Hvers á fólkið í Kraganum að gjalda? Hvað gera formaður og varaformaður Sjálfstæðisflokksins?

Ég er með tilraunaútsendingu núna á rásinni
http://www.ustream.tv/channel/framsokn um þetta mál. Útsendingu lokið en hér er upptaka af henni:
Streaming Video by Ustream.TV
Eitt mikilvægasta atriðið í uppbyggingu Íslands er að tryggja hér gegnsærri stjórnarhætti og meira lýðræði. Framsóknarmenn hafa lagt áherslu á stjórnlagaþing og breytingar á stjórnarskrá en hvað gera Sjálfstæðismenn? Akkúrat núna þá reyna þeir að halda uppi málþófi að því er virðist eingöngu til að tefja fyrir að frumvarp um stjórnlagabreytingar nái í gegn. Þeir eru líka að tefja fyrir að þing endi og þingmenn geti einhent sér í kosningaundirbúning. Þetta náttúrulega er allt í lagi fyrir þau Þorgerði varaformann og Bjarna formann Sjálfstæðisflokksins. Sjálfstæðisflokkurinn hefur ekkert að vinna en öllu að tapa í næstu kosningum og svo eru þau Bjarni og Þorgerður Katrín ekki í neinu landsbyggðakjördæmi, þau eru bara hérna hinu megin við Kópavogslækinn og þurfa ekki að heimsækja marga staði í sinni kosningabaráttu. Það eru ekki svo margir vinnustaðir eftir í þeirra kjördæmum, allir farnir á hausinn eða að fara á hausinn og þau bæði í sama kjördæmi, Kraganum utan um Reykjavík. 

En það er skrýtið að Sjálfstæðismenn skuli enda þetta hörmulega stjórnartímabil sitt með því að bíta höfuðið af skömminni, reyna að koma í veg fyrir breytingar á stjórnarskránni og reyna að koma í veg fyrir meira lýðræði á Íslandi. Hvaða hagsmuni eru þingmenn Sjálfstæðisflokksins að verja? Ekki hagsmuni Íslendinga, það er alveg ljóst. Og allra síst eru formaður og varaformaður Sjálfstæðisflokksins að verja hagsmuni síns kjördæmis, hversu lengi sættir fólkið í Kraganum sig við að vera annars flokks, við að vigta í atkvæðamagni ekki nema að hálfu leyti á við fólk norðan heiða?

Núna hagar því þannig til að bæði formaður og varaformaður Sjálfstæðisflokksins eru úr sama kjördæmi, kjördæmi hinna veigaminnstu Íslendinga, kjördæmi þar sem mest atkvæðamagn er bak við þingsæti. Benda þau á þetta í sinni stjórnmálabaráttu? Reyna þau að breyta stjórnarskránni þannig að Ísland sé ekki bara réttlaust fólk í þéttbýlinu sem hefur lítil áhrif í kosningum og hefur lítil áhrif á hvernig farið er með auðlindir og náttúru Íslands? Er t.d. nokkur hemja að yfirráð yfir hálendi Íslands sé að mestu leyti í höndum sveitarfélaga þar sem aðeins örlítill hluti íbúa landsins býr? Eiga Reykvíkingar og fólkið í Kraganum engan rétt?

Í öllum kjördæmum nema Reykjavík og Kraganum þá berjast þingmenn fyrir hagsmunum síns kjördæmis. Í Kraganum er ástandið ömurlegast, þar er réttleysi íbúanna mest og þar eru núna bæði formaður og varaformaður stærsta stjórnmálaflokks á Íslandi, Sjálfstæðisflokksins í framboði en hvað gerir þessi stjórnmálaflokkur annað en reyna að tefja öll mál sem til meira lýðræðis gætu horft á Íslandi. 

Fær Kraginn þrettánda þingsætið?

Samsæriskenningar Perkins og Hudson í silfrinu, Framsóknarleiðin

Það var ekki beinlínis til að fylla mann bjartsýni og jákvæðni  að hlusta á Silfrið í dag, þar ræddi Egill við Perkins og Hudson og þeirra boðskapur var að Ísland hafi verið leiksoppur og það sé ómögulegt að greiða þær skuldir sem fallið hafa á okkur og við ættum ekki að gera það, þetta sé ljótur leikur til að hafa af okkur auðlindir Íslendinga.

