Bloggfærslur mánaðarins, febrúar 2009

Kristín Helga að fara til Palestínu, ég mamman í Gautaborg, Ásta á TV 4 í Svíþjóð

Ég er núna í Gautaborg á námskeiði þar. Ég á afmæli í dag. Ég er dáldið áhyggjufull, Ásta Lilja eldri dóttir mín er veik heima á Íslandi og Kristín Helga yngri dóttir mín er á leið til Palestínu á morgun, hún verður farin áður en ég kem heim. Kristín fer síðdegis á morgun, þetta verður vonandi lærdómsrík ferð hjá henni og vonandi gengur allt vel, hún er að fara á vegum Rauða krossins, þetta er sérstök ferð ungmenna til að kynnast aðbúnaði barna og ungmenna í tengslum við verkefni sem Rauði krossinnn er með þarna. Það fara tveir krakkar frá Íslandi, það var viðtal við þau í Ísland í bítið í morgun, hér má hlusta á viðtalið.

Þau koma til með að halda úti bloggi palestinufarar.blog.is

Núna þegar ég er stödd í Svíþjóð þá datt mér í hug að leita á TV4 að því hvort eitthvað hefði komið um Ísland þar, Ásta var nefnilega nýlega í viðtali við þá sjónvarpsstöð. Ég fann vitalið, það má horfa á það hérna,

Þetta er sem sagt staðan í heiminum og staðan hjá fjölskyldu minni núna. Kristín Helga er að fara að kynnast því og kynna fyrir öðrum  hvernig fólk hefur það á átakasvæði í Palestínu þar sem blóðugt stríð ríkir og þar sem milljónir manna eru innikróaðar. Ásta Lilja segir Svíum frá því hvernig er að vera ungur atvinnulaus Íslendingur í dag og hafa ekki von um betri framtíð í bráð. Hennar kynslóð er sú sem hefur orðið mest fyrir barðinu á hruninu á Íslandi, margir hafa mist vinnuna og margir eiga ekkert í íbúðum sínum nema skuldir sem eru miklu hærri en það sem íbúðirnar seljast fyrir í dag og vonir Ástu  eru margir að flytjast frá Íslandi.


Gengi deCode lækkar um ennþá eitt sentið

Íslendingabók er samheiti yfir rit sem sýna eiga uppruna Íslendinga og þar með tilkall þeirra til gæða þessa heims. Íslendingabók hin eldri (Íslendingabók Ara fróða - Wikipedia) er sögð skrifuð af Ara fróða og er sennilega skrifuð til að rökstyðja hvernig ákveðnir menn sölsuðu undir sig landsvæði á Íslandi. Íslendingabók hin yngri er Íslendingabók (ættfræðigrunnur) er saga um genamassa íslensku þjóðarinnar. En staðan er nú þannig í augnablikinu að umheimurinn tekur ekkert mark á Íslendingabókunum og þær tryggja okkur engin völd í heimi sem á hverfanda hveli. Núna eru það skuldbindingar nokkurra fjárglæframanna sem umheimurinn tekur mark á sem segir til um hver á Ísland, sá sem á kröfurnar hann á líka eignirnar segja þeir sem trúa á kerfi kasínókapítalismans. Og Íslendingabók hin síðari hefur ekki fært gull og græna skóga til Íslands heldur.

 


mbl.is Hlutabréf lækkuðu í Bandaríkjunum
Tilkynna um óviðeigandi tengingu við frétt

Ég býð mig fram í bankaráðið, ég er líka viðskiptafræðingur eins og Gunnar

Eru margir viðskiptafræðingar sem heita Gunnar Örn Kristjánsson? Er ég kannski að fara mannavillt, er það þessi sami Gunnar Örn og varð að segja af sér sem forstjóri SÍF vegna þess að hann skrifaði upp á ársreikninga fyrir vin sinn án þess að athuga þá nánar. Þessi vinur hans var að möndla með lífeyri lækna. Ég hugsa að læknar á Íslandi hafi ekki verið  paránægðir með að  Gunnar færi að möndla með fé landsmanna - eða alla vega iðkaði það að skrifa upp á reikninga sem hann hefði ekki farið yfir.  Þetta var nú alveg víðáttuvitlaust að skipa hann í bankaráðið, hverjum datt það í hug á tíma þar sem nauðsynlegt er að það engin tortryggni sé um hæfi fólks til setu í bankaráði. 

