Holdsveikrahælið

Ég vann í gamla Kópavogshælinu einmitt í þessu húsi fyrir meira en þremur áratugum. Þá var  í kjallaranum mötuneyti Kópavogshælisins og ég vann þar í eldhúsinu hálfan daginn meðfram námi , ég var þá átján ára og í  menntaskóla. Þá var ennþá rekið holdsveikrahæli á efri hæð hússins, ég held að þá hafi aðeins verið þar ein fullorðin kona eftir og hún lifði í einangrun. Stúlka sem hugsaði um hana kom oft niður í eldhúsið til okkar, ég held að matur hafi verið sendur þaðan upp á hæðina. 

Holdsveiki og lækningahæli fyrir holdsveikissjúklinga eru afar áhugaverð, ekki aðeins varðandi sögu lækninga heldur líka varðandi útskúfun ákveðinna hópa úr samfélaginu og hvernig litið var á sjúklinga. Fyrstu ljósmyndir sem teknar voru af Íslendingum munu hafa verið af afskræmdum andlitum holdsveikissjúklinga. Ég hef reynt að skrifa á wikipedia um sögu holdsveikilækninga á Íslandi og sögu holdsveikraspítali og sögu þeirrar merkilegu stofnunar sem var  Holdsveikraspítalinn í Laugarnesi

Móðir mín og aðrar konur í Kópavogi reyndu mikið til að fá gamla Holdsveikrahælið sem handverkssafn. En á þeim tímum og ef til vill ennþá voru bæjaryfirvöld í Kópavogi mest að hugsa um að hlú að auðmönnum og "láta markaðinn ráða".  Nú hefur ísköld krumla hins frjálsa markaðar læst um okkur og kramið okkur.  Gamla holdveikrahælið í Kópavogi er hús á afar fallegum stað, hús með merkilega sögu. Sögu sem segir okkur heilmikið um samfélagið, um samfélag þar sem fólk var dregið í dilka, sumir einangraðir og útskúfaðir og sumum komið fyrir á stofnunum.

Það þarf ekki lengur holdsveikraspítala og það þarf ekki lengur að byggja sérstök hæli fyrir fólk með þroskahömlun. Allir eiga að fá að vera þátttakendur í samfélaginu en það er mikilvægt að hús með sögu eins og gamla Kópavogshælið á undrafögrum stað sé opið fyrir okkur öll og við getum fræðst um sögu þess og sögu þeirra sem komið var fyrir á þessum stað. Þegar breski herinn gerði innrás á Ísland þá tók hann fyrir sig flottasta húsið, húsið stóra og glæsta í Laugarnesi og þá voru hinir holdsveiku fluttir í Kópavog.

 

 

 

 

 

Gamla hælið grotnar niður

Kennitöluflakk í boði bankamálaráðherra,orkuauðlindir í umsjá iðnaðarráðherra

Er eðlilegt að íslenska ríkið velti yfir á okkur fólkið í landinu skuldum sem óreiðumenn söfnuðu í útlöndum, skuldum sem hugsanlega voru beinlínis liður í að kippa fótunum undan Íslandi, eins konar fjármálaárás en hegði sér í gegnum ríkisbanka eins og bavíana- og bananalýðveldi hér innanlands við þá sem eiga hérna kröfur  á þrotabú?  Á sama tíma og Gylfi Magnússon viðskiptaráðherra heldur því fram að Íslendingar verði að greiða skuldir sem við vissum ekki einu sinni að væru til þaðan af síður að almenningur á Íslendi ætti að borga þær þá leyfist  gjaldþrota fyrirtækjum á Íslandi að stunda kennitöluflakk. Er það svona lausnir sem við viljum sjá hjá fyrirtækjum og einstaklingum í greiðsluerfiðleikum? Er það þetta sem kallað er að skoða hvert einstakt fyrirtæki?

Þetta er haft eftir viðskiptaráðherra á ruv.is:

Gylfi Magnússon viðskiptaráðherra segir ómögulegt fyrir Ísland að neita að greiða skuldir sínar og hætta samstarfi við Alþjóðagjaldeyrissjóðinn eins og tveir erlendir hagfræðiprófessorar lögðu til í Silfri Egils í gær.