Það var áhugavert að heyra þá báða prédika framsóknarleiðina, leiðina um að eina vitið væri að afskrifa skuldir. Það er ótrúlegt að heyra í sumum  tala eins og það sé verið  að slíta hjartað úr þeim og að gefa einhverjum eitthvað með að afskrifa skuldir fyrirtækja og einstaklinga sem þegar eru meira og minna gjaldþrota, það má rifja upp að það sagði varla nokkur múkk þegar bankaeigendur seldu sjálfum sér sömu eigurnar fram og til baka og bjuggu þannig til grilljónir af gervipeningum í eigin vasa.

Það er eina vitið að afskrifa hluta skulda, það er bara spurning hvort 20 % er ekki allt of lítið, hvort það vigtar eitthvað í svona lömuðu hagkerfi. Húsnæði er á góðri leið með að verða verðlaust á Íslandi, menn verða að átta sig á því að sums staðar er húsnæði svo lítils virði að fólk vill ekki búa þar þó að húsnæðið sé nánast frítt. 

En það var töluvert til í þessu hjá bæði Perkins og Hudson.

Scotland Yard og bankar á hryðjuverkaskrá

Ef það stendur til að fá fleiri erlenda sérfræðinga til að rannsaka Hrunið á Íslandi þá í guðsbænum haldið ykkur frá þessum bresku, sérstaklega einhverjum sem hafa tengingu við Scotland Yard. Mér sýnist þeir ekkert hafa lært frá tímum Baskeville hundsins og breska heimsveldið vera löngu hrunið og molnað niður.

En þetta eru nú dáldil meðmæli með íslenska Landsbankanum að Scotland Yard skuli hafa fallið fyrir honum. Ef til vill veitti bankinn alveg sérstaklega góða þjónustu eða tókst vel að blekkja viðskiptavini. Ég held nú að það hljóti að hafa verið vegna þjónustunnar og ég held að þegar rykið sest þá muni menn sjá að netbankarnir íslensku icesave og kaupthing edge voru afar sniðugir og nútímalegir og mættu þörf sem var fyrir hendi á markaðnum. Það hins vegar hefði ekki átt að blekkja stórar opinberar stofnanir að banki skrásettur í smáríki byði upp á meiri ávöxtun á innlánum en aðrir sannbærilegir innlendir hefðbundnir bankar. Sérstaklega ekki vegna þess að það klingdi í mörgum aðvörunarbjöllum lengi, lengi áður en bankarnir féllu. Sennilega hefur það verið gæði þjónustunnar en ekki ágóðavonin sem rak Scotland Yard til að skipta við Landsbankann. Alla vega á ég erfitt með að hafa svo mikla vantrú á bresku leynilögreglunni að þeir hafi ekki séð í gegnum að þeir sem lofa ofurháum vöxtum eru líka að hvetja þig til að taka meiri áhættu.  Ef það voru háir vextir sem drógu Scotland yard til að setja fé í íslenska banka þá myndi ég nú ekki treysta þeim til að rannsaka neitt sem tengdist peningum og vissara að sía póstinn til þeirra þannig að það sé ekki mikið af Nígeríugylliboðum. Þeir gætu fallið fyrir slíku.

Það er ekki margt sem gleður Íslendinga í viðureign okkar við Breta en það er nú hægt að brosa út í annað af hrakförum Scotland Yard, leynilögreglu þess ríkis sem beitti hryðjuverkalögum á okkur. 

Það var þessi hroðalega meðferð Breta á okkur blásaklausu og bláeygðu Íslendingunum sem rak mig til að taka þátt í öfgasamtökunum "The Icelandic Tea party" og taka þátt í ofstopafullum mótmælaaðgerðum þess öfgahóps en við fleygðum te í höfnina í Reykjavík og játa ég að hafa sjálf fleygt heilum tepoka (melrose) í þessum hefndaraðgerðum gegn Bretum. 

Hér er mynd af mér í tehellingu við höfnina í Reykjavík ásamt hinum í The Icelandic Tea party þegar við helltum te í hafið.

 

Þessar aðstæður eftir hrunið hafa breytt mér úr virðulegri kennslukonu í brjálaðan aktívista sem svífst einskis. Þannig hef ég hellt te í hafið og svo bankaði ég svo fast með sleif á pott  við Alþingishúsið  í janúarmótmælunum að sleifin brotnaði. 

