Lýðheilsa og áfengisstefna

Það er skylda stjórnvalda að tryggja stöðugleika í samfélaginu, jafna lífskjör og gera lífsskilyrði þegn anna sem best með því að passa að þeir skemmi ekki og steli eigum hverra annarra og eitri ekki hver fyrir öðrum með mengandi og hættulegum efnum eða iðju. Það þarf líka stundum að hafa vit fyrir fólki svo það fari sér ekki að voða út af stundargróða og hugi ekki af afleiðingum. það er oft aðstöðumunur í samningum manna, sumir sem leita að vinnu myndu láta bjóða sér hvað sem er vegna þess að þeir hafa ekki val og hafa ekki réttar upplýsingar um afleiðingar af heilsuspillandi og hættulega iðju. Þess vegna eru settar öryggisreglur um vinnuvernd og aðstæður á vinnustöðum og þess vegna eru settar reglur um hegðun í umferðinni svo sem að skylda fólk til að vera í bílbeltum og hafa kveikt á bílljósum. 

Það er því miður þannig að viðfangsefni og áherslur stjórnvalda eru ekki alltaf í takti við það sem er brýnast og þar sem þörfin á endurbótum er mest. Það er blindu auga snúið að eiturlyfja og vímuefnaneyslu ungmenna í íslensku samfélagi í dag og reyndar verður ekki séð annað en slík neysla og tilheyrandi lífsstíll sé afar þóknanlegur stjórnmálamönnum, sérstaklega þeim sem eru á hægri væng stjórnmálanna. Það eru meira segja núna á þingi Íslendinga ungir þingmenn sem hafa það sem sitt helsta og sennilega eina baráttumál að gera aðgengi að áfengi betra. 

Myndin hér fyrir ofan sýnir skemmtun á karlakvöldi íslenskum framhaldsskóla. Aðalskemmtiatriðið virðist hafa verið einhvers konar keppni í að fylla sig af bjór.

Það getur ekki farið fram hjá neinum sem fylgist með íslensku samfélagi að hér er áfengisneysla og hvers konar vímuefnaneysla mjög upphafin.  Áfengum drykkjum er haldið að ungmennum og virðist vera hömlulaust hvernig framleiðendur og eigendur vörumerkja mega halda vöru sinni að unglingum. Ein sjónvarpsrás sem höfðar til unglinga birtir í sífellu áfengisauglýsingar og á hinum ýmsu netsvæðum sem virðast gera út á unglinga á menntaskólaaldri þá er mikið gert af því að auglýsa áfenga drykki og mikið um að myndir af krökkum séu skreyttar með áfengisauglýsingum. Ferðamálayfirvöldum og þeim sem auglýsa upp ímynd Íslands virðist ekki finnast neitt að því að auglýsa "íslenskt" vodka.

Ég hef skrifað nokkra pistla á blogg um þetta mál, sjá t.d. þessa:

• Vodkasala Íslands
• Ferðamálayfirvöld á glapstigum
• Klámleikjalandið Ísland og klámtán Reykjavík
• Áfengisauglýsingar sem beint er til unglinga
• Cult Shaker kúltúr á Íslandi 

Hér eru tenglar á þessi viðtöl við mig: 

• Áfengisauglýsingar á netsíðum unglinga 
  Hádegisviðtalið á Stöð 2 (Salvör Gissurardóttir) 

Það er núna vakning hjá fólki varðandi mengun og heilbrigðan lífsstíl. En þessi vakning nær ekki ennþá til þeirra efna sem eru hvað mestu mengunarvaldarnir og verstu eiturefnin í samfélagi okkar.  Sennilega veldur áfengi meiri skaða í samfélagi okkar en nokkuð annað eiturefni og fleiri heilsuvandamál, ofbeldisverk, voðaverk og slys má  rekja til þannig neyslu en t.d. til mengunar af völdum stóriðju.  Það birtist nýlega greinin  Áfengisstefna á Íslandi í læknablaðinu og í sama blaði er greinin Þáttur áfengis í komum unglinga á slysa- og bráðadeild Landspítala 

það er mikill munur gerður á löglegum og ólöglegum vímuefnum í hvernig stjórnvöld meðhöndla neytendur. Fangelsin á Íslandi eru full af fíklum og burðardýrum eiturlyfjasala en þau eru líka full af mönnum sem hafa framið voðaverk í ölæði. 

Hver bloggar fyrir þig?

Það er fleira sem skilur á milli þess að vera ráðherra og vera ekki ráðherra en að fá bíl með bílstjóra. Ráðherrar og háttsettir menn í stjórnkerfinu og viðskiptalífinu losna nefnilega oft við að skrifa sínar ræður og greinar sjálfir, þeir hafa fólk í þessu fyrir sig. Alla vega til að semja ræðupunkta og afla bakgrunnsupplýsinga. Enda eins gott, þeir þurfa að vera á þönum að setja alls konar samkomur.