Hvers vegna telur viðskiptaráðherra svona mikilvægt að Ísland borgi skuldir sínar á sama tíma og hann leyfir mjög  undarlega viðskiptahætti einstakra fyrirtækja þar sem reksturinn er upp á náð og miskunn ríkisbanka kominn, sjá þessa frétt:

"Kaupþing tók rekstur Pennans yfir fyrir þremur vikum síðan, í fyrradag fór bankinn fram á gjaldþrotaskipti. Skiptastjóri var skipaður í gær og seint í gærkvöldi náðust samningar milli hans og bankans um stofnun nýja fyrirtækisins, sem heitir Penninn á Íslandi ehf."

Getur verið að núna rétt fyrir kosningar þá passi Kaupþing sig á því að loka ekki fyrirtæki sem þó virðist engan rekstrargrundvöll hafa vegna sligandi skulda og geri það með aðferðum sem mér vitanlega enginn hefur tengt við heiðarlega og trausta viðskiptahætti. Þvert á móti þá eru það mestu ribbaldar viðskipta sem skipta um kennitölur þegar allt er komið í hönk og opna sama reksturinn undir annarri kennitölu.  Af hverju er ekki hægt að koma hreint til verks og viðurkenna að hvorki einstaklingar né fyrirtæki  geta staðið undir þessu

Finnst viðskiptaráðherra allt í lagi að fyrirtæki sem starfar undir hans ábyrgð þ.e. Kaupþing skuli stofna gervifyrirtæki á nýrri kennitölu?  Áttar viðskiptaráðherra sig ekki á því hvaða ribbaldastjórnsýsla svona vinnubrögð eru á Íslandi og hversu hjákátlegt það er að segja að Ísland verði að borga skuldir sínar en skipa samt fyrirtækjum sem hann stýrir með óbeinum hætti að starfa undir nýrri kennitölu?

Er ekki heiðarlegra og eðlilegra að horfast í augu við vandamálið og sjá að hvorki fyrirtæki, einstaklingar né ríkið á Íslandi geta borgað þær skuldir sem einhverjir segja okkur að við séum allt í einu orðin ábyrg fyrir. Við stofnuðum ekki til þessarra skulda og þetta fé rann ekki til Íslands. Þetta var ein alsherjarhringavitleysa og bólupeningamaskína sem við eigum að neita að taka mark á.

Við eigum ekki að búa til eitthvað kennitöluflakk til að sprauta yfir vandamálið rétt fyrir kosningar. Við eigum að horfast í augu við vandamálið og taka á því og það er bara ein leið fær. Hún er sú að afskrifa hluta af skuldum einstaklinga, afskrifa hluta af skuldum fyrirtækja og afskrifa hluta af skuldum ríkisins. 

Við eigum ekki að skipta um kennitölu á íslenska ríkinu og kalla okkur eignarhaldsfélag Iceland group eða þess háttar. Við eigum að  neita að borga og viðurkenna að hvorki fyrirtæki, einstaklingar né íslenska ríkið ræður við að borga.

 

hér eru greinar um kennitöluflakkið:

DV.is - Frétt - Kennitöluflakk í boði Kaupþings

RÚV - Tryggja á óbreyttan rekstur Pennans

Vísir - Nýi Kaupþingsbankinn sakaður um sóðaleg vinnubrögð

 

Össur og auðlindirnar

Samfylkingin taldi  sóknarfæri að selja virkjanir hefur það eitthvað breyst? Ungstirnum Sjálfstæðisflokksins fannst það virðingarverð hugmynd

Össur olíufursti segir okkur að það sé misskilningur að orkuauðlindir verði teknar af okkur upp í skuld. Össur sem er óþreytandi að segja okkur hvað við verðum rík af olíunni ófundnu. En  er ekki hægt að taka meira mark á orðum Össurar en því sem stendur í lögum um fiskveiðar um að fiskveiðiauðlindin sé sameign íslensku þjóðarinnar. Hvernig stendur þá á því að það er búið að selja þessa auðlind í burtu frá okkur og enginn veit hver á kvótann núna ?

Helgi Hjörvar vonarstjarna Samfylkingarinnar er eins og Illugi Gunnarsson í dulargervi félagshyggju. Helgi skrifaði rétt fyrir hrunið nokkrar blaðagreinar þar sem hann vafði inn í fjálgleg orð einhvers konar aðgerðir um að steypa öllum orkuveitum í ríkiseigu í sérstakan sjóð, Helgi Hjörvar kallaði þetta "sjóð handa komandi kynslóðum" en allir sem einhverja innsýn hafa í fjármál og hagfræði sáu í gegnum þetta hjá Helga, sáu að hann var í besta falli einfalt ginningarfífl sem var látinn tala fyrir aðferðum sem klipptu í sundur sambandið á milli efnislegra eigna og efnislegra hluta og þeirra auðlinda og mannvirkja til að nýta þær. Helgi Hjörvar var einhvers konar Sjóðs9-Illugi í samfylkingaslikju. Fólk ætti að lesa núna aftur greinar Helga Hjörvars og spá í hvað Samfylkingin vildi gera og hvort þeim stjórnmálaflokki er treystandi fyrir auðlindum Íslands?