Scotland Yard tapaði á falli Landsbankans

Fjallabræður í Framsókn - Fyrir okkur öll

Það var líf og fjör í Framsóknarflokknum í Reykjavík í dag. Í dag hófst kosningabaráttan og það var opnunarhátíð í kosningaskrifstofu okkar í Borgartúni.  Hátíðin hófst með blaðamannafundi þar sem efstu menn á listum í öllu kjördæmum sátu fyrir svörum og kynntu kosningastefnuskrána.

Þessi kosningabarátta er háð undir kjörorðinu  "Fyrir okkur öll"

Þegar alvarlegi hlutinn var búinn þá var veislukaffi og grill og skemmtiatriði fyrir börn og fullorðna. Fjallabræður sungu nokkur ættjarðarlög. Hér er annað af tveimur vídeóum sem ég tók og blandaði saman blaðamannafundi og söng Fjallabræðra.

Vaxtalækkun og niðurfærsla skulda

Bjarni komdu aftur, við söknum þín!

 
Bjarni og allir samvinnu og félagshyggjumenn, velkomnir á opnunarhátíð okkar í dag í Borgartúni!

Bjarni Harðarson er hættur við framboð. Þannig fór um sjóferð þá hjá Bjarna Harðarsyni og liðsmönnum hans. Það er gríðarlega erfitt að koma á flot nýju stjórnmálaafli á Íslandi, ekki síst vegna þess hve mikinn prósentuhluta þarf að hafa til að ná inn fyrsta kjördæmakjörna fulltrúanum í stóru kjördæmunum. 

Það að reka stjórnmálabaráttu á Íslandi í dag í öllum kjördæmum er einfaldlega ofvaxið öllum framboðshreyfingum sem ekki eiga sterka bakhjarla í samstilltum hópi félagsmanna. Það  er þannig kerfi á Íslandi að breytingar á íslensku samfélagi verða að koma í gegnum fjórflokkinn þ.e. Framsóknarflokk, Samfylkingu, Vinstri græna og Sjálfstæðisflokk og það er gríðarlega mikilvægt að skynsamt og vel upplýst hugsjónafólk fylki sér í alla þessa flokka eftir því hvar fólk finnur hjarta sitt sló og reyni að hafa áhrif í gegnum flokkanna. Það er mikilvægt að komast í stjórn en það er ekki síður mikilvægt að veita valdhöfum aðhald og hrópa hátt og fljótt um það sem þeir eru að gera rangt.

Ein af ástæðunum fyrir Hruninu á Íslandi eru að almenningur var hættur að skipta sér af stjórnmálum og gera kröfur á að þær leikreglur sem stjórnvöld settu væru einfaldar og skýrar og skiljanlegar og sanngjarnar og að stjórnað væri á réttlátan, framsýnan og skynsaman hátt í anda samvinnu og samkenndar og leyfði þannig samfélagi gróðahyggju og einkavinavæðingu að grassera.

Það er miklu meira sem Bjarni getur komið áleiðis með því að starfa innan Framsóknarflokksins en með einkaframboði um málefni sem klárlega verður ekkert kosningamálefni í ár. Það má rifja upp að Bjarni var eini þingmaðurinn á Íslandi sam axlaði ábyrgð og sagði af sér eftir hrunið. Það var nú út af öðru en því að hann hefði átt þátt í hruninu. Bjarni er ansi fljótfær og þyrfti að læra betur á tölvupóst og meira um hollustu við samherja en það er missir af honum úr Framsóknarflokknum. 

Því við ég hvetja Bjarna til að ganga aftur í Framsóknarflokkinn og styðja málstað félagshyggju og samvinnu.

Gott væri að Bjarni notaði tækifærið og kíkti til okkar í dag því  Framsóknarmenn í Reykjavík opna kosningamiðstöð sína í Borgartúni 28 laugardaginn 4. apríl kl. 14:00-16:00 með pompi og prakt.

Hoppukastalar fyrir börnin. Sirkus Íslands skemmtir kl. 15:00

Kaffi, kökur, pylsur og gosdrykkir verða í boði

Allir velkomnir

Hættir við þingframboð

Litli Neró. Hvar var Sigurður Kári þegar Reykjavík brann?