Eða er svona mikil mannafæð í þeim sem koma til greina í bankaráð? Ætli maður verði þá ekki að fórna sér og ég gef þess vegna kost á mér í hvaða bankaráð sem er. Ég er nú enda skólasystir hans Gunnar úr Viðskiptafræðinni í háskólanum. Ég var reyndar í þjóðhagskjarna en ekki fyrirtækjakjarna en það hlýtur nú bara að vera kostur í dag þegar bankakerfið er allt komið í opinbera umsjá og gjörgæslu. Svo þarf enginn að efast um heiðarleika minn og ekki er ég neitt bendluð við spillingu. Til marks um það má nefna að ég er í Framsóknarflokknum en þangað flykkjast allir núna sem vilja siðbót í íslenskum stjórnmálum.

En hér er frétt sem ég fann á BB.is um þetta læknalífeyrissjóðsmál og eftirköst þess:

Iðgjöldum stolið og rukkað um lán

Ástráður Hreiðarsson yfirlæknir stefnir Tryggingasjóði lækna fyrir Héraðsdóm Reykjavíkur og krefst niðurfellingar á láni sem sjóðurinn veitti honum. Ástráður er félagi í Tryggingasjóðnum og einn þeirra sem töpuðu öllum sínum lífeyri þegar sjóðurinn fór í þrot vegna 80 milljóna króna fjárdráttar Lárusar Halldórssonar fyrrverandi sjóðsstjóra. Lárus fékk fangelsisdóm vegna afbrotsins. Gunnar Örn Kristjánsson, fyrrverandi forstjóri SÍF, hefur verið ákærður fyrir sinn hlut með því að bregðast skyldum sem endurskoðandi sjóðsins.

Borgaraleg uppreisn Ástráðs gegn sjóðnum hófst eftir að honum var tilkynnt að lífeyrir hans væri glataður.

Gunnar Örn segir að sér komi málið ekki við.
Þess má geta að Gunnar Örn var ekki sakfelldur í þessu máli árið 2004, sjá hérna:
Fyrrverandi forstjóri SÍF sýknaður
Gunnar Örn Kristjánsson, fyrrverandi forstjóri SÍF, var í dag sýknaður af öllum ákærum um brot í starfi sem endurskoðandi Tryggingarsjóðs lækna á síðasta áratug. 

Gunnar Örn var ákærður fyrir brot gegn almennum hegningarlögum og lögum um starfsemi lífeyrissjóða, með því að hafa á árunum 1993-2001 vanrækt skyldur sínar sem löggiltur endurskoðandi ársreikninga Tryggingarsjóðsins. Skilanefnd Tryggingarsjóðsins krafðist þess að Gunnar Örn skyldi dæmdur til að greiða sjóðnum rúmlega 47,5 milljónir króna. Hann var sakaður um að hafa áritað ársreikningana án fyrirvara og ekki hagað endurskoðunarvinnu sinni í samræmi við góða endurskoðunarvenju.

Ríkislögreglustjóri krafðist þess að Gunnar Örn yrði dæmdur til refsingar og ennfremur sviptur réttindum til starfa sem löggiltur endurskoðandi. Gunnar Örn neitaði öllum sakargiftum og komst Héraðsdómur að þeirri niðurstöðu að ákæruvaldinu hefði ekki tekist að færa sönnur á sök hans. Hann var því alfarið sýknaður og bótakröfu Skilanefndar vísað frá dómi.


mbl.is Gunnar Örn hættir í bankaráði Kaupþings
Tilkynna um óviðeigandi tengingu við frétt

Lengi getur lágt lækkað

deCode skrapar botninn og hlutabréfin eru orðin verðlaus, það skiptir ekki máli hvort þau lækka um 1 sent í dag. Það er ekki mikið frétt að bréfin í deCode hafi lækkað um 7,8% og séu núna 21 sent.