Ég hvet alla til að lesa greinarnar sem ég skrifaði um blekkingargang Helga Hjörvars Samfylkingamanns:

Að losa peninga - Raufarhafnarstemming hjá Helga Hjörvar - salvor ...

 Rétt fyrir Hrunið skrifaði ég þennan pistil um Össur Viðskiptasnilld Össurar

 

Best að enda með skemmtilegri skrípó um hvernig þetta verður allt þegar Ólína verður orðin félagsmálaráðherra:

Orkulindir ekki teknar upp í skuld

Álver? Er Alþingi málver misyndismanna?

Sjálfstæðismenn eru svo óforskammaðir að þeir telja að umræða um álver í Helguvík sé brýnni en að ræða möguleika til að breyta stjórnarskránni.  Ekki set ég mig neitt á móti álveri í Helguvík, það er hið besta mál að nýta slíka staði undir álver en ég er jafnmikið á móti því að planta álveri miðsvæðis í Hafnarfirði, það var hið mesta óráð og ég er Hafnfirðingum sem greiddu atkvæði gegn því  og felldu í atkvæðagreiðslu ævarandi þakklát. En að ræða álver núna og halda að núna sé í heiminum sóknarfæri í álverum sýnir að Sjálfstæðismenn á Alþingi  fylgjast ekkert með.  Mikið vildi ég að þeir hefðu lesið sér eitthvað til og fylgst með heimsmálunum undanfarin misseri, þá hefðum við ekki flotið svona sofandi að feigðarósi. Annað hvort er glæpur þeirra óhemju sofandaháttur og ekkert næmi á það sem gerist í umheiminum eða þá að þeir voru vísvitandi að blekkja okkur. Nema hvoru tveggja sé.

En hérna getur fólk fylgst með hvernig gengur hjá Century Aluminium Company, núna er gengið á hlut þar 3.72 . Í Apríl í fyrra þá var gengið um 70. Þetta fyrirtæki rambar á barmi gjaldþrots. Það sér hver maður sem vill horfast í augu við staðreyndir. Það eru akkúrat engar líkur á því að það verði ráðist í byggingu á einhverju álveri á næstu mánuðum. Það eru verulegar líkur á að fyrirtækið neyðist til að loka víðar, það hefur þegar lokað álverum, sjá hérna.

Ravenswood í Virginíu er ekki Hafnarfjörður en verkafólk í verksmiðjum þar og samfélagið þar á samúð mína. Við skulum átta okkur á því að víða um lönd eru stór og stöndug verksmiðjufyrirtæki að loka einfaldlega vegna þess að ástandið er hræðilegt, álverð  hefur fallið niður í 66 cent á pundið en var næstum þrisvar sinnum hærra fyrir minna en ári síðan.

Svo má minna á það að fyrir tilstuðlan Sjálfstæðismanna þeirra Geirs Haarde og Árna Matthíassens forsætisráðherra og fjármálaráðherra þá voru skuldabréf SToða keypt úr Sjóði 9 en þar var í stjórn Illugi Gunnarsson oddviti Sjálfstæðismanna í Reykjavík og er öll aðkoma hans að því máli mjög undarleg. Nú er líklegt að aðeins 5 % fáist upp í þessar kröfur. Ég bið alla sem kosið hafa Sjálfstæðisflokkinn að hugleiða hvort það sé hægt að treysta svona fólki sem vill vill ótt álhúða Ísland og kaupa verðlausa pappíra í sjóðum þar sem ungstirni Sjálfstæðisflokksins hafa öslað um þrátt fyrir að álvera uppbygging sé alveg út úr korti í dag vegna heimsástandsins og þrátt fyrir að forsætisráðherra og fjármálaráðherra hefði vel átt að vera kunnugt um hversu lélegir pappírar þessi skuldabréf SToða voru. En þeir blekktu okkur. En ætlar fólk að láta blekkja sig aftur í kosningunum í vor?