Ég man einu sinni eftir skemtilegu tilviki þar sem einn ráðherra átti að byrja að ávarpa samkomu. Ráðherrann var seinn fyrir og greinilega ætlaði svo að hespa þetta af þegar hann kom og talaði blaðalaust - tja... og að mér fannst svolítið út í loftið. Hann sagði nokkra brandara frá þorrablóti austur á landi og af sveitungum þar. Ræðan tengdist ekkert tilefni samkomunnar svo ég hafði nú á tilfinningunni að ráðherrann hefði týnt eða ekki haft tíma til að lesa minnispunktana og bara treyst á sinn ræðusjarma að bjarga sér út úr aðstæðum. Næstur kom aðstoðarmaður ráðherrans í ræðustól og hann var nú ennþá skemmtilegri og staðfesti grun minn. Hann byrjaði á að veifa blaði með ræðu sem hann hefði samið fyrir ráðherrann og sem hann var soldið sár yfir að ráðherrann hefði ekki flutt því þar hefði komið fram fullt af tölfræðiupplýsingum sem tengdust efninu. Ég var nú bara fegin að losna við upptalningu á talnarunum.

Núna er það þannig að flestir ráðherrar vilja fylgjast með nútímanum og ná til allra kynslóða, líka þessarar sem hangir á myspace og bloggum. Sennilega mun það skipta máli í framtíðinni - og þá á ég við í næstu kosningum - hvort þú hefur verið áberandi á Netinu og hvort þú upplýsir almenning um hvað þú ert að gera í stjórnmálum og hver viðhorf þín eru og hvort þú sért í góðu sambandi við kjósendur á Netinu.  Fyrir síðustu kosningar voru mjög margir stjórnmálamenn sem töldu sig þurfa að stofna blogg og sumir blogguðu eitthvað rétt fyrir kosningar en hættu  eftir það. Sumir stjórnmálamenn sem hafa notið lýðhylli og vinsælda og koma vel út í sjónvarpi ná ekki til mín á bloggi, oftast er það vegna þess að mér finnst koma í ljós hvað þeir eru grunnir og yfirborðslegir og hafa engu að miðla og ekkert að segja frá.  

Blogg og netsamfélög eru öðruvísi miðlar en sjónvarp og ræðupúlt og ég hugsa að þeir sem eru stjörnur í sjónvarpi  því þeir geisla af skjáþokka eða geta talað undir borðið alla á bændafundum og fengið salinn til að veltast af hlátri séu ekki endilega að meika það á bloggi.  Ég held að  sjónvarp sé miklu yfirborðslegri miðill en  blogg og þú getir auðveldar slegið ryki í augum á fólki og eitthvað sem þú segir á einni mínútu geti gert útslagið. Það er möguleiki á miklu meiri íhugun á bloggi og það er möguleiki á öðruvísi samskiptum.

Ég held að það sé sjálfgefið að núna þegar tilvera á Netinu er orðinn þáttur í stjórnmálabaráttu þá sé aðstoðarmönnum ráðherra fengið það hlutverk að aðstoða líka við að skrifa bloggið þeirra og sjá um og fylgjast með og hugsanlega taka þátt í netumræðu sem tengjast ráðherranum. Sumir stjórnmálamenn eins og Björn Bjarnason eru þó svo ritfærir og góðir í netumræðu að þeir skrifa sjálfir allt sem þeir birta á Netinu. Það mun eflaust skipta máli fyrir stjórnmálamenn framtíðarinnar að þeir hafi orðspor í Netheimum og netumræðu en láti ekki eins og það séu álfheimar sem koma þeim ekki við og eru þeim ósýnilegir. Sennilega mun á næstu misserum meira tal og útsendingar og netfundir skipta máli í bloggi, það verður ekki eingöngu orðræða gegnum ritað mál.

það mun eflaust koma að því að mektarmenn í íslensku samfélagi hafi fólk fyrir sig í að skrifa hugsanir þess og orð og teikna upp ímynd þeirra. Það er skemmtileg grein á BBC núna Are my online friends for real? sem lýsir þessari þróun.  Sumir hafa ef til vill þegar atvinnu sína af því að skrifa blogg og halda úti Myspace síðu undir nafni einhvers annars. 

Núna hefur moggabloggið tekið við af málefnavefnum og við erum margir málverjarnir að tjá okkur hérna. Ég og StebbiFr vorum að ég best man þau einu sem voru undir eigin nafni þar. Þetta minnir mig á að þegar ég byrjaði að tjá mig á málefnunum þá heyrði ég oftar en einu sinni þá samsæriskenningu um það sem ég skrifaði að það væri bróðir minn sem væri að skrifa undir mínu nafni.   

