Hryllingur... myndefnasía ríkislögreglustjóra

Ég vil hvetja allt áhugafólk um netfrelsi og ferðafrelsi okkar á Internetinu til að mótmæla af alefli þessum fyrirætlunum um að koma upp einhvers konar netlögreglu til að ritskoða og vakta efni á Internetinu með einhverju sem þeir kalla "síu á myndefni til að koma í veg fyrir dreifingu á myndum sem tengjast barnaklámi og öðru ofbeldi gegn börnum", sjá meðfylgjandi frétt sem núna er á ruv.is. 

 

Fólk verður að átta sig á að allar síur og blokkeringar og hleranir sem settar eru á ferðir okkar á Internetinu eru eins miklar hindranir eins og götutálmanir og hleranir á opinberum og lokuðum rýmum í daglega lífinu. Það kann að þjóna almannahagsmunum að hafa eftirlitsmyndavélar á stöðum þar sem fólk hefur orðið fyrir árásum t.d. á svæðum í miðbænum þar sem eru margir barir og mikið af ölvuðu og æstu fólki safnast saman. Það  kann að þjóna líka hagsmunum viðskiptavina banka að það séu eftirlitsmyndavélar við hraðbanka, það fælir hugsanlega frá árásarmenn og gerir auðveldara að upplýsa afbrot. En myndum við sætta okkur við að það væri settur upp hlerunarbúnaður til hlusta á allar samræður okkar á torgum og kaffihúsum og það væri skannað í gegnum allar bækur sem við keyptum til að tryggja að þar væru ekki ósæmilegar myndir og að allir jólapakkar sem sendir væru í pósti væru opnaðir og skoðaðir til að athuga hvort það væri eitthvað ósæmilegt myndefni.  Svona ritskoðun á myndefni er reyndar  praktíseruð víða, ekki síst í strangtrúarríkjum Múslíma og þar voru Talíbanar fremstir í flokki. Það er skemmtileg frásögn af því í bókinni Bóksalinn í Kabúl hvernig Talibanarnir sem voru flestir ólæsir og óskrifandi komu í bókabúðina til að leita að bókum með myndskreytingum til að brenna, þeir höfðu bannað allar myndskreytingar. Bóksalinn úrráðagóði og slægi sem hafði lifað margar ógnarstjórnir fann alveg ráð við Talíbönum, hann bara límdi bókstafi yfir myndirnar og bókin hefst einmitt á því þegar bóksalinn er að plokka límmiðana af myndunum því Talibanarnir hafa verið hraktir frá völdum. 

 

Alveg eins og bóksalinn í Kabúl fann alveg ráð til að dreifa bókum með myndefni þrátt fyrir bann og eftirlit Talibana þá munu þeir sem vilja dreifa myndefni á ólöglegan hátt finna leið til að fara framhjá tilvonandi myndefnasíu ríkislögreglustjóra. Þeir munu sennilega nota aðeins flóknari aðferðir en að líma stafi yfir myndirnar en í hinum stafræna heimi þá eru margar aðferðir til dulkóðunar og margar aðferðir til að brjóta upp stafræna höfundarréttarlása. 

 

Það er ekki af samúð með þeim sem dreifa ógeðslegu klámefni sem ég vara eindregið við svona myndbandasíu ríkislögreglustjóra. Ég hef sjálf í mörg ár barist fyrir vakningu á þessu sviði, vakningu á því að á Netinu var veröld botnlausrar kvenfyrirlitningar og virðingarleysis fyrir manneskjum, mannfyrirlitningu sem endurspeglaðist hvað best í daglegu safni ógeðslegra klámtengla hjá vinsælum íslenskum unglingavefsetrum eins og tilveran.is og batman.is (sem núna heitir b2.is) og 69.is (sem er rekið af sömu aðilum og reka vinsælan leikjavef fyrir krakka og vísa gjarnan vefsvæðin milli hvers annars). Ég hef einnig sjálf nokkrum sinnum sent ábendingu um meint barnaklám til barnaheilla, ef ég man rétt á var það í flestum tilvikum vegna myndfnis sem bent var á af b2.is og voru það myndir af íslenskum börnum. Þess má geta að vefurinn b2.is var á tímabili og er hugsanlega ennþá rekinn í tengslum og einhvers konar samkrulli við félag frjálshyggjumanna amk voru vefirnir skráðir af sama aðila og á sama stað, Friðbjörn Orri Ketilsson var skráður fyrir báðum lénum.  Það er sjálfsagt að beina spjótum að þeim aðilum sem senda út, benda á eða stuðla að dreifingu á ógeðslegu klámefni og það er sjálfsagt að banna og hafa einhvers konar eftirlit og siðareglur um að ekki megi vera með  slíkt efni t.d. í vefumhverfi skóla og fyrirtækja og stofnana og viðkomandi aðilar sjái um það eftirlit og ákveði viðurlög.

