Dagur opins og frjáls hugbúnaðar

Í dag er Softwarefreedomday 2007 eða dagur þar sem vakin er athygli á frjálsum og opnum hugbúnaði. Það er mjög mikilvægt í skólastarfi að hafa aðgang að góðum hugbúnaði og ekki síst hugbúnaði sem er uppfærður og sem auðvelt og leyfilegt er að aðlaga að þörfum notenda. Það hættir mörgum við að einblína á að það verði að kaupa tölvur fyrir börnin en það er ekki nóg, það skiptir meira máli til hvers þau nota tölvuna. Það er ekki nóg að hafa fullkomin tæki  fyrir nemendur ef enginn hugbúnaður er til að nota þau. 

Einu sinni var hugbúnaður alveg fáránlega dýr. Núna bjóðast skólanemum Office forrit á mjög hagkvæmum kjörum. Það eru fín forrit. En það eru líka til opin og ókeypis útgáfa af sambærilegum forritum Open Office.  

Ég nota núna margs konar opinn hugbúnað með nemendum. Sérstaklega vil ég nefna Mediawiki, Moodle og Elgg. Það eru allt kerfi sem eru í mikilli þróun. 

Ég hélt upp á daginn með því að vera mest allan daginn að pæla í opnum hugbúnaði og setja upp nokkur vefsvæði með slíkum forritum þ.e. með Mediawiki, Wordpress og Moodle.

Sigurður Fjalar   og Fjóla  og Ella Jóna hafa nýlega skrifað  góðar blogggreinar um hvernig þau nota og sjá fyrir sér hvernig má nota opnar lausnir í skólastarfi. Við erum mörg sem notum opinn hugbúnað jafnt í háskóla, framhaldsskóla, grunnskóla og leikskóla.

Á Softwarefreedomday árið 2006 stofnuðum við félag um opinn hugbúnað í skólastarfi.

Ég setti í dag upp Wordpress vef fyrir það félag á isfoss.org

3F félag um upplýsingatækni og menntun er nýbúið að setja upp finan vef joomla vef  á 3F.is 

Það hefur orðin mikil breyting  á seinustu misserum  í viðhorfi þeirra sem sjá um tölvuumhverfið á mínum vinnustað til opins hugbúnaðar. Núna er skilningur og áhugi fyrir opnum hugbúnaði og ég og Sólveig höfum fengið aðstöðu til að prófa slíkan hugbúnað með nemendum. Vonandi vaknar áhugi hjá Námsgagnastofnun og fleiri aðilum í menntakerfinu á mikilvægi opins aðgangs bæði að hugbúnaði og námsgögnum.

Verðið á „100 dollara fartölvunni“ komið í 188 dollara

Morðinginn í næsta húsi

Á meðan borgarstjórinn í Reykjavík spáir í hvort bjórinn eigi að vera volgur eða ekki til að slá á rósturnar og ólætin í miðbæ Reykjavíkur á næturna þá er minn veruleiki annar. Ég fer sjaldan í miðbæinn en ég er stundum lengi að vinna frameftir á vinnustað mínum. Þegar ég fer þá er ég alltaf hrædd og það er ekki að ástæðulausu. Þar hefur oft verið brotist inn og núna nýlega gekk samstarfsmaður minn fram á hóp þjófa sem voru búnir að brjóta upp innganga og voru að leita að ránsfeng þegar hann kom til vinnu í morgunsárið. Þjófarnir leggja bílum bak við húsið í myrku porti einmitt þar sem er bílastæði starfsmanna eins og mín.

Ég bý í Teigahverfinu og úr bakgarðinum sem snýr að Laugateig þá er ég andspænis við Laugateig 19 sem er hús Verndar. Þar er nú fangelsi, ég held að allir sem þar sitja séu að afplána dóma. Það hefur aldrei verið borið undir íbúana í þessu íbúahverfi hvort þeir séu samþykkir því að hættulegir ofbeldismenn og fangar séu vistaðir þar. Við vitum ekki af því nema þegar þeir sleppa lausir.