Hryðjuverk og vasaþjófar

Núna er viðbúnaðarstig vegna hryðjuverkahættu eins hátt og það getur verið í London. Ég var nýlent í London þegar seinni hryðjuverkahrinan reið yfir 21. júlí 2005. Það ríkti skrýtið ástand í borginni næstu vikur á eftir. Það greip um sig mikil hræðsla og tortryggni gagnvart ungum karlmönnum af austrænum uppruna. Ég bjó í Austur London og þar var áberandi að fólk forðaðist verslanir og matsölustaði sem reknir voru af múslimum. Veitingahúsin við Brick Lane voru auð. Ég sá oft á götunum lögreglumenn handtaka og/eða yfirheyra menn og alls staðar voru löggæslumenn og hermenn áberandi. Það var mikil löggæsla við neðanjarðarstöðvar. Það var samt uggur í flestum en fólk hefur ekkert val í London, það verða allir að nota samgöngukerfin.

ég man eftir einu atviki þar sem ég var augnabliksstund skelfd, ég var að koma út úr neðanjarðarlestinni við Finsbury Park moskuna og þar semm strætisvagnarnir stoppa kom fólk hlaupandi á móti okkur, ég man eftir að sá fyrsti sem ég sá var ungur maður og ég man ennþá hræðsluna og örvæntinguna í svip hans. Það var eins og um líf og dauða væri að tefla. Á hæla honum hlupu aðrir.  

En rétt eftir að hann hleypur beint á móti okkur þá hendir hann tösku í jörðina og svo átta ég mig á því að hann var vasaþjófur sem hafði rænt handtösku af konu og einhverjir voru að hlaupa hann upp svona eins og "stöðvið þjófinn" sena í gamalli Oliver tvist mynd. 

En Finsbury Park moskan gengdi stóru hlutverki í hryðjuverkunum í London og margir hryðjuverkamannanna höfðu tengsl við þá mosku.

Fjórir í haldi vegna árása í Bretlandi

Vodkasala Íslands

Er viðeigandi að forseti Íslands auglýsi vodka? Ég er döpur yfir því að engum virðist finnast athugavert að  framlag til ferðamála og landkynningar á Íslandi fari í að auglýsa  vodka og opinberir aðilar á sviði ferðamála skuli leggja blessun sína yfir og styðja að erlend fyrirtæki í vafasamri framleiðslu setji hér upp átöppunarverksmiðju til að geta notað Ísland í markaðssetningu sinni.  Vodka er eimað áfengi og frekar einsleit vara og er skólabókardæmi um hvernig hægt er búa til einhverja ímynd utan um ekki neitt. þetta vodka sem er tappað hér á íslandi er markaðsett sem séríslensk afurð sem hafi í sér eitthvað af hreinleika og ósnortinni náttúru Íslands, það er notað orðalag eins og  "filtered through lava rock collected from local volcano fields in Iceland".

Vodka er líka hættulegt eiturlyf sem er ásamt öðrum brenndum drykkjum stór áhrifavaldur í mannlegri eymd víða um lönd. Það má sjá dæmi um hvernig þetta vodka er markaðsett með aðstoð Íslands í þessari Glærusýningu sem er frá ráðstefnu sem Ímark hélt á markaðsdeginum 2007

Ég benti  í síðasta bloggi á hvernig markaðsátakið Iceland Naturally virðist vera á glapstigum með því að spyrða markaðssetningu á íslenskum vörum og Íslandi við áfengi og ákveðna vodkategund. Reyndar virðist mér núna vefsvæði þessa markaðsátaks vera undirlagt af vodkaauglýsingum og kynningum á áfengi. Sem dæmi má nefna að núna er á forsíðunni kynnt eitthvað martini samkvæmi eins og það sé það helsta sem er á döfinni varðandi Ísland: "From Iceland with Love” Cocktail Party - featuring Icelandic vodka, fish, cheese, skyr and products. The Martini Society July 7". 

Finnst ferðamálayfirvöldum á Íslandi og ferðamannaiðnaðinum á Íslandi þetta virkilega vera góð markaðssetning á Íslandi? Er svona markaðsetning með velþóknun opinberra aðila?

Eina sem ég fann á Netinu um Iceland Naturally átakið frá opinberum aðilum m.a. Sturlu Böðvarssyni fyrrum samgönguráðherra og frá Birni Inga Hrafnssyni fyrrum aðstoðarmanni forsætisráðherra og utanríkisráðherra um Iceland Naturally  var afar jákvætt. Björn Ingi skrifar  2005 sjá hér hérna afar lofsamlegt blogg um Iceland Naturally. Hann segir þar:

 "Á fimmtudag skildi ég við föruneyti forsætisráðherra og hélt á stjórnarfund í Iceland Naturally, landkynningarverkefni okkar Íslendinga í Norður Ameríku. ... Iceland Naturally er að mínu mati einstaklega gott dæmi um vel heppnað verkefni, þar sem tiltölulega takmarkaðir fjármunir nýtast til hins ítrasta. Lykilorðið hefur verið að nýta auglýsingafé vel, en huga ennfremur að kynningu og umfjöllun með þeim árangri að ótölulegur fjöldi greina um Ísland og íslenskar vörur hefur birst í stærstu fjölmiðlum Bandaríkjanna á undanförnum árum."