Dagskrártillaga felld

Hvers á fólkið í Kraganum að gjalda? Hvað gera formaður og varaformaður Sjálfstæðisflokksins?

Ég er með tilraunaútsendingu núna á rásinni
http://www.ustream.tv/channel/framsokn um þetta mál. Útsendingu lokið en hér er upptaka af henni:
Streaming Video by Ustream.TV
Eitt mikilvægasta atriðið í uppbyggingu Íslands er að tryggja hér gegnsærri stjórnarhætti og meira lýðræði. Framsóknarmenn hafa lagt áherslu á stjórnlagaþing og breytingar á stjórnarskrá en hvað gera Sjálfstæðismenn? Akkúrat núna þá reyna þeir að halda uppi málþófi að því er virðist eingöngu til að tefja fyrir að frumvarp um stjórnlagabreytingar nái í gegn. Þeir eru líka að tefja fyrir að þing endi og þingmenn geti einhent sér í kosningaundirbúning. Þetta náttúrulega er allt í lagi fyrir þau Þorgerði varaformann og Bjarna formann Sjálfstæðisflokksins. Sjálfstæðisflokkurinn hefur ekkert að vinna en öllu að tapa í næstu kosningum og svo eru þau Bjarni og Þorgerður Katrín ekki í neinu landsbyggðakjördæmi, þau eru bara hérna hinu megin við Kópavogslækinn og þurfa ekki að heimsækja marga staði í sinni kosningabaráttu. Það eru ekki svo margir vinnustaðir eftir í þeirra kjördæmum, allir farnir á hausinn eða að fara á hausinn og þau bæði í sama kjördæmi, Kraganum utan um Reykjavík. 

En það er skrýtið að Sjálfstæðismenn skuli enda þetta hörmulega stjórnartímabil sitt með því að bíta höfuðið af skömminni, reyna að koma í veg fyrir breytingar á stjórnarskránni og reyna að koma í veg fyrir meira lýðræði á Íslandi. Hvaða hagsmuni eru þingmenn Sjálfstæðisflokksins að verja? Ekki hagsmuni Íslendinga, það er alveg ljóst. Og allra síst eru formaður og varaformaður Sjálfstæðisflokksins að verja hagsmuni síns kjördæmis, hversu lengi sættir fólkið í Kraganum sig við að vera annars flokks, við að vigta í atkvæðamagni ekki nema að hálfu leyti á við fólk norðan heiða?

Núna hagar því þannig til að bæði formaður og varaformaður Sjálfstæðisflokksins eru úr sama kjördæmi, kjördæmi hinna veigaminnstu Íslendinga, kjördæmi þar sem mest atkvæðamagn er bak við þingsæti. Benda þau á þetta í sinni stjórnmálabaráttu? Reyna þau að breyta stjórnarskránni þannig að Ísland sé ekki bara réttlaust fólk í þéttbýlinu sem hefur lítil áhrif í kosningum og hefur lítil áhrif á hvernig farið er með auðlindir og náttúru Íslands? Er t.d. nokkur hemja að yfirráð yfir hálendi Íslands sé að mestu leyti í höndum sveitarfélaga þar sem aðeins örlítill hluti íbúa landsins býr? Eiga Reykvíkingar og fólkið í Kraganum engan rétt?

Í öllum kjördæmum nema Reykjavík og Kraganum þá berjast þingmenn fyrir hagsmunum síns kjördæmis. Í Kraganum er ástandið ömurlegast, þar er réttleysi íbúanna mest og þar eru núna bæði formaður og varaformaður stærsta stjórnmálaflokks á Íslandi, Sjálfstæðisflokksins í framboði en hvað gerir þessi stjórnmálaflokkur annað en reyna að tefja öll mál sem til meira lýðræðis gætu horft á Íslandi. 

Fær Kraginn þrettánda þingsætið?

Samsæriskenningar Perkins og Hudson í silfrinu, Framsóknarleiðin

Það var ekki beinlínis til að fylla mann bjartsýni og jákvæðni  að hlusta á Silfrið í dag, þar ræddi Egill við Perkins og Hudson og þeirra boðskapur var að Ísland hafi verið leiksoppur og það sé ómögulegt að greiða þær skuldir sem fallið hafa á okkur og við ættum ekki að gera það, þetta sé ljótur leikur til að hafa af okkur auðlindir Íslendinga.

