Björt ljós, borgarljós

Ég sit hérna í lok föstudagsins og horfi út um gluggann á óveðrið og finnst núna á vetrarhátíðinni þessi heimur Reykjavíkurborgar með Esjuna í bakgrunni vera heimur sem ég gæti alveg ferðast burt frá. Ég hlusta á geisladisk Megasar Loftmynd um borgarsamfélagið og hugsa um hvað það eru margar borgir og hvernig borgirnar eru núna byggjast upp í innviðum Netheima. Ég held áfram vídeóbloggtilraunum mínum og núna í dag bloggaði ég um SecondLife undir áhrifum frá laginu Björt ljós, borgarljós eftir Megas.

 

Vídeóbloggið mitt er 8 mín. og endar á því að ég stend í ljósum logum og fuðra upp. Ég er að tapa mér í vídeóeffektunum, þarf að prófa þá alla.

 

Ég er sammála Wesseling þessum sem talaði á ráðstefnu í REykjavík í dag og sagði:

"Wesseling, sem lýsir sér sem netfíkli, bloggara og ráðgjafa, sagði að netið væri að þróast í átt að risastóru tengslaneti einstaklinga, sem skiptust á upplýsingum og hugmyndum. Þeir sem vildu selja vöru og þjónustu á netinu yrðu að hafa þetta ofarlega í huga og nýta sér þá mörgu samskiptavefi, sem nú er að finna."

 

Ég er sammála að Netið verður að risastóru tengslaneti en ég held ekki endilega að aðaltilgangur þess sé að selja vörur og þjónustu. Hmmm... ætli það hafi verið í dag sem Moggabloggið fór að verða svona skreytt auglýsingum? 

Sennilega verður maður að fara að huga að flutningi. 

Vangaveltur um netmarkað

Okkar á milli - Enginn vegur fær

Ég var í útvarpsviðtali í morgun á Rás 1 í þættinum Okkar á milli

Ef viðtalið spilast ekki (verður aðgengilegt næstu tvær vikur hérna á vef Rúv) þá vistaði ég það líka hérna.  Þetta var spjall m.a. um félagsnet og tölvuleiki.

Viðmælandi átti að velja tvö lög til að spila í þættinum og ég valdi þau bæði af geisladisknum Loftmynd með Megasi. Það eru lögin Enginn vegur fær og Björt ljós, borgarljós 

Hér er vídeo sem ég gerði um tónleika til heiðurs Megasi árið 2005: 

 

Valentina frá Vilnius

Fræðimaður frá Vilnius er núna í heimsókn hjá mér á skrifstofu minni. Ég tók náttúrulega viðtal við hana og sendi út á Netinu. Hér er brot úr viðtalinu:

Athugasemd: Það er svolítið vesen að kóðinn sem kemur frá ustream.tv er þannig að vídeóið byrjar strax að spila, það er ómögulegt ef maður er með mörg vídeó á einni síðu. Eina leiðin sem ég hef fundið til að koma í veg fyrir að spilun hefjist sjálfkrafa er að setja inn

flashvars="autoplay=false" strax á eftir <embed...

 

Öskudagur, hnífasett, jakkaföt, Clinton, Obama

Hér er vídeóhugleiðing mín um öskudaginn og forkosningar demókrata í USA:

Með hnífasett í bakinu á öskudegi

Spennandi kosningar

Ég get varla sagt að ég viti hverjir frambjóðendur Repúblikana eru og þaðan af síður hver er að vinna þar. En heimsbyggðin fylgist með Clinton og Obama. Það er sjaldan sem mér finnst eins frambærilegir kandidatar hafa tekist á í stjórnmálum í USA. Þau eru bæði frábær þó ég geti nú ekki að því gert að ég vil að Hillary Clinton vinni þetta. Hún er mikill reynslubolti í stjórnmálum. Hún er femínisti.

En mér finnst Obama vera mjög góður og Larry Lessig finnst hann bestur og hefur rökstutt það svona í þessu glærusjóvi why I am 4Barack:

Það væri kjörstaða að Clinton yrði forsetaframbjóðandi og Obama frambjóðandi í varaforseta. 

Clinton vann sæta sigra

Stafræn sögugerð með myndum

Það eru ýmis verkfæri sniðug til að segja sögur með stafrænum myndum. hér er yfirlit hjá cogdogroo.wikispaces.com  yfir 50 verkfæri til að búa til svoleiðis sögur.