 Ég veit að forseti Íslands kynnir oft íslenskar vörur og greiðir götu íslenskra fyrirtækja í heimsóknum sínum erlendis. Munum við sjá forsetann í framtíðinni auglýsa vodka sem tappað er á flöskur á Íslandi þrátt fyrir að það sé skaðlegt eiturlyf og bannað að auglýsa samkvæmt íslenskri áfengislöggjöf? Ég er nokkuð viss um að Ólafur Ragnar Grímsson lætur ekki bendla sig við áfengisauglýsingar eða óhollan lífsstíl, hann hefur verið talsmaður virðingar fyrir náttúru og hófsemi í lífsháttum. Ég vona líka að Björn Ingi Hrafnsson oddviti okkar framsóknarmanna í borgarstjórn Reykjavíkur hafi ekki verið að hrósa vodka og martini auglýsingum hjá Iceland Naturally í bloggfærslunni sem ég vitna í. 

 Allir sem auglýsa vörur bera ábyrgð. Í þessu tilviki er verið að nota ímynd Íslands sem hreina og ómengaða og villta náttúru til að auglýsa upp hættulegt og mengandi eiturlyf. Til langs tíma þá eyðileggur þetta ímynd Íslands. Það er einnig verið að auglýsa vöru sem er ekki íslensk og sennilega er framleiðslan á Íslandi ef hún er einhver eingöngu gerviframleiðsla - einhvers konar umskipun og átöppun og vatnsblöndun - eingöngu tilkomin til að geta selt vöruna sem íslenska vöru. það munu í framtíðinni koma mörg svona tilvik, ekki síst með auknum siglingum framhjá Íslandi. Er ekki ástæða til að spá í hvað er íslensk vara?

Af hverju er 66 gráður norður íslensk vara? Mér vitanlega fer öll framleiðslan fram núna erlendis í einhverju asíulandi þar sem fólk fær lægri laun en hérna. Er það út af því að hönnunin er ennþá íslensk? Er eitthvað annað í 66 gráðu norður fatnaðinum íslenskt?

Er þetta vodka íslenskt af því að hér var sett upp átöppun til að gera vöruna íslenska? 

(skjámynd af forseta Íslands er frá forsíðu imark.is og af vodkaauglýsingu frá glærum á markaðsdegi imark.is) 

Ferðamálayfirvöld á glapstigum

Það er reginhneyksli að peningar íslenskra skattborgara sé notaðir til að auglýsa upp vodka frá fyrirtækinu William Grant & Sons International og að íslensk ferðamálayfirvöld skuli taka þátt í að auglýsa áfengi og ennþá verra að þær auglýsingar  beinast sérstaklega að ungmennum. Það er líka reginhneyksli að íslensk ferðamálayfirvöld hafi velþóknun á og ýti undir að ímynd Íslands sé tengd við vodkaframleiðslu og hvatt sé til neyslu sterkra drykkja með því að draga ímynd Íslands niður í drykkjufen.  Það er eitthvað verulega mikið að dómgreind allra þeirra sem koma að þessum málum og sem ekki sjá hversu viðurstyggileg þessi samsetning er.

Ég trúði ekki mínum eigin augum þegar ég kynnti mér hvernig markaðsetning á Reyka vodka er styrkt af íslenskum ferðamálayfirvöldum og íslenskum flugfélögum, ég skoðaði greinar og vefi sem Jón Axel benti á í blogginu  Athyglisverð markaðssetning

 Það virðist vera að enginn sem starfar að markaðsetningu Íslands sem ferðamálalands sjái neitt athugavert við að alþjóðlegt fyrirtæki sem selur  sterka áfenga drykki sem bannað er með lögum að auglýsa hér á landi setji upp átöppun hérlendis og fái þannig aðgang að því að auglýsa sínar vörur í gegnum ýmsa ferðamálavefi sem styrktir eru með opinberu fé.

Það er veruleg þörf á því að það sé farið ofan í hvernig opinberu framlagi Íslands til ferðamála er varið og hvers konar viðmið eiga að gilda fyrir þær vörur og þjónustu sem ferðamálayfirvöld hampa og reyna að beina neyslu að.

Hvernig styrkir það ímynd Íslands að landið sé notað til að auglýsa upp vodka og hvatt sé til neyslu hættulegra eiturefna? Munum við á næstunni eiga von á því að íslensk ferðamálayfirvöld auglýsi upp fylgdarþjónustu og kjöltudans og munum við á næstu árum eiga von á því að sett verði upp veðmálahverfi upp í miðbænum í Reykjavík og reykvísk spilavíti verði auglýst upp með tilstuðlan ferðamálayfirvalda? 