Ég hef oft vakið athygli á þessu sjá m.a. þetta blogg: 

Hættulegir fangar í opnu fangelsi - Fangar á Vernd hafa oft brotið af sér

 

Við vitum ekki af því nema þegar þessir fangar brjóta af sér þegar þeir eru á Vernd. Þannig kom í fréttum að þarna hafa dvalið  Stóragerðismorðinginn, Sólbaðstofuræninginn og Gústi guðsmaður sem Kompás afhjúpaði þegar hann var að reyna að véla börn. Núna er frétt í DV "Harðsvíraður morðingi gekk laus" þar sem kemur fram núna á aðfaranótt sunnudagsins hafi strokið af heimili Verndar að Laugateig 19  annar tvíburanna sem myrtu mann á hrottafenginn hátt  í Heiðmörk og keyrðu yfir hann margoft.  

Þessi morðingi í hverfinu mínu mun hafa gengið laus í nokkra daga. Það kemur fram í DV að Valtýr Sigurðsson fangelsismálastjóri taldi ekki ástæðu til að auglýsa eftir tvíburamorðingjanum vegna þess að hann vildi vernda hinn tvíburann... 

En hver verndar mig og aðra íbúa hverfisins sem ég bý í og hver verndar mig og aðra starfsmenn í húsinu sem ég vinn í? 

 

Skrappblogg og skissublogg

Ég var að uppgötva að það er fjöldinn allur af íslenskum skrapp og skissubloggurum. Ég reyndar vissi ekki fyrr en í dag hvað skrapp merkir og að orðið að skrappa væri notað um það sem á ensku heitir scrap booking og stundum hefur líka verið þýtt með úrklippubækur.

Þessi tegund af alþýðulist árþúsundamótanna er mjög áhugaverð, það virðast margir fá útrás fyrir sköpun og list með því að útbúa og skreyta myndabækur. Þetta er örugglega fyrirboði þess að það stafrænt föndur verði vinsælt, það er upplagt að vinna svona skreytingar í tölvu. Reyndar er upplagt að búa til textaverk svona, ég þarf að prófa mig áfram með það. Ég bjó til þessa skrappmynd áðan úr nokkrum tölvubakgrunnum

Ég ákvað að skrappa með myndir sem ég tók einu sinni á 1. maí af femínistum svona til að minna á að meðan rapp er strákamenning þá er skrapp kvennamenning og það er iðja sem gjarnan er stunduð af konum með ung börn eða ömmum sem eru að búa til minningabækur um líf fjölskyldna sinna.

Hér eru nokkur skrapp- og skissublogg, það er margt hægt að læra um þessa nýju listgrein á því að lesa þau:

* http://skrappkelling.wordpress.com
* http://liljuskrapp.blogspot.com
* http://www.scrap.is/spjall/index.php Skrappspjallsvæði
* http://heijublogg.blogspot.com
* http://hannakjonsd.blogspot.com/
* http://saeunns.blogspot.com/
* http://thesketchplace.blogspot.com/
* http://skissublogg.blogspot.com/
* http://rosabjorgb.blogspot.com/

Ég sé að ég skrifaði fyrir fimm árum eða 23.8.02 blogg um skrapp. Þá kallaði ég þessa iðju klippibækur. Best ég lími það hérna inn: 

Klippibækur - Alþýðulist nútímans

Nú þegar svo margir hafa aðgang að tölvu og stafrænni myndavél þá má búast við að fólk noti þessa verkfæri fyrir það sem því finnst skemmtilegt og eitt af því er að búa til eigin minningabækur - safna saman og skrá og sýna efni um nánasta umhverfi. Mér finnst gaman að spá í hvernig eitt nýtt tómstundagaman scrapbooking hefur breiðst út. Þetta er að búa til eigin mynda- og textamöppur, gjarnan með ýmis konar pappírsklippi. Þetta gengur út á að búa sjálfur til skemmtilegar úrklippibækur. Sennilega mun þetta vera undanfari tómstundagamans þar sem fólk gerir svona stafrænar myndabækur og setur upp á Netinu.