Hlutabréfamarkaður er að ná hryllilegum botni. Sama þótt tilkynnt hafi verið um plan eftir plan hjá stjórnvöldum. Við getum ekki ímyndað okkur hversu slæmt ástandið væri ef stjórnvöl hefðu ekki gripið inn í Bandaríkjunum.

Allt bendir til að það þurfi fleiri þjóðir að fara íslensku leiðina og þjóðnýta banka. Krugman mælir með íslensku leiðinni og bendir á að bankar rambi á barmi gjaldþrots í greininni Banking on the Brink.

Mér finnst þessi ríkisbankaleið nokkuð smellin. Ég vil ekki að peningargerðarvélar séu látnar í hendur fjárglæframanna. En sumir kanar kalla leið Obama sítrónusósíalisma, svona leið þar sem fé hagnaðurinn er einkavæddur en tapið þjóðnýtt.

Það verður ekki langt í að Kanarnir þjóðnýti sína banka eins og Íslendingar hafa gert. Bankar eru stórhættulegar stofnanir í hagkerfi nútímans og það er langskynsamlegast að þeir séu í eigu ríkisins eða einhvers konar samfélagslegri eigu. 


mbl.is Bandarísk hlutabréf lækka
Tilkynna um óviðeigandi tengingu við frétt

Opinn hugbúnaður fyrir skólanema

 retro1.jpg

Ég er núna að kynna forritið Paint.net fyrir kennaranemum. Ég er líka að kynna þeim möguleikann á að nota opið efni þ.e. án hefðbundinna höfundaleyfa. Ég reyni eins og ég get að sannfæra fólk um kosti þess að hafa almenninga fyrir hugbúnað sem og annars konar stafrænt efni.

Ég setti hér á eina vefsíðu sýnishorn af hvað hægt er að gera í paint.net.  Þetta er einfalt forrit, svona millistigið milli Photoshop og Ms paint. Paint.net er ókeypis, opinn hugbúnaður sem er til á makka, pc og linux stýrikerfi. Hér er er mynd sem ég gerði með svona retro áferð, þetta verður eins og einhvers konar grafíkverk.  Svo er ákaflega einfalt að blanda saman tveimur myndum, hér blanda ég saman sprungnum steinvegg og mynd af börnum við tölvu.


Þau myndvinnsluforrit sem við erum að kynna núna eru Inkscape vektoraforrit, Tuxpaint fyrir litla krakka, Paint.net og Gimp.

Það er allt annað líf að vera með opinn hugbúnað.


Sirkus Geira Smart - Íslendingur að meika það í útlöndum

Ég er alltaf svo stolt þegar Íslendingar eru að meika það sem filmstjörnur eða poppstjörnur í útlöndum. Nýjasta íslenska stjarnan er hrúturinn Punkin en hann á stjörnuleik í þessu myndbandi á Youtube. Punkin er eins og íslenska þjóðarsálin í dag, hann lætur ekkert ráðskast með sig og reka sig áfram af hundum og mönnum. Punkin létur engan smalahund reka sig áfram. Hann ráðskast hins vegar með hundinn og hundurinn hrökklast undan honum.

En meira um smala og smalalög. Ég held að það sé viðeigandi að skíra þá ríkisstjórn sem hrökklaðist frá völdum á Íslandi núna nýverið Sirkus Geira smart eftir eftir samnefndu lagi sem Spilverk þjóðann gerði frægt um árið. Það er gaman að hlusta á það smalalag núna og bera saman við þá tíma sem voru á Íslandi á tímum Geira smart.

Hér er textinn til að raula með:

Sirkus Geira smart

Þeir ráku féð í réttirnar í fyrsta og annan flokk.
Kílóið af súpukjöti hækkaði í dag.
Og verðið sem var leyft í gær
er okkar verð  að morgni
- nýjar vörur daglega!

Þér finnst þú þurfa jakka og tvenna sigtúnsskó
nýju fötin keisarans frá Karnabæ og co.
Fötin skapa manninn
eða viltu vera púkó
- Nei, ekki ég!

Við í sirkus Geira Smart
trúum því að hvítt sé svart
og bíðum eftir næstu frakt (í buxnadrakt).