Hver er alþjóðleg ábyrgð ferðamálayfirvalda? Er allt í lagi að stuðla að ungmennadrykkju og vímuefnaneyslu erlendis ef það er  getur selt einhverjar vörur sem eru í þykjustunni framleiddar hérlendis - þar sem Ísland er annað hvort  átöppunarverksmiðja eða umskipunarhöfn.

Ég bendi sérstaklaga á að átakið Iceland Naturally er algjörlega á villigötum, mér virðist það átak vera afar nátengt þessum vodkasala.  Ég fæ ekki betur séð en að þetta átak sé styrkt af opinberu fé frá Íslandi, fé sem ætlað er að auka hróður Íslands erlendis. Hvernig í ósköpunum er hægt að auka hróður Íslands erlendis með lágkúrulegum auglýsingum um vörur sem eru svo hættuleg eiturefni og mikill partur af eymd fjölskyldna og einstaklinga að það er bannað að auglýsa þær á Íslandi?

Í fréttatilkynningu segir að Iceland Naturally (IN) vinni að framgangi Íslands, íslenskra fyrirtækja og vörumerkja  í N-Ameríku og stefnan að byggja upp jákvæða ímynd Íslands. Nánari upplýsingar fást hjá Einari Gústavssyni, framkvæmdastj. Ferðamálaráðs Íslands í N-Ameríku ([e-mail]) eða Hlyni Guðjónssyni, viðskiptafulltrúa Íslands í N-Ameríku ([e-mail]). Mbl. Mánudaginn 5. febrúar, 2007

Fimmtudaginn 1. mars, 2007 var grein í mbl um þessa vodkaframleiðslu. Þar segir að  vodkað og Ísland verði ekki aðskilið í markaðssetningu því markaðsstarfið byggi á ímynd Íslands erlendis. Þar er líka eftirfarandi haft eftir fulltrúa vodkasölufyrirtækisins:

Bandaríkjamarkaður er stór og þeir velja sína staði vandlega og til að byrja með þá staði sem Icelandair flýgur til, enda auðveldara að vinna kynningarstarfið þar sem góð tenging við landið er fyrir hendi. Það starf hefur nú staðið yfir í tvö ár og árangurinn verið góður. Reyka er orðið hluti af Iceland Naturally og nú stendur fyrir dyrum auglýsingaherferð í Bandaríkjunum í sjónvarpi og á Netinu. Þar verður Hafdís Huld í aðalhlutverki og Ísland auðvitað. Þar koma einnig við sögu lundinn, fyrsti íslenski kvenforsetinn, hugsanlegur bandarískur kvenforseti, útkjálkabar og ísjakar, svo fátt eitt spennandi sé nefnt í þessari sérstöku blöndu af Reyka-vodka."

 

 Skjámyndirnar tók ég frá íslenskum ferðamálavefjum. Ég skora á ferðamálayfirvöld, ferðamálastofu og samgönguráðherra og ferðamálaráð að íhuga hvort þessi tegund af markaðssetningu á Íslandi sem ferðamálalandi og þessi samanspyrðing á Íslandi  við hættuleg eiturlyf (vodka) er í samræmi við það sem við Íslendingar viljum tengja við ímynd landsins.

Karaoki

Núna er ég að prófa http://bix.yahoo.com en það er ennþá eitt félagsnetið þar sem inntakið kemur frá notendur. Þetta kerfi gengur út á samkeppnir, sérstaklega samkeppnir um karaoki og lip-sync. Það er nú reyndar skemmtilegt og einfalt að taka þátt í karaoki keppni þarna, maður velur sér bara lag og getur hlustað á það fyrst og svo tekið sjálfan sig upp að syngja undir og sent upptökuna í keppnina. Þetta er nú eitt einfaldasta karaoki kerfið á netinu.

Það er hægt að búa til alls konar samkeppnir í bix. Það er hægt að hlaða inn eigin vídeóum, taka beint upp af vefmyndavél og setja inn vídeo sem þegar eru á youtube eða photobucket.  Keppnin er nú ekki aðalatriðið heldur umræðan og samfélagið. Mér sýnist að margir tónlistarmenn séu á myspace til að koma sér á framfæri, ég held að svona kerfi eins og Bix séu ennþá betur sniðið að þörfum listamanna.

Það er gaman að skoða hversu mikill leikmannabragur er á mörgu því efni sem er á Bix, upptakan er léleg og ódýrasta gerð af hljóðnema og vefmyndavél og svo er upptökustúdíóið oftast stofan eða eitthvað rými á heimili og oft má sjá heimilislífið í bakgrunni eins og á þessu vídeó þar sem heimavinnandi húsmóðir er að taka sjálfa sig upp og börnin hlaupa um í bakgrunni myndarinnar.