 

En það er stórhættulegt og liður í því að byggja hér upp lögregluríki og eyðileggja flæði þekkingar á Internetinu ef það verður háð einhverju sérstöku eftirliti allt efni sem flæðir hingað um Netið. Svona myndbandasíur og blokkeringar og tálmar undir merki baráttu gegn barnaklámi munu ekki gera annað en gera ferðir okkar sem notum Netið í þekkingarleit og þekkingarsköpun miklu, miklu erfiðari. 

 

Svo ég taki dæmi sem ég þekki vel þ.e. háskólaumhverfið.  Þar eru að sjálfsögðu strangar reglur um hvað má og hvað má ekki, sérstaklega eru þær reglur strangar til að tryggja að ekki berist tölvuvírusar um kerfið og að þar séu bara uppsett á vélum tölvuforrit sem leyfi er fyrir. Þess vegna geta notendur í tölvuverum  ekki hlaðið neinun hugbúnaði  niður og það er lokað fyrir flest sem ekki hefur verið opnað sérstaklega fyrir. Flestir háskólar eru með alls konar síur um hvað má og hvað má ekki á neti skólanna. Þetta er orðið svo óþægilegt og hamlandi í því netumhverfi sem við búum í og við sem vinnum í svona umhverfi (ég er ekki að tala um Ísland sérstaklega, þetta er sama sagan sem kollegar mínir segja hvar í heiminum sem þeir eru) grínumst stundum með það að versti staðurinn til að nota eitthvað nýjungar í netumhverfi (t.d. ýmis web 2.0 verkfæri) sé tölvuver skólanna. Sem er dáldið fyndið vegna þess að þau tölvuver voru beinlínis sett upp til að kenna nemendum á  og þjálfa nýja tækni.

 

Ég vara við því hve allar blokkeringar og hindranir á ferðum fólks í netheimum hafa hamlandi áhrif á flæði þekkingar, sama í hvað göfugum tilgangi þær eru gerðar. Tálmanir sem gerðar eru til að uppræta barnaklám geta haft stórkostlega hamlandi áhrif á netumferð annarra sem eru að nota netið til að skapa þekkingu og í ýmis konar stafrænni framleiðslu.

 

Það er furðulegt að það skuli vera svona mikill skilningur á því að það þurfi að tryggja frjálst flæði peninga í einhvers konar frjálshyggjuæði en menn skuli ekki átta sig á því að margar sömu röksemdir eru varðandi frjálst flæði stafrænnar þekkingar og ýmis konar stafrænna samskipta.

 

Það eru margar til að ráðast á og minnka umfang óæskilegs og siðspillandi efnis á Internetinu en myndefnasía á vegum ríkislögreglustjóra er ein af alverstu leiðum sem ég sé til þess.

 

Fyrst birt: 29.11.2007 08:58

 

Síðast uppfært: 29.11.2007 09:02

Vilja koma upp myndefnasíu á netinu

Embætti ríkislögreglustjóra vinnur að því, í samvinnu við aðra, að koma upp síu á myndefni sem dreift er á netinu til að koma í veg fyrir dreifingu á myndum sem tengjast barnaklámi og öðru ofbeldi gegn börnum.

Þetta kom fram í máli Björns Bjarnasonar dómsmálaráðherra á Alþingi í gær. Steingrímur J Sigfússon, formaður vinstri grænna, spurði Björn hvort til greina kæmi að beita forvirkum aðferðum gegn barnaníðingum og öðrum sem nota netið í glæpsamlegum tilgangi. Björn sagði að tryggja þyrfti örugg samskipti á þessu sviði sem öðrum.

 

Ríkislögreglustjóri mun jafnframt næsta haust taka við rekstri ábendingalínu sem Barnaheill komu á fót. Þar er hægt að koma á framfæri upplýsingum um ólöglegt efni.