Það er gott að Alþingi skuli ræða um sumarannir í skólum. Það er mikilvægt að fólk skilji og viti hver vandi skólafólks er núna, það er ekki betur sett en farandverkafólk í þeirri kreppu sem núna lamar Ísland. Það  fyrsta sem fyrirtæki og stofnanir skera niður  eru  framkvæmdir yfir sumarið og að ráða fólk í sumarafleysingar.

Það er mikilvægt að taka á bráðavanda skólafólks og heimila en það er óendanlega mikilvægt að takast á við að byggja hér upp betra samfélag til framtíðar og breyta þeim leikreglum og umgjörð sem leiddi okkur í ógöngur. Einn liður í því er stjórnlagaþing og breytingar á stjórnarskrá. Það skilja því miður ekki erindrekar þeirra sem komu okkur í Hrunið, þeir þurfa lengri tíma til að átta sig á hve glæpsamlega komið var fram við almenning á Íslandi.

Ungi sjálfstæðismaðurinn Sigurður Kári er plöggaður reglulega inn í fréttir á mbl.is og nýjasta spekin sem er höfð eftir honum á þingpöllum í dag er þessi:

"Sigurður Kári Kristjánsson, þingmaður Sjálfstæðisflokks, sagðist styðja það eindregið að teknar væru upp sumarannir við Háskóla Íslands. Sagði hann gagnrýnivert hjá sitjandi ríkisstjórn að einbeita sér að breytingum á stjórnarskránni í stað þess að einbeita sér að lausnum sem gagnast gætu atvinnulífinu og heimilum landsins. Líkti hann ráðherrum ríkisstjórnarinnar við Neró sem spilaði á fiðlu meðan Róm brann, því nú væri fyrirtækin og heimilin í landinu að brenna meðan meirihlutinn setti alla sína orku í gæluverkefni. Sagði hann ráðherrana spila við falskan undirleik Framsóknarflokksins."

Þessi orðræða er grátbrosleg. Sérstaklega þegar haft er í huga þessi samlíking Sigurðar Kára um Neró og rifjað upp að þegar búsáhaldabyltingin braust út og upplausnarástand var í Reykjavík og eldar voru tendraðir við Alþingishúsið og þar barið á pönnur og potta og aðeins tímaspursmál hvenær bálreiður fólksfjöldi ræðist inn í þinghúsið þá stóð Sigurður Kári þar í pontu og flutti ávarp - talaði fyrir því að leyfa ætti sölu brennivíns í búðum.  

Stuðningsmenn Sigurðar Kára eru dáldið pirraðir yfir að hæðst skuli vera að því hve mikið á skjön hann og flokkur hans var við íslenskan veruleika og segja það hafa verið tilviljun að þetta mál hafi einmitt verið á dagskrá þennan dag og Sigurður Kári þannig gerður hlægilegur og afkáralegur. En tilviljun og ekki tilviljun, það var fátítt fyrir Hrunið að Sigurður Kári væri að beita sér fyrir öðru en sölu á víni í búðum, það virðist hafa verið hans helsta hugðarefni og hugsjón í þingstörfum.

Það er gott að Sigurður Kári skuli vera að þroskast og átta sig á því að þetta brennivínssöluhugðarefni er voða  2007 og virkar lítið núna til að halda atkvæðum kjósenda. Við erum nefnilega núna öll í timburmönnunum eftir valdasetu Sjálfstæðisflokksins og við þurfum engan afréttara. Við þurfum að viðurkenna vanda okkar, horfast í augu við ástandið og öll þjóðin þarf að fara í meðferð. 

Hér er vídeó sem ég tók fyrir framan Alþingishúsið 20. janúar síðastliðinn, einmitt þegar Sigurður Kári var innan dyra að tala eina ferðina ennþá um nauðsyn þess að selja brennivín í kjörbúðum:

Spurst fyrir um sumarannir á Alþingi

Háskólastúdentar réttlausir í kreppunni

Það er gott að háskólastúdentar bendi á hvað það er gríðarlega erfitt ástand og hvað það bitnar hrikalega illa á þeim. Aðstæður eru þannig á Íslandi að framhaldsskólanemar og háskólanemar eru eins og farandverkafólk sem kemur inn á vinnumarkaðinn þrjá til fjóra mánuði á ári, yfir sumarmánuðinn.