Þó að þessar upptökur séu viðvaningslegar og það líti út fyrir að það sé lítil sköpun þarna eigi sér stað þegar fólk velur bara lag annarra flytjenda og hermir eftir þá held ég að það samfélag sem er á bix vísi einmitt í þá átt sem listir eða stafrænt föndur stefnir í - að notendur skapi eitthvað sjálfir og leggi sín verk í dóm og umsögn annarra og að notendur geti notað við sína listsköpun einhverjar einingar (t.d. textann og lagið) frá öðrum. Ég hugsa að fólk muni innan skamms fara að gera meira við svona félagsnet eins og Bix t.d. að syngja aðra texta og mixa saman mismunandi tónlist.

Þetta er ein tegund af alþýðulist hins stafræna almúga árið 2007.

Hver sem er getur búið til sína samkeppni. Ég prófaði að búa til mína eigin samkeppni um vídeó frá sumri á Íslandi.

Reisupassi handa S. H. Guðmunsen

Jón Sigurðsson, Jónas Hallgrímsson og herra S.H. Guðmundsen voru uppi á sama tíma á Íslandi og unnu að ýmsum þjóðþrifamálum. S.H. Guðmundsen  ferðaðist um landið á vegabréfi sem lýsir hinum ýmsu mannkostum hans. Sölvi var jafnhógvær maður og frelsishetjan Jón og þjóðskáldið Jónas. Gallinn er bara sá að vegabréfið var falsað og Sölvi skrifaði það sjálfur og falsaði undirskrift sýslumanns. En það gerir það nú bara skemmtilegra, svona er reisupassinn:

Sýslumaðurinn yfir Norðurmúlasýslu gjörir vitanlegt: að herra silfur- og gullsmíður, málari og hárskerarari m.m. Sölvi Helgason Guðmundsen, óskar í dag af mér reisupassa frá Norðurmúlasýslu yfir austur- og suður- og norðurfjórðunga Íslands, til ýmislegra þarflegra erinda. Meðfram öðrum hans erindum, ætlar hann að setja sig niður í einhverri sýslu á þessari ferð sem annar handverksmaður, hver að er þó flestum handverksmönnum meiri, og betur að sér til sálar og líkama: og er hann fyrir laungu búinn að gjöra að sig nafnfrægan í norður- og austurfjórðungum landsins með sínum framúrskarandi gáfum á flestum smíðum, og á alla málma, klæði og tré; líka fyrir uppáfinningar og ýmsar frólegar og hugvitsfullar kúnstir, en þó mest fyrir iðni, kapp, minni, ástundan, sálarflug, skapandi ímyndunarafl og kraft, bæði smekk, tilfinning og fegurð í öllum bókmenntum og vísindagreinum, líka svo fyrir karlmennsku, krapta og glímur, fjör og fimleika, gang og hörku, sund og bandahlaup. Með sundinu hefur hann bjargað, að öllu samanlögðu, 18 manns, er fallið hafa í ár, vötn (ströng og lygn) og sjó. Á handahlaupum hefir hann verið reyndur við færustu hesta, bæði nyrðra og eystra, og hefir hann (að frásögn annarra en hans sjálfs) borið lángt af.

Margar eru hans íþróttir, fleiri og meiri, þó ekki sé hér upptaldar, og mætti þó tilnefna nokkrar, sem hann skarar fram úr öðrum í, sem eru: allar listir hér að ofan töldu, einnig frábær ráðvendni og stilling, góðmennska og lítillæti, hógvörð og hreinskilni, greiði og gjafmildi og fl. Fyrir þessar dygðir og listir, sem hann er útbúinn með, og sem hann sýnir jafnt öllum, af öllum stéttum, þá er hann elskaður af hverjum manni, í hverri röð sem er, sem verðugt er.

Þessi passi gildir frá 1. ágústmánaðar 1843 til þess 30. júníusmánaðar 1844, handa herra gullsmið, málara og hárskerara S. H. Guðmundsen, sem reisupassi, en að öllu sem fullkominn sýslupassi, ef hann setur sig niður í einhverri sýslu, eins og hér er getið um að framan.

Þessi passi gildir fyrir herra Guðmundsen héðan frá Norðurmúlasýslu yfir allan þann part landsins, sem hér er að framan skrifaðaur (þótt enginn embættismaður teikni á hann) heim til Norðurmúlasýslu aptur, ef hann setur sig ekki niður í einhverri sýslu á ferðinni, eins og hans áform er, sem fyr er sagt hér að framan.