Það var áhugavert að heyra þá báða prédika framsóknarleiðina, leiðina um að eina vitið væri að afskrifa skuldir. Það er ótrúlegt að heyra í sumum  tala eins og það sé verið  að slíta hjartað úr þeim og að gefa einhverjum eitthvað með að afskrifa skuldir fyrirtækja og einstaklinga sem þegar eru meira og minna gjaldþrota, það má rifja upp að það sagði varla nokkur múkk þegar bankaeigendur seldu sjálfum sér sömu eigurnar fram og til baka og bjuggu þannig til grilljónir af gervipeningum í eigin vasa.

Það er eina vitið að afskrifa hluta skulda, það er bara spurning hvort 20 % er ekki allt of lítið, hvort það vigtar eitthvað í svona lömuðu hagkerfi. Húsnæði er á góðri leið með að verða verðlaust á Íslandi, menn verða að átta sig á því að sums staðar er húsnæði svo lítils virði að fólk vill ekki búa þar þó að húsnæðið sé nánast frítt. 

En það var töluvert til í þessu hjá bæði Perkins og Hudson.

Scotland Yard og bankar á hryðjuverkaskrá

Ef það stendur til að fá fleiri erlenda sérfræðinga til að rannsaka Hrunið á Íslandi þá í guðsbænum haldið ykkur frá þessum bresku, sérstaklega einhverjum sem hafa tengingu við Scotland Yard. Mér sýnist þeir ekkert hafa lært frá tímum Baskeville hundsins og breska heimsveldið vera löngu hrunið og molnað niður.

En þetta eru nú dáldil meðmæli með íslenska Landsbankanum að Scotland Yard skuli hafa fallið fyrir honum. Ef til vill veitti bankinn alveg sérstaklega góða þjónustu eða tókst vel að blekkja viðskiptavini. Ég held nú að það hljóti að hafa verið vegna þjónustunnar og ég held að þegar rykið sest þá muni menn sjá að netbankarnir íslensku icesave og kaupthing edge voru afar sniðugir og nútímalegir og mættu þörf sem var fyrir hendi á markaðnum. Það hins vegar hefði ekki átt að blekkja stórar opinberar stofnanir að banki skrásettur í smáríki byði upp á meiri ávöxtun á innlánum en aðrir sannbærilegir innlendir hefðbundnir bankar. Sérstaklega ekki vegna þess að það klingdi í mörgum aðvörunarbjöllum lengi, lengi áður en bankarnir féllu. Sennilega hefur það verið gæði þjónustunnar en ekki ágóðavonin sem rak Scotland Yard til að skipta við Landsbankann. Alla vega á ég erfitt með að hafa svo mikla vantrú á bresku leynilögreglunni að þeir hafi ekki séð í gegnum að þeir sem lofa ofurháum vöxtum eru líka að hvetja þig til að taka meiri áhættu.  Ef það voru háir vextir sem drógu Scotland yard til að setja fé í íslenska banka þá myndi ég nú ekki treysta þeim til að rannsaka neitt sem tengdist peningum og vissara að sía póstinn til þeirra þannig að það sé ekki mikið af Nígeríugylliboðum. Þeir gætu fallið fyrir slíku.

Það er ekki margt sem gleður Íslendinga í viðureign okkar við Breta en það er nú hægt að brosa út í annað af hrakförum Scotland Yard, leynilögreglu þess ríkis sem beitti hryðjuverkalögum á okkur. 

Það var þessi hroðalega meðferð Breta á okkur blásaklausu og bláeygðu Íslendingunum sem rak mig til að taka þátt í öfgasamtökunum "The Icelandic Tea party" og taka þátt í ofstopafullum mótmælaaðgerðum þess öfgahóps en við fleygðum te í höfnina í Reykjavík og játa ég að hafa sjálf fleygt heilum tepoka (melrose) í þessum hefndaraðgerðum gegn Bretum. 

Hér er mynd af mér í tehellingu við höfnina í Reykjavík ásamt hinum í The Icelandic Tea party þegar við helltum te í hafið.

 

Þessar aðstæður eftir hrunið hafa breytt mér úr virðulegri kennslukonu í brjálaðan aktívista sem svífst einskis. Þannig hef ég hellt te í hafið og svo bankaði ég svo fast með sleif á pott  við Alþingishúsið  í janúarmótmælunum að sleifin brotnaði. 