Svoleiðis sögur geta verið úr teikningum eða ljósmyndum. Stundum eru þetta eins og teiknimyndasögur t.d. er http://www.makebeliefscomix.com skemmtilegt kerfi.

Ég prófaði að gera myndasögu með tveimur römmum þar:

Ég prófaði líka að gera myndasögu með 5 myndum í bubbleshare.com, það er ákaflega einfalt og sniðugt kerfi. Það er hægt að líma myndasögurnar inn í blogg eins og moggabloggið á mismunandi vegu, það virkaði reyndar ekki hjá mér áðan.

Það er líka hægt að gera sniðugar myndasögur í animoto.com

Kona sem kann varla að kveikja á tölvu

Það er sniðugt fyrir þá þjóðfélagshópa sem eru við völd og vilja halda völdunum áfram að fá hina valdalausu í lið með sér. Fá þá til að vinna sjálfa að því að viðhalda valdaleysi sínu. Í gegnum aldirnar hefur aðgengi að þekkingu og námi  og tækni verið forréttindi hinna ríku og valdamiklu og virkar sem öflugt samtryggingarkerfi til að  tryggja þeim áframhaldandi völd.

Í flestum samfélögum er einhvers konar verkaskipting við lýði. Sú verkaskipting fer gjarnan eftir kyni og sums staðar er hún svo fastnjörvuð að  óhugsandi er að konur vinni sum störf eða karlar önnur.

Það þarf að vera blindur til að sjá ekki að oftast eru störfin sem bjóða mesta möguleika til að stjórna og safna auð að mestu mönnuð karlmönnum.  Þegar tæknibreytingar verða sem auka framleiðni þá sjáum við líka breytingu á hverjir vinna verkin, í landbúnaði sjáum við konur yrkja jörðina með handverkfærum á ökrum þriðja heimsins en það eru karlar  sem stjórna vélunum í tæknivæddri framleiðslu nútíma vestræns landbúnaðar.  

Það er líka sú verkaskipting víða um heim að það eru eingöngu karlmenn sem fara með stríð á heldur öðrum þjóðum. Þannig var það í heimstyrjöldinni síðari. En þá varð líka þörf á konum til að vinna þau störf sem karlmenn höfðu unnið í atvinnulífinu og tækniframleiðslunni. Mikill áróður var þá  til að ná til kvenna og hvetja þær til dáða við slíka framleiðslustörf. Margir femínistar halda mikið upp á plakötin sem eru áróðursplaköt bandarískra hermálayfirvalda á stríðstímum, það er ekki oft í sögunni sem konur eru sýndar sterkar og öflugar og hvattar áfram.

Ein af þeim konum sem lagði sitt af mörkum var stúlkan  Norma Jeane Dougherty. Hún birtist fyrst opinberlega á mynd 2. ágúst 1945 (sjá myndina hér til hliðar) sem sýndi konur leggja sitt af mörkum til stríðsrekstursins í hergagnaframleiðslu.  Þessi stúlka breytti seinna nafninu sínu í  Marilyn Monroe  og varð táknmynd ekki um sterku konuna sem vinnur á vélunum heldur um ljóskuna  sem sækist eftir peningum og skartgripum og speglar sjálfsmynd sína í augum karlmanna, konuna  sem er kynlífsleikfang karlmanna.

Marilyn Monroe er eitt af íkonum menningar okkar og hún birtist okkur eins og menning okkar vill birta okkur konuna og hamra á hver staða hennar er og þroskakostir. Marilyn Monroe varð ekki verkfræðingur eða hugvitsmaður. Hún varð sýningardýr og leikfang. Hún lærði ekki að nota verkfæri. Hún varð verkfæri sjálf.

Marilyn Monroe var íkon í iðnaðarsamfélagi síðustu aldar. Ég hugsa að íkon þekkingarsamfélagins verði öðruvísi en ég held ekki að konur verði þar sýndar sterkar og öflugar og lögð áhersla á tækniafrek og hugvit kvenna.

Ennþá virðast margar konur telja að það sé vert að lýsa því yfir að þær séu ekkert að fylgjast með í heiminum og kunni ekki á einföldustu tæki og séu háðar karlmönnum um aðgengi að tækninni.