Óshlíðarvegur er mesta mannvirkið

Það eru mörg mannvirki á Vestfjörðum sem eru stórvirki. En ég er ekki í vafa um hvað ég myndi telja mesta mannvirki Vestfjarða. Það er Óshlíðarvegurinn. Það er nú samt svo að þessi vegur verður ekki þjóðleið miklu lengur, honum verður væntanlega lokað þegar göngin koma til Bolungarvíkur.

Í framtíðinni mun fólk ganga um vegarsvæðið og undrast hve erfið skilyrði og hrikaleg Bolvíkingar bjuggu við, sjá alla vegaskálana, grjóttálmana, snarbratt fjallið fyrir ofan og sjóinn fyrir neðan.

Sums staðar fossar vatn niður, hér til hliðar er mynd sergio350d  af Óshlíðarvegi.

Ég myndi setja  Vestfjarðargöngin í annað sæti og svo nýja þorpið í Súðavík í þriðja sæti og í fjórða sæti myndi ég nefna Radarstöðina á Bolafjalli.

 

 

Fjölmargar tilnefningar á sjö undrum Vestfjarða

Bókakynningar og flugseinkanir

Er von að ég nenni ekkert að blogga um fréttir? Ég fékk samviskubit yfir að ég væri allt of mikið horfin inn í netheiminn og pældi ekki í öðru en veseni við að setja inn og tvinna saman módúla í mediawiki. Nema hvað ég ákvað að renna yfir fréttirnar til að fylgjast með hvað væri að gerast í heiminum. Það var þá stórfrétt á moggavefsíðunni að Ísland ætli að taka þátt í einhverri bókasýningu og svo mýgrútur af fréttum yfir að þessi og hinni flugvélinni seinkaði frá útlöndum vegna þess að helsti hasarinn á Íslandi í dag eru flugmenn sem fara sér að engu óðslega í mótmælaskyni. 

Jú og svo hefur það fréttnæma gerst í vikunni að utanríkisráðherra okkar kallaði íslenska herinn heim, hana Herdísi. Það er sennilega meiri þörf á henni núna hérlendis eftir að Rússarnir eru farnir að sveima hérna yfir háloftunum, það þarf að vera í viðbragðstöðu út af því og íslenski herinn verður að vera á vaktinni

Svo eru fjölmiðlar fullir af einhverjum fréttum yfir þessu framboði Íslands til öryggisráðsins og að Microsoft vilji að hér sér netþjónabú. Sama hvað ég reyni að horfa víðsýnt á þetta þá finnst mér þetta hvort tveggja mjög skrýtið, ég sé engin haldbær rök fyrir því að Ísland - nú eða eitthvað annað örríki heimsins eigi að vera í þessu öryggisráði og mér finnst afar vafasamt að hafa einhver netþjónabú hérlendis á meðal það þarf ekki annað en klippa í sundur tvo víra og þá er landið sambandslaust.

En það er nú út af fyrir sig forréttindi að búa í ríki þar sem væntanlegar bókakynningar eftir eitt ár og seinkanir á flugi eru aðalfréttamálin - alla vega á tímum þar sem fréttamennska er einhvers konar frásagnarlist hrakfara og harmleikja og erfiðleika. 

Menningarútrás í vændum

Vídeó, hljóð og krossapróf á wikisíðum

Ég er núna orðin sérfræðingur í mediawiki, ég er búin að setja upp sýnishorn af wikilexíu með vídeó, hljóði og gagnvirku krossaprófi. 