Þessi passi gjörist gildandi fyrir herra silfur- og gullsmið, málara og hárskerara Sölva Helgason Guðmundsen, til að fara svo hart og hægt um landið, sem honum þóknast, á þessu tímabili, sem hér er fyr frásagt í passanum, því hann er í þeim erindum, er hann verður að hafa hæga ferð, en það er við náttúrufræði, að skoða grös og steina, málma og svo frv. En að vetrinum ætlar hann að skoða, hvernig veður haga sér til í hverju héraði á þeim parti landsins, sem hann fer um (eða reisir um), og þarf hann að halda miklar skriptir á öllum þessum tíma, bæði dagbækur, veðrabækur og lýsingabælur af ýmsum pörtum landsins, líka teikningar af ýmsum hlutum, s.s. fossum, hverum, fjöllum, jöklum, elfum, ám, brunahraunum, gjám, stöðum, fjörðum, eyjum, draungum, standbjörgum, eyðisöndum, öræfum, skógum, dölum, giljum, grafningum, byggðum, bæjum, fiskiverum, höndlunarstöðum, byggðalögum, búnaðarháttum og svo mörgu og mörgu fleira, sem ekki verður hér upptalið, sem hann ætlar að skoða og sjá og um að skrifa og sumt upp að teikna, allt á sinn kostnað m.fl.

Það er mín ósk og þénustusamleg tilmæli til allra, sem margnefndan herra gullsmið m.m. S. H. Guðmundssen fyrir hitta, að þér látið hann passéra frítt, og liðsinnið, hjálip og lánið honum það sem hann meðþurfa kann til ferðarinnar, því það er óhann fyrir hvern mann, að hjálpa honum og lána, ef hann þess með þurfa kann, þótt hann fjarlægist þann, er kynni lána honum peninga og annað sem hann kynni meðþurfa, sjá hans vitnisburðu hér að framan.

Passinn þessi gildir, þó ekki sé um það getið hér að framan í passanum, yfir allan Vestfirðingafjórðung, ef herra Guðmundsen á þangað erilndi, eða vill þar eitthvað skoða, viðkomandi náttúrufræðinni, eða ef hann vill þar setja sig niður sem handverksmaður í einhverri sýslu þar.Samt gildir ekki þessi passi, hvorki þar né í hinum fjórðungum landsins um lengra tímabil, en ´her er getið um að framan, nefnilega frá 1. ágústusmánaðar 1843 til þess 30. júníusmánaðar 1844 sem reisupassi, en að öllu sem sýslupassi, hvar sem hann setur sig niður í hverjum fjórðungi landsins, og þarf hann ekki sýslupassa héðan frá Norðurmúlasýslu, annan en þenna.

Norðurmúlasýslu skrifstofu 1sta águstusm. 1843.
F.Ch. Valsnöe
(l.s)

 (Heimild Ný félagsrit 1849 bls. 153)

Femínistastripp

Geiri í Goldfinger er mikið í fjölmiðlum þessa daganna eftir greinina í Ísafold. Sú starfssemi sem hann rekur í Kópavogi er ömurleg svívirða og vona ég svo sannarlega að bæjaryfirvöld þar taki ekki þátt í að greiða götu svona reksturs. Ég rakst á skemmtilega og einfalda netþjónustu  comeeko þar sem hægt er að búa til "comic strip" og hér er femínistastripp sem ég bjó til um Geira í Goldfinger. Ég notaði skjámyndir af fréttum og kastljósi rúv í gærkvöldi.

Við femínistar vorum fyrir nokkrum árum með aðgerðir fyrir utan Goldfinger í Kópavogi. 

Reyndar er hægt að nota comeeko fyrir fleira en femínistastripp. Það er skemmtilegt að búa til sín eigin comic strip t.d. af litlum börnum og skrýtnum svipbrigðum þeirra. Hér er eitt skemmtilegt:

Ég hvet alla sem hafa gaman af stafrænu föndri með myndir og teikningar til að prófa, það verður samt að athuga að ef textinn á að vera á íslensku þá má ekki nota sumar leturgerðir t.d. ekki leturgerðina comics. 

Hér er eitt dæmi sem ég gerði um möguleikana sem eru í þessu skemmtilega verkfæri. Þetta er mjög einfalt og á allra færi að gera svona comic strip.

Fuglaskoðun í Viðey

Ég fór í fuglaskoðun í Viðey í gærkvöldi.  Þetta var skemmtileg gönguferð um eyna undir leiðsögn fuglafræðings, ævintýralega fallegt útsýni og fuglakvak alls staðar. En þó ég mætti brynjuð kíki og myndavél þá fannst mér ég vera bæði blind og heyrnarlaus því fuglafræðingurinn benti á nokkra örlitla depla langt í burtu á tjörn eða út í sjó eða klettum  eða á lofti og sagði að þetta væru tildrur eða blesgæsir eða óðinshanar eða jaðrakan eða sandlóur. Svo hlustaði hann og heyrði í þessari eða hinni fuglategundinni. Fyrir mér rann þetta allt saman.  Ég þekkti nú samt nokkra fugla t.d. æðarfugl, kríu, sílamáf og hrossagauk. Það tekur sennilega langan tíma að verða fær í að þekkja fugla og ég þarf mun betri kíki. En ég lærði slatta um fugla t.d. að sílamáfar (kallaðir vorboðinn hrjúfi) eru um þúsundum saman á öskuhaugunum og þeir og krían eru í vandræðum út af því að það eru ekki nóg sandsíli. 