Þetta segir fræg leikkona í Morgunblaðinu í dag: 

Leikkonan Angelina Jolie hefur viðurkennt að vera gjörsamlega hjálparvana þegar kemur að tölvu- og tæknimálum og viðurkennir að hún þurfi oft að biðja sambýlismanninn, Brad Pitt um aðstoð þegar hún þarf að kveikja á tölvu.

Þetta kom fram í máli leikkonunnar á kvikmyndahátíðinni í Santa Barbara á laugardag.

„Eins og Brad veit þá kann ég eiginlega ekki að kveikja á tölvu," sagði Jolie við gesti á hátíðinni.

Því miður er mörgu fólki farið eins og þessari leikkonu og þar er bæði aldur og kyn sterkar breytur. En fólk sem hefur það viðhorf að það sé allt í lagi að kunna ekki á nýja tækni og vera öðrum háðir um eins einfalda hluti og að ræsa tölvur er ekki á neinni sigurgöngu. 

 

Kann varla að kveikja á tölvu

Prófa vefþjónustuna utterz.com

Gengur þetta?

Ég er að reyna að líma slóðina inn hljóðblogg og vídeóblogg í utterz.com en það er eitthvað skrýtið. En slóðin beint á þetta er hérna:

http://www.utterz.com/~u-NTAyNTkxMA/utt.php

Nú prófa ég að líma bara inn vídeó:

 

Nú prófa ég að líma inn hljóðskrána:

Þetta er ansi sniðugt kerfi, það er gert ráð fyrir að maður geti sent hljóð og vídeó beint úr síma en það er líka hægt að gera það á vefnum. Ég held að þetta sé dæmi um í hvaða átt bloggkerfi eru að þróast, þau verða svona.  Ég sé mikla möguleika í svona í skólastarfi ef nemendur geta haldið leiðarbækur þar sem þeir geta talað inn, sent inn myndir og vídeó og líka skrifað inn texta. Svo er hægt að merkja allt með "tags" eins og vanalegt er í svona vef 2.0  verkfærum.

Gæðin virðast nú ekki vera sérstaklega góð, eiginlega ferlega léleg á vídeóinu. En þetta virkar sniðugt kerfi. Ég gat ekki límt þetta inn í wordpress en það gengur fínt á moggablogginu. 

Vistmenning og rauðar íslenskar

Ég byrjaði áðan á greininni vistmenning   á íslensku wikipedia.  Ég tók saman núna um mánaðarmótin hvað ég hef skrifað margar greinar á íslensku wikipedia. Mér telst til að árin 2006 og 2007 hafi ég skrifað yfir 250 greinar. Hér er yfirlit yfir þær greinar.  Það eru núna 19.729 greinar á íslensku wikipedia en á ensku wikipedia eru komnar 2.204.919 greinar sem er dáldið meira.

Það er sorglega lítill skilningur hérna á Íslandi á hvað lítil málsamfélög eins og hið íslenska hafa mikinn hag af því að byggja upp svona gagnasöfn eins og wikipedia.  Allt starf á wikipedia er unnið í sjálfboðavinnu og enginn fær neina umbun fyrir það starf svo ég viti. Það er í engu mér eða öðrum til framdráttar að skrifa þar inn og oft heyri ég hnýtt í wikipedia og fundið að efni þar og hneykslast á því að þarna geti leikmenn skrifað um efni og þarna sé enginn áreiðanleiki upplýsinga. Það er nú eitthvað annað en þessi vísindalega þekking sem hleðst upp í ritrýndum gagnasöfnum.

Það er eiginlega furðulegt að ég og mörg þúsund aðrir í heiminum skuli skrifa inn í wikipedia, þar af nokkrir tugir á íslensku wikipedia. Hvað rekur okkur áfram að verja svona miklum tíma í svona forsmáða iðju?

 Í janúar í ár skrifaði ég þessar greinar í íslensku wikipedia:

 Lárpera

 Hvíthákarl

Rauðar íslenskar

 Kartöflubjalla

 Kassandra

Langreyður

 Trójuhestur

Ég hugsa að ég skrifi í íslensku wikipedia af því mér finnst miklu varða að fólk viti hvað hlutir eins og vistmenning er og viti hvaða menningarverðmæti er fólgin í rauðum íslenskum.