Mölkúlur og ryðvörn er það sem koma skal
(húrra, húrra, húrraaaa!!)
Innleggið á himnum, hvað varðar þig um það?
Útvarpsmessan glymur
meðan jólalambið stynur
- nýjar vörur daglega!


yfir 13 milljarðar í glanshús

Eftir hrunið þá höfum við litið hvert á annað  og spurt - Hvernig gat þetta gerst, af hverju vissum við ekkert, hvernig vorum við blekkt? Við höfum bent á marga sökudólga, við höfum bent á hvernig umræðan var í þjóðfélaginu og hve lítilsvirt og fótum troðið lýðræðið er í landinu. Við höfum séð að þeir sem áttu að veita aðhald eins og fjölmiðlar og stjórnarandstaða gerðu það ekki, fjölmiðlar brugðust okkur, þeir voru enda í eigu þeirra sem köstuðu á milli sín fjöreggi íslensku þjóðarinnar. 

En hvernig er ástandið núna? Er hér upplýst þjóð sem veit hvaða skuldbindingar eru á hana lagðar og sem gagnrýnir og fylgist með hvað er að gerast? Eru hér ábyrgir fjölmiðlar sem kafa ofan í málin og segja okkur kost og löst á þeim valkostum sem við stöndum frammi fyrir og sem segja okkur satt og rétt frá og án þess að sjónarhorn þeirra sé brenglað og þeir tísti af fagurgala tl þess sem hefur valdið hverju sinni? 

Við getum svarað þessari spurningu mjög auðveldlega með því að greina hve fyrirsögnin er þegar 13. milljarðar af fé Íslendinga eru bundnir í einni byggingu, í einu musteri og minnisvarða og grafreit yfir þá tíma þar sem blekkingarhula lagðist yfir Ísland og við vorum ginnt og blekkt til að taka ekki eftir að siðblindir og gráðugir menn knúnir áfram af eiginhagsmunum og gróðahvöt tóku yfir Ísland.

Fyrirsögnin í Morgunblaðinu núna er ekki að nú sé verið að binda 13 milljarða í einu húsi, fyrirsögnin er "Allt að 600 störf vegna framkvæmda við Tónlistarhús". Það er engin rýni á það hvers vegna þessi ákvörðun var tekin eða gagnrýni á hana, núna kóar fjölmiðillinn Morgunblaðið með stjórnvöldum á sama hátt og fjölmiðlar kóuðu með útrásarvíkingum og lofsungu þá á sinni tíð.

13 milljarðar er mikið fé fyrir gjaldþrota þjóð. Hvaðan á það fé að koma? Er eitt glanshús í miðbænum virkilega besta fjárfestingin til að skapa störf á Íslandi núna? Hvers vegna eru ríki og borg ekki knúin svara og beðin að rökstyðja ítarlegar að nú eigi að halda áfram með þetta hús? 

Er í lagi að stjórnvöld skuldbindi okkur svona með einu pennastriki? Vitum við hverjir valkostirnir eru? Hvaðan eiga þessir peningar að koma? Og hvers vegna er þessi blekking að þetta hús verði bara tímabundið í eigu ríkis og borgar, hver í ósköpunum ætti að vilja kaupa þetta hús? Eða stendur til að eyða morðfjár af fé sem við eigum ekki en verðum að taka að láni í að byggja glanshús til að gefa það svo einhvern tíma í framtíðinni til einhverra aðila í nýrr einkavinavæðingu?


mbl.is Allt að 600 störf vegna framkvæmda við Tónlistarhús
Tilkynna um óviðeigandi tengingu við frétt

Framsókn í Reykjavík Norður

Það er gleðilegt að nýr formaður okkar Framsóknarmanna Sigmundur Davíð hefur núna lýst því yfir opinberlega að hann bjóði sig fram í Reykjavík norður. Hann reyndar lýsti því yfir á aukakjördæmisþingi okkar um síðustu helgi að hann myndi bjóða sig fram í þessu kjördæmi en svo hef ég verið að sjá á einhverjum netsíðum  vangaveltur um að hann hyggðist fara í framboð annars staðar og var orðin hrædd um að framboð hans í Reykjavík gengi ekki eftir.