Scotland Yard tapaði á falli Landsbankans

Fjallabræður í Framsókn - Fyrir okkur öll

Það var líf og fjör í Framsóknarflokknum í Reykjavík í dag. Í dag hófst kosningabaráttan og það var opnunarhátíð í kosningaskrifstofu okkar í Borgartúni.  Hátíðin hófst með blaðamannafundi þar sem efstu menn á listum í öllu kjördæmum sátu fyrir svörum og kynntu kosningastefnuskrána.

Þessi kosningabarátta er háð undir kjörorðinu  "Fyrir okkur öll"

Þegar alvarlegi hlutinn var búinn þá var veislukaffi og grill og skemmtiatriði fyrir börn og fullorðna. Fjallabræður sungu nokkur ættjarðarlög. Hér er annað af tveimur vídeóum sem ég tók og blandaði saman blaðamannafundi og söng Fjallabræðra.

Vaxtalækkun og niðurfærsla skulda

Bjarni komdu aftur, við söknum þín!

 
Bjarni og allir samvinnu og félagshyggjumenn, velkomnir á opnunarhátíð okkar í dag í Borgartúni!

Bjarni Harðarson er hættur við framboð. Þannig fór um sjóferð þá hjá Bjarna Harðarsyni og liðsmönnum hans. Það er gríðarlega erfitt að koma á flot nýju stjórnmálaafli á Íslandi, ekki síst vegna þess hve mikinn prósentuhluta þarf að hafa til að ná inn fyrsta kjördæmakjörna fulltrúanum í stóru kjördæmunum. 

Það að reka stjórnmálabaráttu á Íslandi í dag í öllum kjördæmum er einfaldlega ofvaxið öllum framboðshreyfingum sem ekki eiga sterka bakhjarla í samstilltum hópi félagsmanna. Það  er þannig kerfi á Íslandi að breytingar á íslensku samfélagi verða að koma í gegnum fjórflokkinn þ.e. Framsóknarflokk, Samfylkingu, Vinstri græna og Sjálfstæðisflokk og það er gríðarlega mikilvægt að skynsamt og vel upplýst hugsjónafólk fylki sér í alla þessa flokka eftir því hvar fólk finnur hjarta sitt sló og reyni að hafa áhrif í gegnum flokkanna. Það er mikilvægt að komast í stjórn en það er ekki síður mikilvægt að veita valdhöfum aðhald og hrópa hátt og fljótt um það sem þeir eru að gera rangt.

Ein af ástæðunum fyrir Hruninu á Íslandi eru að almenningur var hættur að skipta sér af stjórnmálum og gera kröfur á að þær leikreglur sem stjórnvöld settu væru einfaldar og skýrar og skiljanlegar og sanngjarnar og að stjórnað væri á réttlátan, framsýnan og skynsaman hátt í anda samvinnu og samkenndar og leyfði þannig samfélagi gróðahyggju og einkavinavæðingu að grassera.

Það er miklu meira sem Bjarni getur komið áleiðis með því að starfa innan Framsóknarflokksins en með einkaframboði um málefni sem klárlega verður ekkert kosningamálefni í ár. Það má rifja upp að Bjarni var eini þingmaðurinn á Íslandi sam axlaði ábyrgð og sagði af sér eftir hrunið. Það var nú út af öðru en því að hann hefði átt þátt í hruninu. Bjarni er ansi fljótfær og þyrfti að læra betur á tölvupóst og meira um hollustu við samherja en það er missir af honum úr Framsóknarflokknum. 

Því við ég hvetja Bjarna til að ganga aftur í Framsóknarflokkinn og styðja málstað félagshyggju og samvinnu.

Gott væri að Bjarni notaði tækifærið og kíkti til okkar í dag því  Framsóknarmenn í Reykjavík opna kosningamiðstöð sína í Borgartúni 28 laugardaginn 4. apríl kl. 14:00-16:00 með pompi og prakt.

Hoppukastalar fyrir börnin. Sirkus Íslands skemmtir kl. 15:00

Kaffi, kökur, pylsur og gosdrykkir verða í boði

Allir velkomnir

Hættir við þingframboð

Litli Neró. Hvar var Sigurður Kári þegar Reykjavík brann?

Það er gott að Alþingi skuli ræða um sumarannir í skólum. Það er mikilvægt að fólk skilji og viti hver vandi skólafólks er núna, það er ekki betur sett en farandverkafólk í þeirri kreppu sem núna lamar Ísland. Það  fyrsta sem fyrirtæki og stofnanir skera niður  eru  framkvæmdir yfir sumarið og að ráða fólk í sumarafleysingar.