 

Sennilega kannast flestir   við alfræðiritið Wikipedia sem núna er orðið eitt stærsta alfræðirit heimsins. Flestir lenda einhvern tíma inn á wikipedia greinum þegar þeir nota leitarvélar á vefnum.  Wikipedia keyrir á kerfi sem heitir mediawiki og það er opinn hugbúnaður sem hægt er að sækja ókeypis á Netinu. Það er búið að þýða (að mestu leyti) þetta kerfi á flestar þjóðtungur og margir kunna á svona vefi.

Fyrst var wikipedia bara fyrir texta og svo komu myndir og nú eru margar wikipedia greinar ríkulega myndskreyttar, myndirnar eru geymdar á gagnagrunninum commons.wikimedia.org

En í dag nægir okkur ekki að hafa bara vefsetur sem eru texti og myndir og tengingar. Við viljum hafa möguleika á að spila hljóð, setja inn vídeómyndir og alls konar veftól (gadgets) t.d. landakort sem við getum skráð inn á.

Við sem kennarar viljum líka hafa einhverja gagnvirkni t.d. að nemendur geti prófað þekkingu sína.

Ég er að gera tilraunir með ýmsar aukaviðbætur í mediawiki á  wikisvæði sem ég er með erlendis. Þar setti ég upp viðbót við Mediawiki sem gerir kleift að spila hljóð  (á mp3 formi) og setja inn vídeó frá Youtube og Googlevideos. Ég setti líka upp sniðuga viðbót til að gera krossapróf þar sem nemandinn getur prófað kunnáttu sína og einnig viðbót til að setja inn hljóð.

 

Fyrir kennara og nema  er afar einfalt að setja inn vídeó og hljóð og krossaspurningar þegar svona wikiviðbætur eru komnar:

Hér er dæmi:

Hljóð er sett inn með einni skipun, þá kemur sjálfkrafa lítill spilari:

<mp3>nafn á hljóðskrá </mp3>

Vídeó (embedded video) er t.d. frá Youtube sett inn með svona skipun:

{{#ev:youtube|vídeónúmer}}

 

Krossaprófsspurningar   er settar inn með einfaldri skipun (sjá dæmi, + fyrir framan rétt svar)

Hér er dæmi um hvernig ég setti inn fyrstu spurningu, allar eru svo eins upp byggðar

 

<quiz>

{Spurning Hverjir stunduðu fálkaveiðar?

|type="()"}

- hansakaupmenn

+ konungur og aðalsmenn

- tyrkneskir sjóræningar

- bændur sem bjuggu í grennd við fálka

..... svo koma eins margar spurningar og maður vill .....

</quiz>

 

Þetta er miklu einfaldara en að nota önnur vefsmíðaverkfæri.

Það má sjá hvernig þetta þetta kemur út á þessari wikisíðu hjá mér:

http://www.esjan.net/wiki/index.php?title=Rj%C3%BApur_og_f%C3%A1lkar

 

Wiki er ótrúlega flott tækni, það má geta þess að hönnuður fyrsta wikikerfis hafði bakgrunn í kerfinu Hypercard frá Apple. Miklar vonir voru bundnar við það kerfi en þær gengu nú ekki eftir. Það er nú samt þannig að góðar hugmyndir lifa áfram og þróast og koma fram á öðruvísi hátt í öðrum umhverfum seinna.

Tæknin breytir landslagi samskipta okkar. Þeir sem nota wikikerfi og eru vanir að vinna í þannig umhverfi skipuleggja t.d. ráðstefnur öðruvísi. Það gegnur allt út á svona spuna á wiki, helst engin dagskrá fyrirfram og þetta er meira segja kallað "unconference".

Wiki er "disruptive technology" eða byltingartækni sem hefur þegar haft mikil áhrif á vinnubrögð á vef. 