Þó að Framsóknarmenn séu fjölmennir um allt land þá eru langflestir hérna á höfuðborgarsvæðinu og það er nauðsynlegt fyrir endurreisn Framsóknarflokksins að koma upp öflugu flokksstarfi hér á höfuðborgarsvæðinu. Það er líka þannig að Sigmundur Davíð hefur sérþekkingu á mörgu sem eru aðkallandi vandamál hér á höfuðborgarsvæðinu, hér varð fjárhagslega hrunið mest, hér búa flestir þeirra sem störfuðu í banka- og fjármálakerfinu og hér eru skipulagsmálin og uppbygging nýss borgarsamfélags í sátt við landsbyggðina hvað brýnust.

Það verður spennandi að sjá tillögu forvalsnefndar um lista í Reykjavíkurkjördæmum. Á aukakjördæmisþingi um síðustu helgi lagði ég fram tillögu um lokað prófkjör meðal flokksmanna en stjórn kjördæmasambandsins lagði fram tillögu um uppstillingu og talaði Sigmundur Davíð fyrir þeirri tillögu. Mín tillaga var felld í kosningum og ákveðið að skipa forvalsnefnd sem á að leggja til lista fyrir lok mánaðarins. Prófkjör eru svo sannarlega með mikla galla og geta sundrað fólki og ef mikil auglýsingamennska er í kringum þau og prófkjörsreglur litlar þá geta þau snúist upp í hömlulausar atkvæðaveiðar og atkvæðasmalanir sem hafa ekkert með lýðræði að gera.

En mér fannst mikilvægt að fram kæmi tillaga um einhvers konar form þannig að almennir flokksmenn hefðu eitthvað að segja um hvernig listinn ætti að líta út og ég þekki enga leið aðra en einhvers konar prófkjör. Tillagan um lokað prófkjör sem ég lagði fram var með alls konar fyrirvörum og ákvæðum m.a. um kynjasjónarmið þannig að kynjahlutfallið á endanlegum lista yrði sem jafnast. Það er þekkt að í prófkjörum hallar mjög á konur. Prófkjör hafa líka þann annmarka að sumir geta ekki hugsað sér að taka þátt í prófkjöri og reyndar skil ég það, það hafa fáir tök á því að taka sér frí frá vinnu í langan tíma, fyrst í kostnaðarsama prófkjörsbaráttu sem fólk greiðir úr eigin vasa og svo í kosningabaráttu flokka. En það má alveg sníða þessa vankanta af prófkjöri m.a. með að setja hámark á hverju frambjóðendur mega eyða og reglur um siðferði og hvernig má auglýsa.

En það verður sem sagt farið sú leið að stilla upp lista. Tíminn mun leiða í ljós hvort það var góð leið. En aðalatriðið í Framsóknarflokknum sem og öðrum stjórnmálaflokkum á Íslandi er að byggja upp starfið innanfrá, að byggja upp hreyfingu þar sem lýðræði virkar og þar sem óbreyttir félagsmenn hafa möguleika á að taka þátt í mótun samfélagsins gegnum stjórnmálaöfl og á þá er hlustað.

Í dag sótti ég svokallað heimskaffi um lýðræði, hvernig væri hægt að auka lýðræði á Íslandi. Þetta var mjög skemmtilegt, eiginlega ætti svona starfsemi að fara núna fram innan stjórnmálaflokka. Við erum á leið inn í þátttökusamfélag,samfélag sem líkist meira hinum margsamanvafna bloggsamfélagi heldur en einstefnu útvarpsmiðlum, samfélag sem komið er langt frá hinu línulega og ósveigjanlega prentsamfélagi.  

Ég held að stjórnmálaöfl á Íslandi verði að breytast og muni breytast. En breytingarnar verða að ná inn í flokkana, að innsta kjarna flokksstarfsins og það þarf að taka upp ný og breytt vinnubrögð. Það er ekki nóg að punta lista með nýju fólki og það er hættulegt tómahljóð í kosningum þar sem stillt er upp á  listum  fjölmiðlastjörnum, poppurum og lukkuriddurum sem hafa valið sér flokka og kjördæmi skömmu fyrir kosningar í von um að fljóta ofan á straumnum inn í þingsali.  Það er hins vegar von okkar allra sem látum okkur stjórnmál varða að atburðir síðustu mánaða hafi hrærst við öllum og fengið allt hugsandi fólk til að skilja og skynja að stjórnmál eru á ábyrgð okkar allra og ef við tökum ekki þátt og lýsum skoðun okkar og miðlum af þekkingu okkar þá er sú hætta að stjórnmálaflokkar verði handbendi aðila sem vilja ráðskast með fjöregg þjóða eins og sína einkaeign og kasta þeim á milli sín og brjóta og týna.