Einu sinni var þetta hið besta mál, það var ómögulegt að hafa unga fólkið bundið í skólum yfir hábjargræðistímann og skólahald var enda í sveitaskólunum hagrætt þannig að krakkarnir gætu hjálpar til við bústörfin og væru ekki tepptir í skólum þegar sauðburður hæfist á vorin. Í flestum löndum byrjaði og endaði skólahald í takti við uppskerustörfin, það þurfti að passa að mannskapur væri til að setja niður kartöflur á vorin og taka upp uppskeruna að hausti.

Síðustu áratugina hefur þetta samband skólans og taktsins í matvælaframleiðslu í heimabyggð rofnað, atvinnulífið er orðið svo vélvætt og tölvuknúið að sveitakrakkarnir eru kannski mest inn í bæ að horfa á vídeó og sörfa á Netinu, það er ekki lengur þörf fyrir vinnuafl þeirra við framleiðsluna. Krakkarnir í sjávarplássunum eru ekki lengur mikilvægt vinnuafl því vinnslan hefur flust annað, núna er aflinn unninn út á sjó  og keyrður á milli  staða.

Vegna spennunnar og þenslunnar sem hefur verið í íslensku atvinnulífi yfir sumartímann þá erum við núna illa undir það búin að það sé mikið af fólki sem ekki er þörf fyrir við frumframleiðslu eða byggingarstörf. En við skulum ekki gleyma að það var einmitt  undirstaða þeirrar heimsmenningar sem við búum við að það þurftu ekki allir að vera að strita fyrir hinu daglega brauði, það var svo mikil framleiðni í samfélaginu að einungis hluti þurfti að vinna við framleiðsluna.

Núna stöndum við frammi fyrir því að margir skólanemar fá ekki vinnu og aðstæður eru þannig á Íslandi að  námslánakerfið tekur ekki mið af því og skólakerfið tekur ekki mið af því að þessar aðstæður geti komið upp. 

það er gríðarlega mikilvægt að aðhafast eitthvað af stjórnvöldum til að mæta þessum aðstæðum. Margir háskólastúdentar eru í hugvísindum og félagsvísindum og kennslufræðum, laganámi eða viðskiptagreinum eða heimspeki og tungumálum. Í þessum greinum er ekki um að ræða rándýr tilraunatæki og mikla og dýra aðstöðu til að skapa vinnu eða nám fyrir nemendur. það er því tiltölulega einfalt, fljótlegt og kostar lítið að búa til aðstöðu og það er vel hægt að sinna ýmis konar þróunarstörfum sem hingað til hafa setið á hakanum með því að fá stúdenta í vinnu.

Það er afar einkennilegt ef málið er þannig núna að eina sem býðst háskólanemum fyrsta sumarið sem kreppan stendur yfir að skrá sig í sumarnámskeið í dýran einkaskóla (háskólann í Reykjavík) og borga há skólagjöld  til þess eins að eiga til hnífs og skeiðar í kreppunni.

Er ekki einkennilegt að háskólanemar þurfi að borga með sér í kreppunni og hafi enga aðra úrkosti til að bregðast við þessum aðstæðum nema skrá sig í dýrt sumarnám hjá einkaháskóla til að eiga kost á því að fá námslán  til framfærslu og til að borga skólagjöld?

Er þetta virkilega sá valkostur  sem ríkisstjórn Samfylkingar og Vinstri-Grænna ætlar að bjóða íslenskum háskólastúdentum upp á í ár? Það er ansi nöturlegt að þegar allt hefur farið á hliðina á Íslandi í einhvers konar einkavæðingaræði þá sé eini valkosturinn að bjóða atvinnulausum háskólanemum sem ekki hafa rétt til atvinnuleysisbóta og ekki hafa rétt til námslána nema vera í skráðu námi - upp á þann eina valkost að skrá sig í sumarnám með dýrum skólagjöldum - sumarnám í einkaháskólum sem þó eru nánast að öllu leyti kostaðir af ríkisfé.

Er það þannig að þegar einkavæðingin hefur mistekist á öllum sviðum og íslenska ríkið nánast gjaldþrota og þúsundir ungs fólks hefur ekki annan valkost en vera í skólum þá sé því sagt að borga bara fyrir sig sjálft með að taka lán til framfærslu og skólagjalda í einkaháskólum?