Vefhýsing fátæka mannsins.. á linux

Ég er búin að vera núna í marga klukkutíma að baxa við að uppfæra Mediawiki vef sem ég er með til ýmissa tilrauna. Ég er með  lén og tilheyrandi vefsvæði á dreamhost.com vegna þess að það er svo ódýrt og þó aðallega vegna þess að þeir bjóða upp á það sem þeir kalla "one click installs".

Dreamhost er reyndar ekki með fantastico  og cpanel sem er innsetningarbúnaður sem margir vefhýsingaraðilar bjóða. Fantastico er mjög flott og afar einfalt að setja inn forrit, það er mjög einfalt t.d. að setja upp wordpress blogg þar eða moodle  vefi.  En því miður er Mediawiki ekki meðal forritana sem eru í Fantastico pakkanum og því valdi ég Dreamhost vegna þess að það á sem sagt að vera hægt að setja upp Mediawiki með einum músasmelli.Það er reyndar ekki erfitt að setja upp Mediawiki en það þarf alltaf öðru hverju að uppfæra forritin og ég var að uppfæra í dag. Þá krassaði allt og ég fann ekki út úr hvað hefði gerst þannig að ég setti inn svona hjálparmiðabeiðni í notendaþjónustu Dreamhost.

Ég fékk strax svar, þar sem stóð að það þyrfti alltaf að keyra eitthvað uppsetningardæmi þegar uppfært væri og ég yrði líka að passa að hafa sett upp php 5 ekki php 4. Ég var búin að því, ég var búin að lesa mér til um það. Svo stóð að ég ætti að fara í skeljaraðgang og skrifa inn einhverja skipun. Ég fann út úr því hvernig ég færi í þennan skeljaaðgang og hlóð niður einhverju telnet forriti Puffy til þess, komst inn og sló inn skipunina. Það gekk ekki. Svo ég skrifaði aftur. Fékk svar aftur um að prófa eitthvað annað, ég gerði það, virkaði ekki og ég skrifaði aftur út, fékk þá  að það væri hægt að velja um tvær skipanir og ég ætti að prófa að slá inn eitthvað svona:

/usr/local/php5/bin/php

/home/vefslodnet/vefslod.net/wiki/maintenance/update.php

Ég gerði það og  þetta virkaði ekki, ég skrifaði aftur til baka og sagði frá því og þá prófaði hinn það sjálfur og það gekk  og það kom bréf frá honum að þetta hefði gengið  og það yrði allt að vera í einni línu. 

Hmmm... ef þetta er dæmi um one click installs þá... Tæknimaðurinn sem ég var í bréfaskiptum við í dag virtist gefa sér að ég fyndi það á mér að einhver langloka sem hann skrifar í bréfi í tveimur línum ætti að setjast saman í eina línu. Þetta er líka dæmi sem skýrir út hvers vegna ég er komin yfir í þennan linux heim, hann er stundum svona eins og þetta dæmi. 

Annars talandi um Mediawiki þá er það sama kerfið og Wikipedia keyrir á og er bara ansi þjált wikikerfi, alla vega fyrir okkur sem erum orðin vön kerfinu. Allt á íslensku og mikið framþróun í því því að margt af fólkinu sem skrifar og setur upp wikipedia vinnur í framþróun Mediawiki. Það er auðvitað opinn hugbúnaður svo hver sem er getur tekið hann og notað.  Svo er ég búin að kynna mér að það er hægt að fá alls konar viðbætur t.d. til að hægt sé að spila youtube videó og hafa gagnvirk próf og ég er að reyna að setja það inn.

Hér er eru nokkrar spurningar sem ég gerði sem dæmi um prófaviðbótina sem hægt er að fá  á Mediawiki og hér er dæmi um viðbót til að setja vídeó inn á mediawiki. það er líka hægt að sækja sér viðbót til að krakkar geti teiknað saman eina mynd.

Það er reyndar pirrandi að kunna ekki sjálf nógu mikið í þessu php/linux uppsetningarmálum og þurfa að vera háð tæknifólki um það. Það virkar ekki vel og ég ætla því að finna sjálf út úr því hvað þarf að gera. 