Það er mikilvægt að fleiri komi að ákvörðunum í samfélaginu, að upplýsingaflæði sé meira og betra og að þolað sé að það sé ekki bara ein rödd og ekki bara ein skoðun. Það er minni hætta á því að tekin sé kolröng ákvörðun ef hlustað er á sem flest sjónarmið. 

Núna er forvalsnefndin búin að auglýsa eftir framboðum, best að bjóða sig fram, ég hvet sem flesta sem styðja Framsóknarflokkinn og vilja vinna að uppbyggingu á Íslandi að gefa kost á sér. Þegar hafa þrír ágætir  karlmenn lýst því yfir að þeir sækist eftir fyrsta sæti á lista í Reykjavík, það er formaður okkar Sigmundur Davíð og þeir Hallur Magnússon og Einar Skúlason.

Ég sækist náttúrulega eftir sem efstu sæti.

En hér er auglýsingin frá Forvalsnefndinni

Framboð í Reykjavík

Forvalsnefnd Framsóknarflokksins í Reykjavík auglýsir eftir frambjóðendum á framboðslista flokksins í Reykjavíkurkjördæmum norður og suður vegna alþingiskosninganna 25. apríl 2009.

Þeir sem gefa kost á sér skulu tilkynna það til forvalsnefndar fyrir kl. 12 miðvikudaginn 25. febrúar 2009  með tölvupósti á netfangið reykjavik@framsokn.is eða skriflega á skrifstofu Framsóknarflokksins, Hverfisgötu 33, 101 Reykjavík.

Forvalsnefnd Framsóknarflokksins í Reykjavík

 


mbl.is Sigmundur Davíð býður sig fram í Reykjavík
Tilkynna um óviðeigandi tengingu við frétt

Ólafur F. var óhæfur borgarstjóri og hann er arfavondur borgarfulltrúi

Ólafur  F. Magnússon er kjörinn fulltrúi Reykvíkinga í borgarstjórn og það ber að virða það. Hann er líka viðkvæmur hugsjónamaður og áhugamaður um gömul hús og flugvelli. En hann var alltaf gjörsamlega óhæfur í að vera borgarstjóri í Reykjavík, það þurfti ekki annað  en að hafa fylgst í fjarlægð með ferli hans í stjórnmálum og hvernig honum lynti við annað fólk til að geta spáð fyrir hvernig  fara myndi. Einnig er kjörfylgi Ólafs svo lítið að það var í hæsta máta óeðlilegt að hann yrði borgarstjóri. Það getur blessast í sumum tilvikum að maður sem hefur lítinn hluta kjósenda á bak við sig sé í oddvitastöðu en þar þarf sérstaka mannkosti í það, mannkosti sem Ólafi F. Magnússyni eru ekki gefnir.

Ólafur F. er eyland, honum tekst ekki einu sinni að halda friðinn við sína nánustu samstarfsmenn og nægir hér að nefna hvernig hann hegðaði sér við varamann sinn Margréti Sverrisdóttur og aðstoðarmann sinn Ólöfu Guðný Valdimarsdóttur svo aðeins séu nefnd tvö dæmi af mörgum. Það segir sína sögu að þegar ljóst var að Ólafur F. myndi þurfa að hrökklast úr borgarstjórastóli þá komu boð frá Ólafi F.  í gegnum Þorleif hjá Vinstri grænum um að Ólafur F. væri tilbúinn að segja sig úr borgarstjórn svo varamaðurinn Margrét Sverrisdóttir kæmist að og vinstri stjórn yrði áfram þá varaði Margrét við því og tók ekki mark á þeim orðum Ólafs F.