Ég skrifaði svo áðan grein á íslensku wikipedia um tvo fugla, annars vegar um tildru og hins vegar kjóa. Svo setti ég mynd sem ég tók af Viðeyjarkirkju og Viðeyjarstofu inn á Commons og setti hana í public domain þannig að hver sem er getur notað hana til hvers sem honum þóknast. Svo byrjaði ég á wikibók um fargesti á Íslandi, mér finnst mjög spennandi svona fuglar eins og margæsir og tildrur sem koma hér við  vor og haust  í óralangri ferð sinni milli varpsvæða í norðri og vetrarstöðva í suðri. Ég er eiginlega alveg heilluð af svona bíomassahreyfingum jarðarinnar og ég tek eftir að margar af þeim greinum sem ég skrifa um náttúrufræði á wikipedia eru um dýr sem ferðast svona eins og loðna og áll. Reyndar er ég líka heilluð af dýrum sem taka miklum myndbreytingum á æviskeiðinu og eru jarðföst og rótföst  hluta ævinnar en reka með straumum hluta ævinnar.

 

 

 

Gulag og Stasi staðsett í vestrinu

 Ég vona að stjórnarfar í Bandaríkjunum sé ekki eins slæmt og orðsporið sem nú fer af stjórn Bush. Ég sé ekki betur en Gulagið og Stasi sé núna að staðsetja sig þar vestra  þó það sé undir öðrum nöfnum. Fangabúðir og fangaflutningar Bandaríkjamanna í Guantanamo og víðar hafa ekki aukið hróður þeirra og dómsmálaráðherrann Alberto Gonzales er miklu, miklu verri en Björn Bjarnason okkar Íslendinga.

Hér er myndband þar sem þingmaður spyr  Gonzales  út í  hvernig fangabúðir þar sem fólki er haldið í fangelsi án dóms og laga geti samræmst stjórnarskrá Bandaríkjanna, þetta fjallar um Habeas corpus

Eiginlega er Gonzales afar fráhrindandi svo ekki sé meira sagt.  Hann rak slatta af ríkissaksóknurum að eigin sögn vegna þess að þeir voru ekki nógu duglegir en að sögn annarra þá voru sérstaklega reknir þeir saksóknarar sem voru að rannsaka mál sem tengdust repúblikönum eða sem voru ekki nógu duglegir við að ofsækja Demókrata sb.: "But critics say last year's dismissals were meant to halt investigations into Republican officials or punish the attorneys for failing to prosecute Democrats."

 Mér virðist Gonzales ekki bara tengjast þessu skrýtna saksóknaramáli heldur virðist honum hafa verið mjög umhugað um að koma lögum um eftirlit með þegnunum í gegn og svífst einskis við það  sb. þessa grein.

In February 2006, the Senate Judiciary Committee was inquiring into the warrantless wiretapping program whose existence had been revealed just two months before. Sketchy details had also begun to emerge of the March 2004 hospital room ambush, in which Mr. Gonzales, then the White House counsel, and then-White House chief of staff Andrew H. Card Jr. tried to browbeat the gravely ill Attorney General John D. Ashcroft, who had temporarily yielded his office to his deputy, into approving the warrantless surveillance program.

• The Gonzales Coverup  at The Washington Post (reg. req'd), May 17

Það molnar ansi hratt undan trausti heimsins á stjórnsýsluna í Bandaríkjunum. Ef stjórnsýslan þar vestra stefnir áfram í þessa átt  þá getur þetta ekki farið á nema einn veg. Það er ekki falleg framtíðarsýn.

Það þarf náttúrulega ekki að taka fram að Gonsales er ákaflega fylgjandi afar ströngum höfundarréttarlögum  og að hægt verði að gera tölvubúnað upptækan og njósna um tölvuhegðan almennings.  Hann vill líka skilgreina nýja tegund af tölvuglæpum þar sem liggur lífstíðarfangelsi við að nota ólöglegan hugbúnað.

Sjá hér:

Create a new crime of life imprisonment for using pirated software. Anyone using counterfeit products who "recklessly causes or attempts to cause death" can be imprisoned for life. During a conference call, Justice Department officials gave the example of a hospital using pirated software instead of paying for it.

Greinin úr heild:
Gonzales proposes new crime: "Attempted" copyright infringement

Og svo meira um hvers vegna mér finnst Gonsales ekkert spes..:

Terrorism used as new excuse for ISP snooping proposal

Vonandi kemur ekki sá tími á Íslandi að ég þurfi að lesa mér betur til um Habeas corpus

 

Repúblikanar koma í veg fyrir að lýst verði vantrausti á Gonzales