Það er ekki nóg að það sé auðvelt að setja forrit upp í fyrsta skipti, það er mjög mikils virði að það sé auðvelt að uppfæra þau, það er nú einmitt meira í húfi því þá eru kannski komin mikilvæg gögn í gagnagrunn sem vera að virka og vera aðgengileg í nýju uppfærslunni. 

Flestar ókeypis vefhýsingar eru geymdar erlendis, einhvers staðar þar sem hýsing er ódýr. Þetta vefhotel.com sem bauð íslenska vefhýsingu var bara eitt svoleiðis dæmi, svoleiðis vefþjónustur eru gjarnan hýstar af stórum aðilum eins og dreamhost.

Það er ódýrt fyrir marga aðila að slá saman og vera með vef t.d. hjá dreamhost. Það má hafa mörg lén á hverju svæði þar og fyrsta lénið er frítt en næstu kosta svona 6 til 10 dollara á ári þannig að það er hverfandi kostnaður að vera með sitt  eigið .net lén á dreamhost. 

Ódýrar vefhýsingar eru t.d.

http://www.dreamhost.com 

http://www.site5.com/ 

http://www.mediatemple.net

 Það kostar mig ekki nema um 500 krónur íslenskar á mánuði að hafa svæði á Dreamhost þar sem ég get núna geymt allt að  250 Gígabyte. Sú heimild stækkar með hverri viku. Ég var reyndar að taka eftir að ég er ekki að nota nema 2% af því plássi sem ég má nota. Ég má setja upp eins marga Mysql gagnagrunna eins og ég vil, eins mörg lén og ég vil og ég get sett upp ftp aðgang.

Svo ef maður er blankur og vill ekki borga neitt fyrir vefhýsingu þá er hægt að fá ókeypis vefsvæði víða. Það er hægt að setja upp flotta vefi án auglýsinga á googlepages og svo er líka hægt að fá ókeypis vefsíður á http://www.freewebs.com/  og ókeypis wiki t.d.  á  PBwiki.com og  wikidot.com

Ef maður þarf bara geymslustað fyrir stafræna draslið sitt þá er hægt að koma sér upp geymslu á Box.net  það er ókeypis alla vega 1 GB og kostar ekki mikið að stækka svæðið.

Það er  oftast betra fyrir leikmenn að notfæra sér vefþjónustur sem bjóða upp á tæki til að setja upp sjálfvirkt þannig að maður þarf ekki að hafa neinar áhyggjur af uppsetningu.  En þá hefur maður líka minna frelsi til að aðlaga umhverfið. Sérstaklega bagalegt er að þá er umhverfið yfirleitt á ensku og ekki hægt að íslenska.

 

Það er reyndar mjög áhugaverð grein um vefhýsingar á http://news.netcraft.com/ 

Þar má sjá að markaðshlutdeild Microsoft vefþjóna er að aukast

 

 

 

Hausahettur, nýjasta götutískan

Smart þessar hettupeysur frá headhoods.com.

Mörg dýr eru í  einhvers konar dulbúning annað hvort til að felast eða til hræða eða villa fyrir andstæðingum sínum. Fiðrildi hafa stundum bletti á vængjunum sem líta út eins og augu og þá skýringu heyrði ég að það væri til að hræða önnur dýr sem héldu þá að þarna væri miklu stærra dýr á ferð.

Ég las einhvers staðar að indjánar teiknuðu stundum andlit aftan á föt og það virkar þrælvel, ég var einu sinni á ferð bíl í rökkri í eyðimerkum Nýju Mexíkó þar sem við allt í einu sáum tvær geimverur koma á móti okkur þarna í auðninni, þær voru eins og ég hef nú alltaf ímyndað mér að geimverur líta út, svona risastórt höfuð og litlir fætur. Ég stalst til að líta á bakhliðina á geimverunum þegar við brunuðum framhjá þeim og sá þá að þetta voru tveir indjánakrakkar, bakhliðin á úlpunum þeirra voru með stór teiknuð andlit.