Það var átakanlegt ástand í Reykjavík í borgarstjórnartíð Ólafs F. og það var mikill ábyrgðarhluti hjá meirihluta Sjálfstæðismanna að setja í borgarstjórastól mann með eins skerta dómgreind og mikla lyndisbresti og Ólaf F. Magnússon. Það var hlutskipti Framsóknarmanna undir forustu Óskars Bergssonar að koma þá til borginni bjargar og það með þeim eina raunhæfa valkosti sem þá var í stöðunni - að mynda meirihluta með Sjálfstæðisflokknum. 

Fyrir þetta kann Ólafur F. Magnússon Framsóknarmönnum litlar þakkir og hefur hann nú umhverfst svo að hann sér púka í hornum allra herbergja þar sem hann heldur að Framsóknarmenn komi saman. Ólafur F. hefur ekki gott minni ef hann er búinn að gleyma því að það voru ekki Framsóknarmenn sem sviku hann, það voru Sjálfstæðismenn sem hæddu hann og smánuðu í eina tíð á landsfundi og það voru Sjálfstæðismenn sem studdu hann til að vera borgarstjóri í Reykjavík og það voru þeir hinir sömu sem sviku samkomulag við hann. Ekki Framsóknarmenn.

Ólafur F. var svo slæmur borgarstjóri að því lýsa engin orð sem viðeigandi er að nota hér á þessu bloggi en málið er að Ólafur F. er líka arfaslæmur borgarfulltrúi og gengur núna eins konar berserksgang í  borgarkerfinu og það skrýtið að sjá svokallaða fjölmiðla og marga stjórnmálamenn kóa með honum og leyna almenning þeim raunveruleika sem blasir við hverjum manni sem lendir í návígi við Ólaf F. Magnússon.  Eru fjölmiðlar til að segja okkur sannleikann eða eru þeir til að taka þátt í að viðhalda blekkingu?

Annars hef ég orðið fyrir barðinu á Ólafi F. eins og margir aðrir. Þannig hefur mér verið sagt að tvo síðustu borgarstjórnarfundi hafi hann gert mig að umtalsefni á fundum borgarstjórnar og það mun vera vegna þess að Ólafi F. líkaði ekki að ég tjáði mig í Kastljósi sjónvarpsins um hversu óhæfur hann hefði verið til að vera borgarstjóri. Ólafur F. lætur sér það ekki nægja heldur mætir hann sérstaklega á fund Mannréttindaráðs til að leggja fram eftirfarandi (tekið úr birtri fundargerð Mannréttindaráðs):

2. Áheyrnarfulltrúi F-lista, Ólafur F. Magnússon, leggur fram eftirfarandi fyrirspurn.

Í Kastljósþætti Ríkissjónvarpsins um sl. áramót kom fram sem álitsgjafi Salvör Gissurardóttir sem iðkar bloggskrif á netinu og situr í mannréttindaráði Reykjavíkur. Hún er annar tveggja fulltrúa Framsóknarflokksins í ráðinu. Í Kastljósþættinum áðurnefnda fullyrti Salvör Gissurardóttir, að allir sem hefðu fylgst með „ferli mínum“ hafi vitað að ég hafi verið „gersamlega óhæfur til að vera borgarstjóri“. Því er spurt hvort það stangist á við siðareglur kjörinna fulltrúa Reykjavíkurborgar og tilgang mannréttindastefnu borgarinnar að Salvör Gissurardóttir hafi uppi ærumeiðandi fullyrðingar um störf mín í borgarstjórn Reykjavíkur án þess að rökstyðja það á nokkurn hátt.

 Af hverju segja fjölmiðlar ekki sannleikann um hvernig Ólafur F. hegðar sér í ráðum og nefndum Reykjavíkurborgar? 


mbl.is Ólafur F.: Framsóknarvæðing í borgarstjórn
Tilkynna um óviðeigandi tengingu við frétt

Klakahöllin

portus-group.jpgFokhelda ráðstefnu- og tónlistarhúsið gnæfir yfir Reykjavík og er orðið táknmynd kreppunnar og líka táknmynd þeirrar heimssýndar sem hér ríkti fyrir hrunið. Svona Versalir Íslands.  Annars... það er áhugavert að skoða hvaða myndir við drögum upp í huganum af því sem gerðist.  Við köllum það hrun, við köllum það kreppu, við líkjum því við strand, tölum um  skip á strandstað.