Það er eitthvað ekki í lagi í íslensku samfélagi, það hefur engin umræða farið fram um einkavæðingaræðið sem teygði sig inn í skólakerfið.

Aðstæður eru þannig núna að þegar háskólanemar sem núna eru við að ljúka námi koma út á vinnumarkað þá er mjög ólíklegt að þeir geti fengið vinnu. Það er því ekki mjög gott að vera með miklan skuldabagga á herðum.

Í nágrannalöndum okkar þá er hluti af því sem námsmenn fá styrkur sem öllum þegnum í háskólanámi býðst í nokkur ár. Hér eru öll námslánin vísitölutryggt lán sem bera vexti. 

Námsmenn örvænta um sumarið

Bein útsending frá kosningamiðstöð Framsóknar

Þetta er tilraun. Ég er með rásina http://ustream.tv/channel/framsokn og sendi núna beint út héðan úr Borgartúninu. Allt á fullu hérna eins og vanalega!

Útsendingu lokið. Allt gekk vel.

Samfylking áfram stærst

Sigurður Kári er vandi heimilanna

Sumir þingmenn Sjálfstæðismanna kunna ekki að skammast sín. Eftir að hafa steypt þjóðinni í glötun með stefnu sinni og hömluleysi og einkavæðingaræði, stefnu þar sem ágóði í ársreikningum gervifyrirtækja var notaður í blindni sem eini mælikvarðinn á velsæld og eftir að hafa blekkt okkur  misserum saman  til að halda að efnahagsstjórnin væri í traustum höndum hjá þeim þrátt fyrir að við vitum núna að lengi hefur þjóðin rambað á barmi hengiflugsins í bankaútrásaræði og ráðherrar Sjálfstæðisflokksins vissu það líka en lugu að þjóðinni, eftir allt þetta þá reynir sumir sitjandi þingmenn Sjálfstæðisflokksins að tefja öll mál og hlykkja sig eins og naðra og læsast utan um allt sem getur hreyft við og bætt lýðræði og stjórnsýslu í þessu landi og komið á stað alveg lömuðu athafnalífi.

Það er grátbroslegt  að lesa í frétti svona orð:

"Sigurður Kári Kristjánsson, þingmaður Sjálfstæðisflokksins, sagði eðlilegt að ræða um breytingar. Gallinn er sá, að þetta stjórnarskrármál leysir engan vanda heimila eða fyrirtækja.  Væri ekki vænlegra að ræða atvinnumál ungs fólks í landinu? spurði Sigurður Kári. "

Málið er það að Sigurður Kári er einkar gott tákn um þá æskumenn sem átt hafa sviðið í Sjálfstæðisflokknum undanfarin ár og  það má skoða ferill hans á þingi til að sjá hvaða málum hann hefur barist fyrir á þingferli sínum. Eru það atvinnumál ungs fólks? Er það vandi heimila á Íslandi og lífskjör fólks á Íslandi? Nei, það örlar ekkert á því. Satt að segja þá held ég að Sigurður Kári hafi aðeins haft eitt hjartans mál undanfarin ár. Það er að selja áfengi í kjörbúðum. Hann hefur verið svo óþreytandi við nuddast í því máli að ég hef stundum gleymt að hann er þingmaður og  haldið að hann væri einhvers konar almenningstengslafulltrúi einhverra víninnflytjenda.

Svo er Sigurður Kári ekki fremur en allir blindir markaðshyggjumenn  neitt næmur á hvað er að gerast í umheiminum. Þannig drap ég niður í eina nýlega ræðu frá honum, ræðu sem hann flytur jafnvel þó að það sé þegar komin merki um að hrikti í húsnæðislánakerfinu víða um lönd vegna undirmálslána í Bandaríkjunum.  Sigurður Kári hins vegar eins og aðrir Sjálfstæðismenn stakk bara höfðinu í sandinn og hjakkaði í einhverjum einkavæðingar- bankaglópagullsgír og sagði rétt fyrir hrunið þetta á þingi (lok febrúar 2008) :

"Ég er ekki í neinum vafa um það að Framsóknarflokkurinn og málshefjandi vilji hlut íslenskra viðskiptabanka sem mestan en ef menn segja A verða þeir líka að segja B. Það þýðir að ef menn vilja að bönkunum vegni vel verða þeir að opna augun fyrir því að það sé hugsanlega nauðsynlegt að jafna samkeppnisstöðu bankanna gagnvart ríkisbankanum, Íbúðalánasjóði. Ég er ekki að segja að það eigi að leggja Íbúðalánasjóð niður en við eigum að opna augun fyrir því að það er eflaust ástæða til að draga úr hlutverki sjóðsins miðað við hvert það er í dag."