Það er nú einn angi af nútímanum að taka upp mismunandi gervi og hanna sjálfan sig. Það getur maður auðvitað gert einna best með fötum og hvað er að því að fá sér nýjan haus sem horfir í aðra átt en maður sjálfur? 

Húrra fyrir opnum aðgangi á vefbækur.is !

Það er frábært að íslenskir nemendur hafi núna aðgang að efninu á vefbækur.is

Það er miklu mikilvægara að nemendur hafi aðgang að efni á stafrænu formi heldur en að námsbókum. Við erum að fara inn í þann tíma að flestir nemendur eru nettengdir og sjálf tölvan kostar ekki mikið. Þannig er verkefni eins og  OLPC (one laptop per child  eða ein fartölva fyrir hvern nemanda) að vinna að því að börn í fátækari samfélögum hafi öll vefaðgang og eigin tölvu.  Það getur ekki verið mikið mál fyrir okkur í einu ríkasta landi heims að bjóða sams konar aðstæður fyrir íslensk börn og ungmenni. Reykjavík niðurgreiðir tómstundir barna um 12. þús á önn,  OLPC fartölvur eru hins vegar núna að komast undir $100 svo það  kostar kannski bráðum ekki nema um 7 þús á barn að kaupa fartölvur og slík tæki duga amk þrjú ár - þá er nú líklegt að tækninni hafi fleygt svo fram að tölva sem er fín í dag sé orðin úrelt.

Ég og nemendur mínir höfum verið að vinna í íslenskum wikibókum (is.wikibooks.org), það er líka efni sem er frítt fyrir alla og hver sem er getur skrifað þar námsefni og það má afrita að vild og breyta og aðlaga. Sem dæmi má nefna wikibók um listdanskennslu og hér námsefni um hvít blóðkorn og  námsefni um listamenn í Hveragerði og námsefni um vita á Íslandi.

Ég held að það sé miklu betra að skrifa námsefni í svoleiðis kerfi, kerfi þar sem auðvelt er fyrir aðra að taka upp þráðinn og bæta við efni og byggja á vinnu annarra.

Við verðum líka að fara að venja okkur af þeim hugsunarhætti að námsefni sé eitthvað sem nemendur fá í hendur og sem þeir eiga bara að skoða. Nemendur eiga líka að taka þátt í að skapa og endurskapa og endurraða efni - það má kannski líkja þessu við remix í tónlistinni, nemandinn þarf að draga að sér efni úr ýmsum áttum og setja það saman í eigin verk.

Námsefni í svoleiðis námsumhverfi verður að vera algjörlega opið, ekki aðeins opið til að nemendur geti skoðað það og afritað heldur líka opið til að nemendur geti  tætt það í sundur og notað einingar úr því í eigin verk. Því miður eru þau höfundarlög sem við búum við í dag ekki að taka mið af þeirri þróun sem núna er í netheimum.

Það er þó þannig að núna eru að þróast alveg ný höfundarréttarkerfi sem styðja betur vinnubrögð nútímans og næstu framtíðar. Ég mæli með að fólk kynni sér creative commons og hvernig eigi að leita að efni þar. Ég er einmitt með wikibók í smíðum um höfundarrétt og Internetið.

Takk fyrir þennan opna aðgang að vefbækur.is og vonandi kemur meira opið efni á Netið og vonandi verður það efni sem er opið, sem má afrita og kannski allra, allra mikilvægast að það sé efni sem nota má sem efnivið í önnur verk t.d. verk nemenda. 