Háskólavellir: Dumping á leigumarkaði

Ég fór í gær  í kynnisferð til Keilis í Keflavík og skoðaði gamla varnarsvæðið. Ég hef ekki komið þarna í meira en aldafjórðung eða síðan félag herstöðvarandstæðinga bauð upp á kynnisferð almennings þangað í kjölfar mikillar fjölmiðlaumræðu um hvort að á varnarsvæðinu væru geymd kjarnorkuvopn. Ég fór með Ástu dóttur mína litla í þá ferð, hafði hugsað þetta sem svona fróðlegan sunnudagsbíltúr fyrir mig og barnið, það væri nú spennandi fyrir litla krakka að skoða risastór flugskýli og Avac sprengjuflugvélar og leita að kjarnorkuvopnum, þetta var svona þessara kaldastríðstíma útgáfa af páskaeggjaleit. Það var svolítið broslegt  að þarna um árið var tekið  á móti rútunni eins og hún væri full af mögulegum hryðjuverkamönnum enda voru í henni margir frægir herstöðvaandstæðingar eins og Birna Þórðardóttir. Birna er nú um stundir  aðallega  þekkt  fyrir  menningargönguferðir sínar um miðbæ Reykjavíkur og listsköpun og kúltúr. Það er nú líka broslegt. Heimurinn breytist og herstöðin er núna kölluð háskólavellir og Birna Þórðardóttir menningarfrömuður. Þetta hefði ég nú ekki séð fyrir. 

Mér sýnist ágætt starf unnið hjá Keili og vonandi tekst að koma upp háskólastarfsemi þarna eins og fyrirætlanir eru um.  Núna mun vera þarna um 100 manna hópur fullorðinna námsmanna í námi sem er á framhaldsskólastigi. Þó að námið sé á framhaldsskólastigi þá fá nemendur námslán og þeir þurfa að greiða skólagjöld. Aðeins hluti þessarra framhaldsskólanema býr á vallarstæðinu. 

Það munu hins vegar vera yfir 1000 íbúar á vallarsvæðinu nú þegar sem leigja af fyrirtæki sem heitir Háskólavellir.  Keilir er með einhvers konar milligöngu um leigu þessara íbúða og hefur tekjur af því. Leiguverð er afar hagstætt, 30 þús. fyrir fína stúdíóíbúð með Interneti og fríum ferðum til Reykjavíkur. Margir nemendur í háskólum í Reykjavík leigja því þarna og eftir því sem ég best veit þá er Norðurál flytja alla starfsmenn sína þangað þ.e. starfsmenn sem munu vinna að framkvæmdum á suðurlandi. 

Staða mála er sem sagt þannig í augnablikinu að starfsemin sem fer fram á vallarsvæðinu er fyrst og fremst leigumiðlun fyrir íbúðir sem þetta fyrirtæki Háskólavellir á. Það er afar einkennilegt að ekki skuli hafa heyrst í neinum athugasemdir um hve óeðlileg svona samkeppni á leigumarkaði er, mér sýnist þetta vera dæmi um  dumping og  undirboð á leigumarkaði. Hugsanlega eru leigusalar og íbúðareigendur  í Reykjavík og Reykjanesbæ ekkert uggandi yfir þessu og finnst þetta allt í lagi, hugsanlega er ennþá svo mikil þensla að þetta gerir ekkert til.

Það er nú þannig að frjáls samkeppni og framboð og eftirspurn geta oft komið neytendum vel en hve eðlileg er samkeppni fólks sem byggir, selur og leigir íbúðir við fyrirtæki eins og Háskólavelli? Hvers konar fyrirtæki er Háskólavellir, hverjir eiga það  og hvernig komst það yfir eignir sínar? 

 Hvaða fyrirtæki er Háskólavellir?

Þegar skoðað er nánar hvaða fyrirtæki Háskólavellir er þá sést að það  er  í eigu fimm félaga og fyrirtækja; Glitnis, Sparisjóðs Keflavíkur, fjárfestingafélagsins Teigs, Fasteignafélagsins Þreks og svo Klasa sem er fasteignafélag tengt bróður fjármálaráðherra. Klasi á 22,5% í Háskólavöllum eins og allir hinir hluthafarnir, fyrir utan Teig sem á 10%.

Fyrirtækið  Klasi mun vera að einhverju leyti  í eigu bróðurs fjármálaráðherra og mun hann stýra því sb. þessa frétt á visir.is:

Fyrirtæki í eigu bróður fjármálaráðherra gæti hagnast um milljarða (frétt á vísir.is)

Þróunarfélag Keflavíkurflugvallar seldi á sínum tíma eignarhaldsfélaginu Háskólavöllum 96 byggingar fyrir 14 miljarða. Þetta eru að mestu íbúðabyggingar á gamla varnarliðssvæðinu. Þetta munu vera þúsundir íbúða.

