séum sannfærð um að við getum alveg stjórnað áfengisneyslu okkar og best sé að ekkert standi í veginum fyrir því að við náum í áfengi hvað og hvenær sem við viljum þá verðum við að hugsa um hina  og þær afleiðingar sem óheft aðgengi að áfengi hefur neyslu.

Neyslan eykst með aðgengi og neyslan eykst líka mikið ef sterkustu raddir sem tjá sig um áfengi í íslensku samfélagi eru raddir áfengisseljenda og þeirra sem hafa hagsmuni af því að ánetja ungmenni áfengisneyslu og halda fullorðnari neytendum í stöðugri neyslu. 

Þannig er það í íslensku þjóðfélagi í dag. Hvergi er neysluþjóðfélagið risminna en þegar skoðað er hvernig áfengi er haldið að unglingum, hvernig bjórseljendur hamast við að bera bjór í ungt fólk og auglýsa upp vörumerki sín á skemmtunum og á Netinu. Botninn er hins vegar þegar útrásin íslenska felst í því að selja vodka í útlöndum og nota opinbert fé til að markaðssetja vörur í útlöndum sem bannað er að auglýsa hérna á Íslandi.

Össur hinn víghreifi Indíafari gyllti mjög fyrir okkur hvað Indónesar þættu við merkileg hér á skerinu og vörumerkið í orkuviðskiptunum væri ekki Orkuveitan og reynsla hennar, vörumerkið væri Ísland. Hann var svo sannarlega ekkert lítillátur þegar hann lýsti sínum hlut sem iðnaðarráðherra í að greiða fyrir viðskiptum.

Það er það lægsta sem íslenska útrásin hefur náð hingað til að taka þátt í að auglýsa vodka. Ég hef bloggað um þetta mál í blogginu Vodkasala Íslands

.

Það er ábyrgðarhluti hvernig vörur og þjónusta dreifast um íslenskt samfélag og hvaða reglur opinberir aðilar setja, líf og lífshamingja margra einstaklinga er undir því komin að stjórn sé á hvernig vímuefnadreifing er í landinu.

Það er líka ábyrgð sem fylgir því hvers konar starfsemi íslensk stjórnvöld styðja við á erlendri grund. Það er hræðilegt að hugsa sér vodkasölu Íslands. Vonandi nær þessi orkuútrás  ekki sams skonar botni. Ég vona svo sannarlega að íslenskir stjórnmálamenn séu með hreinan skjöld hvað varðar styrktaraðila og það sem þeir aðhafast sé ekki vegna þess að þeir séu talrör einhverra valdamiklilla einkaaðila. Ég vona að þeir hamist ekki við að fá bjór í kjörbúðir af því að bjórframleiðendur og eigendur stjórmarkaða studdu þá í kosningabaráttu og ég vona að þeir taki ekki þátt í undarlegum og vafasömum útrásarsamningum vegna þess að áhrifamiklir einkaaðilar sem hyggjast græða á orkuviðskiptum knýja á um slíka samninga.

Skora á þingmenn að greiða atkvæði gegn áfengisfrumvarpi

Fruss

Litla frænka mín Salvör Sól 4 mánaða reynir mikið að tjá sig þessa daganna. Hún frussar. Hér er vídeó sem ég tók af þessum málmyndunaræfingum fyrir viku síðan:

Hér er mynd af systrunum fjórum þegar stóra systir var að passa þær allar á meðan foreldrarnir voru tepptir út í Póllandi af því að flugvél hlekktist á. Frá vinstri eru þetta Salvör Sól, Ásta Björg, Þorsteina Þöll og Magnea Gná.

Svo er hér mynd af Kristínu Helgu þegar hún kom heim frá skólaskemmtun í vikunni, það var "sixties" ball og hún var með túberað hár. Ég man nú ekki eftir að ég hafi verið svona á unglingsárunum, þetta túperaða hár var komið úr tísku en þegar ég fermdist þá voru allar stelpur með slöngulokka.