Það er mikilvægt að taka á bráðavanda skólafólks og heimila en það er óendanlega mikilvægt að takast á við að byggja hér upp betra samfélag til framtíðar og breyta þeim leikreglum og umgjörð sem leiddi okkur í ógöngur. Einn liður í því er stjórnlagaþing og breytingar á stjórnarskrá. Það skilja því miður ekki erindrekar þeirra sem komu okkur í Hrunið, þeir þurfa lengri tíma til að átta sig á hve glæpsamlega komið var fram við almenning á Íslandi.

Ungi sjálfstæðismaðurinn Sigurður Kári er plöggaður reglulega inn í fréttir á mbl.is og nýjasta spekin sem er höfð eftir honum á þingpöllum í dag er þessi:

"Sigurður Kári Kristjánsson, þingmaður Sjálfstæðisflokks, sagðist styðja það eindregið að teknar væru upp sumarannir við Háskóla Íslands. Sagði hann gagnrýnivert hjá sitjandi ríkisstjórn að einbeita sér að breytingum á stjórnarskránni í stað þess að einbeita sér að lausnum sem gagnast gætu atvinnulífinu og heimilum landsins. Líkti hann ráðherrum ríkisstjórnarinnar við Neró sem spilaði á fiðlu meðan Róm brann, því nú væri fyrirtækin og heimilin í landinu að brenna meðan meirihlutinn setti alla sína orku í gæluverkefni. Sagði hann ráðherrana spila við falskan undirleik Framsóknarflokksins."

Þessi orðræða er grátbrosleg. Sérstaklega þegar haft er í huga þessi samlíking Sigurðar Kára um Neró og rifjað upp að þegar búsáhaldabyltingin braust út og upplausnarástand var í Reykjavík og eldar voru tendraðir við Alþingishúsið og þar barið á pönnur og potta og aðeins tímaspursmál hvenær bálreiður fólksfjöldi ræðist inn í þinghúsið þá stóð Sigurður Kári þar í pontu og flutti ávarp - talaði fyrir því að leyfa ætti sölu brennivíns í búðum.  

Stuðningsmenn Sigurðar Kára eru dáldið pirraðir yfir að hæðst skuli vera að því hve mikið á skjön hann og flokkur hans var við íslenskan veruleika og segja það hafa verið tilviljun að þetta mál hafi einmitt verið á dagskrá þennan dag og Sigurður Kári þannig gerður hlægilegur og afkáralegur. En tilviljun og ekki tilviljun, það var fátítt fyrir Hrunið að Sigurður Kári væri að beita sér fyrir öðru en sölu á víni í búðum, það virðist hafa verið hans helsta hugðarefni og hugsjón í þingstörfum.

Það er gott að Sigurður Kári skuli vera að þroskast og átta sig á því að þetta brennivínssöluhugðarefni er voða  2007 og virkar lítið núna til að halda atkvæðum kjósenda. Við erum nefnilega núna öll í timburmönnunum eftir valdasetu Sjálfstæðisflokksins og við þurfum engan afréttara. Við þurfum að viðurkenna vanda okkar, horfast í augu við ástandið og öll þjóðin þarf að fara í meðferð. 

Hér er vídeó sem ég tók fyrir framan Alþingishúsið 20. janúar síðastliðinn, einmitt þegar Sigurður Kári var innan dyra að tala eina ferðina ennþá um nauðsyn þess að selja brennivín í kjörbúðum:

Spurst fyrir um sumarannir á Alþingi

Háskólastúdentar réttlausir í kreppunni

Það er gott að háskólastúdentar bendi á hvað það er gríðarlega erfitt ástand og hvað það bitnar hrikalega illa á þeim. Aðstæður eru þannig á Íslandi að framhaldsskólanemar og háskólanemar eru eins og farandverkafólk sem kemur inn á vinnumarkaðinn þrjá til fjóra mánuði á ári, yfir sumarmánuðinn.

Einu sinni var þetta hið besta mál, það var ómögulegt að hafa unga fólkið bundið í skólum yfir hábjargræðistímann og skólahald var enda í sveitaskólunum hagrætt þannig að krakkarnir gætu hjálpar til við bústörfin og væru ekki tepptir í skólum þegar sauðburður hæfist á vorin. Í flestum löndum byrjaði og endaði skólahald í takti við uppskerustörfin, það þurfti að passa að mannskapur væri til að setja niður kartöflur á vorin og taka upp uppskeruna að hausti.