Fyrirtækið Háskólavellir virðist hafa komist yfir eignirnar sem það núna falbýður til leigu á Keflavíkurflugvelli á undarlegan hátt.  Það vekur  afar mikla tortryggni hver fjölskyldutengsl Árna fjármálaráðherra eru við þá aðila sem fengu að kaupa þessar eignir, Atli Gíslason  hefur fært rök fyrir því að staðið hafi verið ólöglega að sölu varnarliðseigna til Háskólavalla og það hafi verið handvaldir kaupendur sem þróunarfélagið (þ.e. sá aðili sem sá um söluna fyrir fjármálaráðuneytið) hafi velþóknun á. 

Því spyr ég hvort ég sé ein um að finnast undarleg undirboð á leigumarkaði frá fyrirtæki eins og Háskólavöllum? Sætta fasteignaeigendur og húsbyggjendur  og leigusalar á Suðurnesjum og Reykjavíkursvæðinu sig við svona samkeppni?

Sjá þessa grein sem birtist á dv.is í nóvember síðastliðinn: 

 

 Innlent | 20.11.2007 18:04:43 dv.is
Handvelja kaupendur segir þingmaður VG

Atli Gíslason, þingmaður Vinstri grænna, gagnrýnir harðlega aðferðina við sölu Þróunarfélags Keflavíkurflugvallar ehf á 1.700 íbúðum á Keflavíkurflugvelli í haust. Í umræðum um fjáraukalög á Alþingi í dag sagði hann efnislega að salan hefði verið heimildarlaus og ólögleg og hefði ekki fylgt reglum um gagnsætt og opið útboð. Svo virtist sem stjórn Þróunarfélags Keflavíkurflugvallar ohf. hefði handvalið mögulega kaupendur og selt þeim sem hún hafði velþóknun á.

Atli segir í samtali við dv.is að um sé að ræða nýtt Orkuveitumál um heilmildarlausa meðferð almannaeigna og almannafjár. Í Evróputilskipunun, sem um þetta gildi, segi að hlutafélög í opinberri eigu verði að fara að reglum um opið og gagnsætt útboð þegar seldar eru eignir almennings. „Það er ekki hægt að skjóta þessu máli undan opinberu eftirliti. Auk þess er um svo mikil verðmæti að tefla að auglýsa hefði átt útboðið á öllu Evrópska efnahagssvæðinu. Þetta er skýrt brot á 85. grein laga um opinber inkaup númer 84 frá árinu 2007 og reglugerð sem á lögunum byggir.“ Fullyrðingum Atla Gíslasonar, VG, um að lög hafi verið brotin var ekki andmælt á Alþingi í dag.

Árni Mathiesen, fjármálaráðherra, upplýsti í umræðunum að hann hefði gert samning við Þróunarfélag Keflavíkurflugvallar ohf. sem tryggja hefði átt sölu eignanna samkvæmt opnu útboði.
DV greinir frá því í dag að Fjárfestingarfélagið Háskólavellir hafi keypt tæplega 1.700 íbúðir af Þróunarfélagi Keflavíkurflugvallar ohf, en að félaginu koma meðal annars Glitnir, fasteignafélagið Þrek í Reykjanesbæ, fjárfestingarfélagið Teigur og fasteignaþróunarfélagið Klasi sem Þorgils Óttar Mathiesen, bróðir fjármálaráðherrans, leiðir. Kaupin voru gerð 5. október síðastliðinn og var söluverð 96 bygginga um 14 milljarðar króna. Einfaldur útreikningur bendir til þess kaupendur hafi greitt 80 til 110 þúsund krónur fyrir hvern fermetra.

Í stjórn Þróunarfélags Keflavíkurflugvallar ehf sitja Magnús Gunnarsson, stjórnarformaður, Árni Sigfússon, bæjarstjóri Reykjanesbæjar, og Stefán Þórarinsson, stjórnarformaður Nýsis hf.

 

Fleiri tenglar um Háskólavellir 

Víkurfréttir | Fyrirtæki ársins 2007: Keilir og Háskólavellir ehf.

Af árekstrum hins hörundsára bæjarstjóra - bjarnihardar.blog.is

Samningur um þróun og ráðstöfun eigna á Keflavíkurflugvelli