Loks er til skoðunar að koma upp eins konar rauðum hnappi sem nota má til að tilkynna lögreglu um óeðlileg samskipti á netinu.

Tæknin gerir hleranir erfiðari

Hmmm...getur vélin lent? Hótelárás í Manila

Mér líst ekkert allt of vel á þessa veðurspá fyrir kvöldið. Ég fer með vél frá Kaupmannahöfn kl. 20:30 til Keflavíkur. Ég er ekkert alltof hrifin af því að lenda á Íslandi í brjáluðu veðri.

Ég er sem sagt hérna núna í miðbæ Kaupmannahafnar að tékka á fréttunum og þessi stormfrétt er aðalfréttin á mbl.is. Ég fór nú reyndar á mbl.is til að tékka á því hvað væri að gerast í hótelárásinni á Manila á Filipseyjum , CNN er með stanslausar fréttir af því en hvorki mbl.is eða ruv.is virðast finnast þetta fréttnæmt.

Skrýtið.

CNN frétt um Manila hótelárásina 

Ég var ekki fyrr búin að skrifa bloggið fyrir ofan en það er komin frétt um hótelárásina á mbl.is. Þeir hljóta að lesa bloggið mitt

Varað við stormi

Bloggfréttatími Salvarar - Fyrsti þáttur - Kauptu ekkert dagurinn

Það var svo hrikalega óspennandi efni í fréttum í dag á Íslandi að ég ákvað bara að setja í loftið minn eigin fréttatíma. Ég bjó mér til rás á ustream.tv og sendi út þátt þar. Það var enginn áhorfandi að þessum fyrsta fréttatíma mínum þar en sem betur fer fyrir heiminn og íslenska moggabloggsamfélagið þá gat ég smellt á upptöku og tekið þetta upp. hérna er sem sagt hægt að horfa á þáttinn. 

Það eru betri hljóðgæði í ustream.tv en í öðrum kerfum sem ég hef verið að prófa. Myndgæðin eru nú ekkert sérstök, ég á eftir að athuga hvort ég geti stillt þau betur. Þessi þáttur er um 8. mínútur.

Lögbýli með greiðslumark í mjólk

Árið 2006 voru 796 lögbýli með greiðslumark í mjólk  og  1601 sauðfjárbú. Áhugavert. Það áhugaverðasta sem gerst hefur í íslensku þjóðlífi undanfarna daga ef mbl.is er góð heimild um það fréttnæma í samfélaginu. Forsíðufréttin í augnablikinu er ekki beint  að kveikja  í mér áhuga til að blogga. Hún er svona:

Ísfélag Vestmannaeyja hf. og Fjárfestingafélagið Kristinn ehf. í Vestmannaeyjum hafa undirritað samning um kauprétt á öllum hlutum félaganna í eigu bræðranna Guðmundar og Hjálmars Kristjánssona í Vinnslustöðinni í Vestmannaeyjum. Um er að ræða tæplega þriðjungshlut í Vinnslustöðinni. 

Það var nú heldur ekkert nýtt í frétt nr. 2  Konur vinna enn flest húsverkin
Ég hefði nú getað sagt mér það sjálf.

Frétt nr. 3 um að nýbúar hafi komið á kynningu á íslenskum jólasiðum á bókasafnið í Reykjanesbæ er ekki heldur beint að kveikja áhuga. Nýbúar bragða á íslenskum jólum

Bless. Ég er farin aftur að nördast inn í myrkviðinu í netheimum.

 

 

 

 

 