Síðustu áratugina hefur þetta samband skólans og taktsins í matvælaframleiðslu í heimabyggð rofnað, atvinnulífið er orðið svo vélvætt og tölvuknúið að sveitakrakkarnir eru kannski mest inn í bæ að horfa á vídeó og sörfa á Netinu, það er ekki lengur þörf fyrir vinnuafl þeirra við framleiðsluna. Krakkarnir í sjávarplássunum eru ekki lengur mikilvægt vinnuafl því vinnslan hefur flust annað, núna er aflinn unninn út á sjó  og keyrður á milli  staða.

Vegna spennunnar og þenslunnar sem hefur verið í íslensku atvinnulífi yfir sumartímann þá erum við núna illa undir það búin að það sé mikið af fólki sem ekki er þörf fyrir við frumframleiðslu eða byggingarstörf. En við skulum ekki gleyma að það var einmitt  undirstaða þeirrar heimsmenningar sem við búum við að það þurftu ekki allir að vera að strita fyrir hinu daglega brauði, það var svo mikil framleiðni í samfélaginu að einungis hluti þurfti að vinna við framleiðsluna.

Núna stöndum við frammi fyrir því að margir skólanemar fá ekki vinnu og aðstæður eru þannig á Íslandi að  námslánakerfið tekur ekki mið af því og skólakerfið tekur ekki mið af því að þessar aðstæður geti komið upp. 

það er gríðarlega mikilvægt að aðhafast eitthvað af stjórnvöldum til að mæta þessum aðstæðum. Margir háskólastúdentar eru í hugvísindum og félagsvísindum og kennslufræðum, laganámi eða viðskiptagreinum eða heimspeki og tungumálum. Í þessum greinum er ekki um að ræða rándýr tilraunatæki og mikla og dýra aðstöðu til að skapa vinnu eða nám fyrir nemendur. það er því tiltölulega einfalt, fljótlegt og kostar lítið að búa til aðstöðu og það er vel hægt að sinna ýmis konar þróunarstörfum sem hingað til hafa setið á hakanum með því að fá stúdenta í vinnu.

Það er afar einkennilegt ef málið er þannig núna að eina sem býðst háskólanemum fyrsta sumarið sem kreppan stendur yfir að skrá sig í sumarnámskeið í dýran einkaskóla (háskólann í Reykjavík) og borga há skólagjöld  til þess eins að eiga til hnífs og skeiðar í kreppunni.

Er ekki einkennilegt að háskólanemar þurfi að borga með sér í kreppunni og hafi enga aðra úrkosti til að bregðast við þessum aðstæðum nema skrá sig í dýrt sumarnám hjá einkaháskóla til að eiga kost á því að fá námslán  til framfærslu og til að borga skólagjöld?

Er þetta virkilega sá valkostur  sem ríkisstjórn Samfylkingar og Vinstri-Grænna ætlar að bjóða íslenskum háskólastúdentum upp á í ár? Það er ansi nöturlegt að þegar allt hefur farið á hliðina á Íslandi í einhvers konar einkavæðingaræði þá sé eini valkosturinn að bjóða atvinnulausum háskólanemum sem ekki hafa rétt til atvinnuleysisbóta og ekki hafa rétt til námslána nema vera í skráðu námi - upp á þann eina valkost að skrá sig í sumarnám með dýrum skólagjöldum - sumarnám í einkaháskólum sem þó eru nánast að öllu leyti kostaðir af ríkisfé.

Er það þannig að þegar einkavæðingin hefur mistekist á öllum sviðum og íslenska ríkið nánast gjaldþrota og þúsundir ungs fólks hefur ekki annan valkost en vera í skólum þá sé því sagt að borga bara fyrir sig sjálft með að taka lán til framfærslu og skólagjalda í einkaháskólum?

Það er eitthvað ekki í lagi í íslensku samfélagi, það hefur engin umræða farið fram um einkavæðingaræðið sem teygði sig inn í skólakerfið.

Aðstæður eru þannig núna að þegar háskólanemar sem núna eru við að ljúka námi koma út á vinnumarkað þá er mjög ólíklegt að þeir geti fengið vinnu. Það er því ekki mjög gott að vera með miklan skuldabagga á herðum.

Í nágrannalöndum okkar þá er hluti af því sem námsmenn fá styrkur sem öllum þegnum í háskólanámi býðst í nokkur ár. Hér eru öll námslánin vísitölutryggt lán sem bera vexti. 

Námsmenn örvænta um sumarið