Íslenskir námsmenn fá aðgang að bókum á vefnum

Jesúsbrandari Símans er þaulhugsuð auglýsing

Auglýsingaherferð Símans eru hönnuð af atvinnumönnum sem væntanlega fylgjast vel með hvaða viðbrögð auglýsingar vekja og hafa vakið hérlendis og erlendis. Auglýsing sem nær að skapa umtal og fangar athygli almennings svo mikið að það sé talað um hana hittir í mark. Það er sennilega ekki markmið auglýsenda að vekja andúð stórra og valdamikilla hópa en sumar auglýsingar m.a. auglýsingar sem beint er til ungs fólks eða karlmanna eru þannig að það er óbeint eða beint verið að gera lítið úr öðrum t.d. eldra fólki með hefðbundin lífsgildi og konum. Þannig er það markmið auglýsandans að hitta betur í mark hjá viðtakendum beinlínis með því að gera lítið úr öðrum. 

Auglýsingar og markaðssetning af þessum toga er t.d. súkkulaðið  Yorkie frá stórfyrirtækinu Nestle, hér er mynd af hvernig það er markaðsett, það er sérstaklega tekið fram að þetta sé ekki vara fyrir stelpur og margt í markaðssetningu gengur beinlínis út á að móðga stelpur og höfða þannig til unglingspilta sem finna til vanmáttar síns í heimi þar sem karlmennskugildi gærdagsins eru ekki mikils virði lengur.

 Það er alveg sams konar markaðssetning í jesúauglýsingu Símans, hún endurspeglar það viðhorf að allt í lagi sé að grínast með trúna því auglýsingunni er ekki beint að trúuðu fólki heldur að fólki sem sækist eftir tækninýjungum í símtækjum og vestrænu fólki sem er ekki sátt við hvernig strangtrúarmúslimar hafa ibbað sig út úr margs konar teikningum af spámanninum Múhammeð. Þessi auglýsing frá Símanum er einmitt spuni í kringum það, hún segir "Sjáðu, ég þori alveg að gera grín af Jesú, ég er enginn strangtrúarmúslími, ég er frjálslyndur Vesturlandamaður sem notar nýjustu samskiptatækni". 

Þessi auglýsing talar til viðtakenda með því að gera lítið úr  strangtrúar- og bókstafstrúarfólki. Sennilega hefði svona auglýsing aldrei komið frá Símanum nema bara út af því sem undan hefur gengið varðandi þessi skopmyndateiknaramál af Múhammeð. 

Auglýsingin segir: "Við erum ekki eins og þeir sem við óttumst mest, við erum ekki brjálaður og blóðþyrstur skríll sem vill drepa þá sem gera grín af spámanninum,  nei við erum frjálslyndir og nútímalegir í stuði með Guði og gerum grín að okkar spámanni Jesú". 

Þessi auglýsing stuðar mig ekki nema að því leyti að hún kemur frá stóru fyrirtæki sem þjónustar allt landið og alla landsmenn. Samt vogar það fyrirtæki sér að móðga og særa að vísvitandi ákveðinn hluta landsmanna. Svona auglýsing myndi aldrei hafa komið frá Símanum meðan það var ríkisfyrirtæki. Núna er þetta einkafyrirtæki sem vílar ekki fyrir sér að móðga suma til að selja öðrum.

En lifi tjáningarfrelsið og megi fólk um allan heim gera grín að því sem það vill. Hins vegar ættum við sem sjáum eitthvað athugavert við grínið og lesum milli línanna að láta í okkur heyra og mótmæla harðlega ef okkur finnst auglýsingarnar siðlausar. Við verðum samt að passa okkur að mótmæla ekki á þann hátt að við auglýsum upp vöruna sem sá sem er með siðlausa auglýsingu er að falbjóða.

Hér er umræða um sams konar auglýsingu sem olli styrr í Noregi. Þar var m.a. skrípó sem auglýsti handáburð fyrir Jesú á krossinum. Vonandi verður ástandið ekki svona hjá okkur í framtíðinni! 

Biskup segir nýja auglýsingu Símans smekklausa