Sigurður Kári er vænsti drengur og hann kannski áttar sig einhvern tíma á hve ógæfulegt er að kjörnir fulltrúar fólksins berjist ekki fyrir neinu nema blindri einkavæðingu, hömluleysi og áfengisdrykkju. Það er kannski best fyrir þá Sjálfstæðismenn sem vilja ábyrga stjórn í þessu landi að loknum kosningum að hvíla þingmenn eins og Sigurð Kára og gefa honum tækifæri til að ná einhverjum þroska. 

Það gera Sjálfstæðismenn best með að segja B og kjósa Framsóknarflokkinn í næstu kosningum.

 

 

Vilja vísa stjórnarskrármáli frá

G20 fundur í grafalvarlegu heimsástandi

 

Það er ekki aðeins Ísland sem er með ónýtan gjaldmiðil. Það er allur heimurinn með ónýtt fjármálakerfi og núna stendur yfir neyðarfundur G20 en það er fundur 20 valdamestu ríkja heims. Það skiptir Ísland miklu hvað kemur út úr þessum fundi. Það mun skipta sköpum fyrir uppbyggingu eftir hrunið hér á Íslandi hvenær fer að rofa til í umheiminum í kringum okkur.

Ef ekkert verður að gert af hálfu stjórnvalda og ekki samhæfðar aðgerðir milli landa þá getur farið illa. Það getur hreinlega farið svo að ríki sem núna eru voldug liðist í sundur og borgarastyrjöld og róstur brjótist út í löndum sem hingað til byggja á langri lýðræðishefð.  það skiptir miklu máli hvað gerist í Bandaríkjunum. það getur verið að ástandið þar sé miklu verra en kemur fram í fréttum, ríkið er stórskuldugt og fjármagnar sig með lánum.  Einstök fylki eins og California eiga í miklum erfiðleikum.

Búist er við  að áherslumunur verði milli USA annars vegar og Þýskalands og Frakklands hins vegar eða "among them are French and German calls for fast and far-reaching financial regulation, while the U.S. has stressed stimulus plans and argued for a lighter regulatory approach to some parts of the financial world, particularly hedge funds." þ.e. Evrópuríkin kalli á meiri reglur og höft á fjármagnsflæði. 

Staðan er sem sagt þannig að USA berst fyrir auknu frelsi og minni hömlum með þeim röksemdum að það verði innspýting í lamað fjármálakerfi en Þýskaland og Frakkland vilja koma meiri böndum opinberra aðila yfir fjármálakerfi heimsins m.a. til að koma í veg fyrir skattaskjól og stjórnlaust fjármagnsflæði.

Það er hápólitískt mál hvernig þessi G20 fundur fer og ríkisleiðtogar þurfa að búa til sýningar í kringum sig til að róa öldurnar heima fyrir. það er samt eitt öruggt, það er að valdatilfærslur eru að verða í heiminum og það er hvorki Evrópu né Bandaríkjunum í vil.  

Hér er grein í Nyt.com um fundinn:

At Summit, Obama Faces Calls for Finance Rules

það er þörf á gríðarlega viðamiklum aðgerðum ef á að koma lömuðu fjármálakerfi heimsins á eitthvað hringsól, það er líklegt að of miklar opinberar hömlur hafi þveröfug áhrif. Það er samt alveg öruggt að í öllum löndum þá er ríkisvaldið eina aflið sem núna getur stutt við atvinnulíf og það verður að vera einhvers konar ríkisrekstur amk um nokkra hríð.

Við þurfum öll að verða hagfræðingar núna og kosningabaráttan er ekki rekin með gjálfuryrðum heldur með upplýstri umræðu um efnahagsmál. Efst í þessu bloggi er nýtt myndband þar sem ein af efnahagstillögum Framsóknarflokksins er útskýrð.

hér eru svo myndband sem útskýrir hvernig kasínókapítalískt bankakerfi virkar og hvernig það býr til bólupeninga úr skuldum.

 

Viðræðurnar að hefjast