Lögbýli verða stöðugt færri og stærri

Jarðskjálfti í kennslustund

Ég var með tíma síðdegis í dag kl. 17:30-18:00 þegar einn nemandinn sagði okkur frá því að núna væri jarðskjálfti. Það er svo sem ekki í frásögur færandi, ég man eftir að það hafi áður komið fyrir í kennslustund hjá mér að þá hafi jarðskjálfti dunið yfir og allt gengið í bylgjum.  En það sem var öðruvísi í þessum tíma var að það var aðeins einn nemendanna sem fann jarðskjálftann og sagði okkur frá honum. Þessi nemandi var nefnilega staddur á Selfossi en hinir nemendurnir voru annars staðar á landinu. Hún var með vefmyndavél en við sáum nú samt ekki jarðskjálftann í beinni.  Núna síðustu daga hef ég verið að prófa með nemendum netfundi með kerfum eins og operator11.com  og mogulus.com og stickam.com, það er sennilegt að fjarkennsluumhverfi sem okkur býðst í náinni framtíð verði svona. Allir nemendurnir og kennarinn eru með vefmyndavél og það er hægt að svissa á milli. Kennarinn eða sá sem stjórnar útsendingunni gerir það. Bæði stjórnandinn og þeir sem taka þátt í fundinum geta hlaðið inn vídeóum til að spila. Svo er textaspjall fyrir neðan útsendingargluggann.

Í gær þá prófaði ég í fyrsta skipti að vera með beina útsendingu á moggablogginu mínu. Ég gerði það í kerfinu mogulus.com. Þar getur maður verið með sína eigin sjónvarpútsendingu, kannski er nú betra að kalla það netvarp. Mér virðist svona kerfi eins og þessar beinu útsendingar nýtast til ýmissa hluta, líka í viðfangsefni sem okkur hefur ekki dottið í hug ennþá. Það má líkja þessu við að með því að líma svona útsendingarglugga inn á bloggið okkar séum við að setja upp skráargöt sem við getum kíkt inn í ýmsar vistarverur í heiminum. Það er auðvitað möguleiki á alls konar rafrænni vöktun á þennan hátt. Það þarf ekki alltaf að vera neikvætt, það væri fínt að hafa myndavélaútsendingar víða t.d. til að fylgjast með jarðskjálfum. Ég hugsa að ég myndi fylgjast öðru hverju með myndavélum á Selfossi ef það væri bein útsending þar. Það eru nú margir staðir á Íslandi með vefmyndavélar. En hvernig virkar svona stafrænn Infrastrúktúr þegar náttúruhamfarir verða? 

Ég set við þetta blogg skjámynd af stjórnborðinu í Mogulus þar sem ég sést hringja heim til að biðja dóttur mína að athuga bloggið hjá mér, hvort hún sæi beina útsendingu og hún sá það. Reyndar var ég hljóðlaus til að byrja með en svo tókst mér að fá talið með. Svo er hérna til hliðar hvernig þetta leit út á blogginu, þarna er ég á skrifstofunni minni að senda út á moggabloggið mitt.

Hmmm... ég ætti að fara að senda út reglulega svona bloggfréttir. 

Áframhaldandi skjálftar við Selfoss

Torrent lokunin og CreativeCommons

Það er aðeins ein lausn í sjónmáli á þessum átakapunktum gamallar lesmenningar og nýrrar les- og skrif- menningar og hún er sú að fleiri og fleiri taki upp höfundarleyfi eins og Creative Commons og dreifingarstaðir eins og torrent.is séu eingöngu með efni sem fylgir slíku höfundarleyfi. Sennilega fækkar og fækkar þeim sem ætla sér bara að hlusta óvirkir á eitthvað efni, fólk vill vinna áfram með efni, umbreyta því og senda það áfram. Svipað og við gerum við orð. 

Það eru núna tveir andstæðir pólar í höfunarréttarmálium, annars vegar múgur sem virðir ekki lög og reglur samfélagsins og brýtur höfundarréttarlög með því að dreifa og fjölfalda efni á netinu. Hins vegar gæslumenn hagsmuna höfundarrétthafa sem eru að verja kerfi  sem eru verulega hamlandi fyrir skapandi starf á Internetinu.

Höfundarréttarumhverfi sem við búum við í dag er miðað við aðra notkun en er á Internetinu  í dag. Við verðum samt að virða lögin og við verðum að vinna að því að breyta leikreglunum þannig að þær séu meira í takt við tímann. CreativeCommons er ein lausn á þessu knýjandi vandamáli.

Lögbannskrafa tekin til greina og Torrent vefnum lokað

Salvör í Mogulus

Ég var hérna með tengingu í beina úsendingu í mogulus.com en ég tók hana út því ég er búin með þessa tilraun. Þetta hægði á allri vinnslu.
En ég sem sagt sendi beint út úr mogulus.com á bloggið mitt.

Internetmessa á sunnudegi

Auðvitað ætti ég að fara alltaf á sunnudögum í messu í Laugarneskirkju, ég sé kirkjuturninn út um eldhúsgluggann hjá mér, ég var fermd í þessari kirkju og hef búið mestan minn aldur í þessu hverfi, mér finnst vænt um kirkjuna hérna og veit að þar er unnið gott starf.

En af því ég er algjör netfíkill þá sæki ég mínar messur á Internetið og ég er ekkert sértstaklega upptekin af því hvort messurnar eru auglýstar sem trúarathafnir. Ég er núna að hlusta á messu hjá Larry Lessig. Hann er minn æðstiprestur í netheimum. Ég er búin að hlusta þrisvar sinnum á messuna og á eftir að hlusta á hana oft aftur, Larry Lessig er svo seiðandi og orð hans eru svo áhrifarík. Það væri mikil blessun fyrir heiminn ef sem flestir hlustuðu á Lessig og frelsuðust.

Þessi messa hjá Lessig er vídeó sem er tuttugu mínútur í spilun og heitir

How creativity is being strangled by the law

 

 

 

 

Raddþræðir

Ég er að prófa nýja græju hjá voicethread.com  þar  getur  maður  skráð sig  inn (það er ókeypis) og byrjað að  taka sjálfa sig upp. Það er líka hægt að hlaða inn myndum og ég hlóð inn tveimur myndum til að prófa það. Það á líka að vera hægt að hlaða inn vídeó en það virkaði nú ekki hjá mér.

Þessi græja er hugsun  til  nota  með  nemendur og fyrir kennara að ég held.  Krakkarnir geta  tekið upp sögurnar sínar.  Þetta  virðist  mjög  aðgengilegt  og  gæti  ekki  verið  einfaldara.

Það virkaði þrælvel að líma þetta inn á blogg strax í fyrstu atrennu. Það fer sjálfkrafa á næstu mynd þegar þetta spilast. Þetta kom hins vegar risastórt á  bloggið, best að prófa að setja þetta inn í minni útgáfu, best að velja "Put a small version on your site or blog":

 

 

Vonandi kemur þessi seinni í skaplegri stærð. Ég hugsa að sjálfgefna stærðin sé svona stór af því þetta er kerfi sem litlir krakkar geta unnið  og þau eru að segja sögur.

Þetta voicethread.com er dæmigert fyrir þau verkfæri eða netþjónustur sem nú spretta upp. Ef maður er með ókeypis skráningu þá  má maður mest geyma 75 mb og þrjá raddþræði og mest 30 mínútur af vídeó.

Ég rakst á þessa sniðugu græju þannig að á netnámskeiði sem ég er í Kanada þá voru þátttakendur beðnir að kynna sig þegar þeir byrjuðu námskeiðið með að taka upp eitthvað sem þeir sögðu og setja inn mynd.

Hérna fann ég svo dæmi um voicethread hjá notanda sem setti inn söguna sem litla stelpan hans talaði inn á.  Mér sýnist hægt að nota þetta með ungum börnum. 

 

 

 

Kínversk stjórnvöld og Falun Gong - Bandarísk stjórnvöld og Guantanamo, Íslensk stjórnvöld og vítisenglar

 

Við ættum að vita það á Íslandi hve viðkvæm kínversk stjórnvöld eru fyrir Falun Gong. Árið 2002 þegar varaforsetinn kínverski kom í opinbera heimsókn hingað þá var af og frá að hann þyldi einhverja gagnrýni eða mótmæli frá Falun Gong en þau samtök nota svona opinberar heimsóknir til að vekja athygli á  mannréttindabrotum gagnvart meðlimum samtakanna í Kína. Nú hafa kínversk stjórnvöld amast við heimildarmynd um Falun Gong og haft það upp úr krafsinu að Ríkissjónvarpið í Kanada hætti við að sýna heimildarmynd um samtökin.

Hvernig skyldi RÚV hegða sér við svipaðar aðstæður. Ég er ekki alltof bjartsýn, minnug þess að íslensk stjórnvöld fangelsuðu Falun Gong fólk við komuna til landsins árið 2002.

Svo brá við þegar Falun Gong fólkið kom í landið að það var sett í fangelsi í Njarðvík. Þetta er afar fátítt á Íslandi, fólk sem var með gild vegabréf til landsins og kom hingað í sumarfríinu sínu til að styðja á friðsamlegan hátt ákveðinn málstað var hneppt í fangelsi og sumum snúið frá landinu. Ég held að það hafi verið á grundvelli sama stjórnarskrárákvæðis  og varð til þess að  Vítisenglum var snúið frá landinu. Samkvæmt fréttum á þessum tíma þá réði lika miklu að íslensk stjórnvöld töldu sig ekki geta tryggt öryggi erlendra þjóðhöfðingja ef fjöldi mótmælenda streymdi til landsins. Mestu réði þá að kínversk stjórnvöld þoldu ekki á þessum tíma og þola sennilega ekki ennþá það sem við köllum lýðræðislega umræðu og tjáningarfrelsi - tjáningarfrelsi þeirra sem eru á móti einhverju eða telja sig vera órétti beitta.

Ég gat ekki mikið gert í þessu máli, eina sem ég gat var að fara til Njarðvíkur og reyna að fylgjast eins vel með þessu máli og ég gat sem almennur borgari. Ég tók myndir frá mótmælum við Njarðvíkurskóla (ég vann myndirnar þannig að mótmælendur þekktust ekki til að myndatakan ylli þeim ekki óþægindum í framtíðinni). Ég held að almennt hafi fólk á Íslandi verið mjög ósátt við hvernig komið var fram við gulklæddu Falun gong liðanna. Þetta leystist nú samt allt í friðsemd, þeir fengu að vera og settu svip á bæinn með skrýtnum leikfimisæfingum í nokkra daga. Ég skrifaði nokkur blogg um málið fyrir fimm árum:

Gongóblíða - gjörningaveður 

 Friðsamleg mótmæli við Narðvíkurskóla

Falun Gong í Njarðvíkurskóla 11. júní 2002

Falun Gong 

Það er mikilvægt að við pössum upp á mannréttindi, sérstaklega mannréttindi þeirra sem eiga undir högg að sækja og eru fyrirlitnir og smáðir af stjórnvöldum, sérstaklega þeirra sem eru hnepptir í fangelsi vegna skoðana sinna og vegna þess að stjórnvöld telja þá óæskilega. Það eru gífurlega mikilvæg mannréttindi að þeir sem eru settir í fangelsi njóti einhverra réttinda, alla vega þeirra réttinda að réttað sé í máli þeirra og þeir séu ákærðir og þeir viti hver glæpurinn er sem þeir eiga að hafa framið og fái tækifæri til að verja sig. Fangelsi án dóms og laga er einkenni á voðastjórn og alræðisríki. Núna í kvöld var ég að horfa á leikna heimildarmynd um Guantanamo fangabúðirnar. Ef það er satt sem kemur fram í þeirri mynd þá get ég ekki séð að bandarísk stjórnvöld sem eru ábyrg fyrir þeim fangabúðum séu neitt skárri en sú ógnarstjórn sem sendi fólk í Gulagið á sínum tíma.

Það sem ég hef kynnt mér um Falun Gong hefur nú eiginlega sannfært mig um að þetta eru skrýtin trúarbrögð og stórundarlegt að fólk heilt á geði aðhyllist þessa trúarstefnu. Það sem ég hef lesið um Vítisengla er alls ekki neitt gott, ég held að margir innan þeirra samtaka séu fólk sem ég hef ekki mikinn áhuga á að umgangast og það sem ég hef lesið um marga þeirra sem voru í fangageymslum Bandaríkjanna í Guantamo er að þar hafi verið margir hættulegir menn. Ég held að bresku fangarnir sem sögðu sögu sína í heimildarmyndinni hafi ekki verið neinir englar, einhverjir þeirra höfðu sakarferil í Bretlandi. 

En hvort sem það gulklæddur Falun Gong liði að iðka leikfimi til að ná sambandi við almættið og vekja athygli á ofsóknum kínverskra stjórnvalda, leðurbrynjaður og ógnvekjandi Vítisengill sem tætir um á mótorhjólatryllitæki og reynir að hræða fólk með útliti sínu og viðmóti eða skikkjuklæddur ofsatrúarmúslími sem heldur að hann eigi í heilögu stríði gegn spillingu okkar á Vesturlöndum - þá á allt þetta fólk rétt á mannréttindum, rétt á sömu mannréttindum og þeir sem okkur þykja skynsamir, hófsamir og stunda fagurt líferni.  

Hætt var við sýningu heimildarmyndar um Falun Gong