Myndin sem við drögum upp litar svo hvernig við lítum á aðstæður og hvaða úrræði við sjáum. Heimspressan dregur upp mynd af ástandinu á Íslandi sem tákni um það sem er að gerast alls staðar - allt er frosið fast. Stjórnvöld alls staðar reynda að bræða einhverja hreyfingu í kerfið en jafnframt loka þau fyrir alla strauma sem þau geta. Það verða þau að gera vegna þess að það er krafa frá almenningi, krafa sem á Íslandi endurspeglast í því að kaupa innlendar vörur og tryggja fólki hér atvinnu. En til þess að við getum selt ál og fisk þá verður fólk í útlöndum að geta keypt ál og fisk. Og það gerir það ekki nema einhver kaupi af því þær vörur sem þar eru framleiddar.

Viðskiptakerfi heimsins var stórgallað en það var samt kerfi sem var miklu betur búið til að tryggja flæði heldur en  stjórnsýslukerfi og stjórnvöld sem hafa haft meira hlutverk hingað til í því að hefta flæði.

Hinn risavaxni kreppuminnisvarði sem nú er kallað Tónlistar- og  ráðstefnuhúsið mun sennilega alltaf hafa merkingu í huga Reykvíkinga sem tengist því ástandi og umróti sem er núna.  Húsið mun örugglega fá nafn sem minnir á þessa tíma, ekki opinbert nafn heldur nafn sem allir þekkja húsið af. Mér finnst að við ættum að  leggja í púkk hugmyndir um nöfn, ég sting sjálf upp á því að húsið verði kallað Klakahöllin og er nafnið sótt í fræga sögu eftir Tarjei Vesaas.

Mér finnst Klakahöllin svo fallegt nafn, minnir á tímann þar sem allt fraus fast og á það völundarhús frostheima sem við villtumst í og svo finnst mér glerhjúpurinn frá Kína vera eins og  frostið sem lagðist yfir Ísland, eins konar álög.  Ég vona að þessi glerhjúpur verði settur upp, hann er mikið listaverk og merking hans hefur breyst, nú er hann frostið sem við finnum inn í okkur. Ég er hins vegar nokkuð sannfærð um að glerhjúpurinn verður skotspónn þeirra sem ekki eru sáttir við þessa byggingu  og á þeim tímum sem núna eru á Íslandi myndi ég ekki setja upp neinn glerhjúp utan á umdeilt hús nema úr  gleri sem þolir steinkast og að vera lamið  að utan.  hér er kynning á glerhjúpnum

Ég er ekki viss um að þetta hús verði notað undir það sem upphaflega er ætlunin. En þannig er um mörg hús. Stjórnarráð Íslands er í húsi sem var byggt sem fangelsi, listasafn Reykjavíkur er í hafnarhúsi sem var pakkhús við höfnina, listasafn Íslands er í húsi sem var byggt við Tjörnina til að sækja ís til að frysta fisk. Það að auki þá finnst mér áformuð notkun á þessu húsi, þau not sem eru kynnt á vefnum portusgroup.is vera þannig að þetta hús verður ekki hús alþýðunnar, þetta verður hús elítunnar þar sem almenningur hefur ekkert erindi og verður kannski ekki velkominn. Ef ráðist verður í að halda áfram með þetta hús þá vildi ég sjá að þetta væri hús sem venjulegt fólk á Íslandi ætti erindi í og gæti notið þessarar frábæru staðsetningar. Reyndar hentar þetta hús best sem eins konar musteri. Það var reyndar byggt sem musteri og minnisvarði um eina heimssýn, það er byggt til að horfa út á sjó, það er byggt á útrásardraumum. Það er byggt á sömu heimssýn og lagið sem öllum íslenskum börnum er kennt eins og dýr fjársjóður og menningarverðmæti,lagið um soninn sem telur sig eiga að fá skaffaðar góðar græjur til að geta haldið út í heiminn og slátrað fólki sem er fyrir honum.  Svona hljómar sá söngur:

það mælti mín móðir
að mér skyldi gefa
fley og fagrar árar
Standa fyrir stafni
stýra dýrum knerri
halda svo til hafnar
höggva mann og annan.

 

 


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband