Útileigumenn í Ódáðahraun, eru kannski að smala fé á laun - Sjóður9 og sjóður Sjálfstæðisflokksins

Ég er að hlusta á útvarp sögu, þar er maður að tala um bók Einars Kárasonar Jónsbók en í þeirri bók þá mun Jón Ólafsson halda því fram að Sjálfstæðismenn hafi krafið hann um 5 milljón króna gjald í sjóð Sjálfstæðismanna en Jón neitað og Jón taldi að þetta væri undirrót óvildar Sjálfstæðisflokksins í sinn garð. Nú er Jón Ólafsson vatnsölumaður svo sannarlega enginn engill  en saga hans í þessu verður aðeins trúverðugri núna þegar maður veit hve ófyrirleitnir Sjálfstæðismenn voru þegar smalað var fé inn í sjóði flokksins.

Ég sá líka á forsíðunni utvarpsaga.is ágæta samantekt um Sjóð 9 hjá Glitni, sjóð sem ég vissi ekki að væri til fyrr en eftir Hrunið þaðan af síður hve beintengdur sá sjóður var Sjálfstæðisflokknum, mér virðist satt að segja að Sjálfstæðisflokkurinn hafi í gegnum ýmis konar flækjur plantað sínum lykilmönnum alls staðar þar sem fé safnaðist saman og einhvern veginn farið að halda að allt fé í öllum sjóðum væru þeirra spilapeningar sem þeir gætu möndlað með að vild.

Ég var  búin að gleyma þessu Sjóð 9 máli, mér fannst ákaflega undarlegt að Illugi var ekki látinn svara betur fyrir það mál í prófkjöri Sjálfstæðisflokksins nýverið en ég hef nú ekki djúpan skilning á stjórnmálahegðun Sjálfstæðismanna, ég hef t.d. heldur aldrei skilið hvernig þeir hampa dæmdum fjárglæpamanni eins og Árna Johnsen og fannst ekkert athugavert við einkafjármálabrölt Árna Matthíassen fyrir sig og sína fjölskyldu eða kúlulánum Þorgerðar Katrínar og fjölskyldu hennar.

En ég botna bara ekkert í trúgirni og þolgæði sumra  Sjálfstæðismanna, það er frábært að sjá að Stefán Friðrik er alveg búinn ð missa þolinmæðina. En hvernig getur jafn greind og ágæt kona og Áslaug Friðriksdóttir sagt þetta auma yfirklór Snör og heiðarleg viðbrögð og þetta  sjóðasukk Illuga Illugi hefur gert hreint fyrir sínum dyrum?

Auðvitað vill Áslaug eins og aðrir góðir Sjálfstæðismenn trúa hinu besta um sína leiðtoga en Guðlaugur Þór er í efsta sæti í Reykjavík norður og Illugi Gunnarsson í efsta sæti í Reykjavík suður  en það bókstaflega öskar á mann að það sé mjög mikið að hjá leiðtogum Sjálfstæðisflokksins og þessi mál tengjast verulega. Það er um sömu fyrirtækin að ræða og það eru sömu hagsmunirnir. Og þessi mál tengjast hugsanlega REI málinu og hvernig reynt var leynt og ljóst að sölsa undir einkafyrirtæki orkuauðlindir Íslendinga. 

Það er ekki fyrir nokkurn mann að skilja allan blekkingarleikinn með fyrirtækin sem velktust til og frá enda var leikurinn gerður til að villa um fyrir almenningi, við sjáum það núna. Sjá t.d. þessa frétt FL Group verður Stoðir

Hér eru upplýsingar um þetta fyrirtæki FL Group eða Stoðir, fyrirtækið sem gaf stórar fúlgur í kosningasjóð Sjálfstæðismanna og það voru hlutabréf í þessu fyrirtæki sem Illugi Gunnarsson lét kaupa út úr Sjóði 9.

Hér klippi ég út pistilinn um þetta Sjóð 9 mál frá vefsíðu utvarpsaga.is

Sjóður undir stjórn Illuga Gunnarssonar kostaði skattgreiðendur 11 milljarða.

 föstudagur, 20 mars 2009

Sjóður undir stjórn Illuga Gunnarssonar kostaði skattgreiðendur 11 milljarða. Fullyrðingar um sjóðinn á heimasíðu Illuga standast ekki
raunveruleikann.

Það sem Illugi þarf meðal annars að svara:

-Hver var þáttur Illuga í neðangreindri ákvarðanatöku og atburðarás?

-Var hlutdeild skuldabréfa í eignasafni sjóðanna orðin of há miðað við samþykktir og fjárfestingarstefnu þannig að losa þyrfti bréf út úr
sjóðnum?

-Samrýmist það að hans mati góðum stjórnsýsluháttum að alþingismaður og fulltrúi í fjárlaganefnd þingsins sitji í stjórn sjóðs sem lýtur eftirliti
Fjármálaeftirlitsins, sem svo lýtur yfirstjórn ríkisvaldsins?

Afskipti ríkisstjórnarinnar af sjóði 9.

Þann 29.september 2008 yfirtók ríkið Glitni, þegar 75% í bankanum voru yfirtekin. Tveir fundir voru haldnir í stjórn Glitnis daginn eftir yfirtöku
ríkisins þann 30. september 2008 þar sem aðallega var verið að ræða mál Glitnis
sjóða hf.

Úr fundargerð stjórnar Glitnis frá 30. sept. 2008 kl. 8:00.

Á fyrri fundinum kl. 8:00 útskýrðu Lárus Welding og Eggert Þór Kristófersson stöðu sjóða Glitnis. Vegna ástands á fjármálamörkuðum og vegna
þess að ríkið hafði eignast 75% í bankanum, var talin umtalsverð hætta á því að
sjóðirnir gætu orðið fyrir miklum innlausnarhöggum. Þar sem eignastýringin sé
það mikilvæg tekjulind fyrir bankann er það mikilvægt að varðveita traust og
áreiðanleika sjóðanna. Það er því lagt til að bankastjórum verði veitt heimild
til þess fyrir hönd bankans að kaupa út úr sjóðunum skuldabréf sem gefin hafi
verið út af Stoðum, Baugi group og tengdum aðilum að fjárhæð 35 milljarðar kr.
Lárus Welding útskýrir að hann hafi rætt þetta við forsætisráðherra.

Þessarri tillögu var hafnað af stjórninni.

Úr fundargerð stjórnar Glitnis frá 30. sept. 2008 kl. 21:30.

Á síðari fundinum kl. 21:30 voru lagðir fram minnispunktar frá Lárus Welding. Útskýrði Lárus Welding nauðsyn þess að styðja við sjóðina við núverandi
aðstæður. Hann lagði til að bankinnkeypti allar kröfur á hendur Stoðum með
afslætti. Keyptar yrðu kröfur að fjárhæð 22 milljarðar á 11 milljarða kr. sem
myndi gera sjóð 1 og Sjóð 9 færi á að opna með 7% niðurfærslu. Þetta sé gert til
að varðveita orðspor eignastýringar bankans og koma í veg fyrir innlausnarhögg.
Þettvar kynnt sem áhætta fyrir bankann en enn væri möguleiki á því að
endurheimta þessa fjármuni. Lárus Welding mælti eindregið með því að þetta yrði
samþykkt og lét þess getið að lausn þessi nyti stuðnings bæða forsætisráðherra
og fjármálaráðherra. Þetta var samþykkt.

Stjórn Sjóðs 9 og rangfærslur Illuga Gunnarssonar alþingismanns. Í stjórn Sjóðs 9 var Illugi Gunnarsson alþingismaður og fyrrverandi aðstoðarmaður
þáverandi Seðlabankastjóra.

Á heimasíðu hans er sérstaklega fjallað um Sjóð 9. Sjóðurinn átti á þessum tíma 30 milljarða í Baugstengdum fyrirtækjum eða sem nam um þriðjungi af
heildareignum sjóðsins.

1. Þar segir m.a. að Glitnir hafi hafi verið einkabanki þegar bankinn hafi ákveðið að koma með þessum hætti inn í sjóð 9. Með hliðsjón af því sem að ofan
er rakið, er þetta rangt, auk þess sem ákvörðun um þetta var tekin af forsætis-
og fjármálaráðherra; fulltrúa eigenda bankans.

2. Enn fremur segir á heimasíðu Illuga að bankinn hafi verið að nýta viðskiptatækifæri með því að kaupa bréf útgefin af Stoðum með miklum afslætti.
Með hliðsjón af því að Stoðir voru á þessum tíma komin í greiðslustöðvun sem er
undanfari gjaldþrots, er ljóst að skuldabréfin voru einskis virði.

3. Að auki kemur það fram á heimasíðunni að engir fjármunir hafi runnið úr ríkissjóði vegna þessa. Hafa ber í huga að á þessum tíma er Glitnir kominn í
eigu ríkisins; fjármunirnir komu úr Seðlabankanum og ríkissjóður lánaði
Seðlabankanum síðar. með öðrum orðum eru það skattgreiðendur sem borga
brúsann.

 

 

 

 

 

 

 

 

 

Söfnuðu fé fyrir flokkinn

upprisan á páskadag - fjöreggjasteypa

Jólin eru skammdegishátíð, hátíð þar sem fólk fagnar ljósinu og minnir sjálfa sig á að veturinn muni enda og nýtt líf kvikna að vori. Jólin eru um það leyti þegar kringla jarðar snýst þannig að daginn tekur aftur að lengja, ljósið nær tökum á myrkrinu, lífið verður dauðanum yfirsterkari.  Við skreytum tré og við minnumst fæðingar lítils barns og drögum í huga okkar upp senu þar sem stjarna vísar vitringum á fæðingarstað í gripahúsi og það er fagnaðarhátíð.

Páskar eru vorhátíð, á páskum vaknar jörðin  til lífsins að nýju. Við rifjum upp helgisögu þar sem krossfestur maður reis upp frá dauðum.  Í þessari helgisögu er sagan um lífið og dauðann og eilíf þrá mannkynsins að sigrast á dauðanum, að öðlast eilíft líf.

Fréttapressa heimsins reynir að búa til einhvers konar upprisu eins og með þessum greinum í dag 'Positive signs' for China economy og Obama sees 'hope' for US economy  en þetta er innantómt og ég trúi þessum fréttum ekki,  þetta er blekking, ég held að ástandið sé mjög slæmt í Kína og USA og það muni fara versnandi. Þó að Kína sé ekki vestrænt markaðshagkerfi þá er það og önnur asíuríki eins og Japan háð því að selja iðnaðarvörur til Vesturlanda og öll sala dregst núna mjög saman.  Satt að segja eru teikn á lofti að kreppan bitni  mjög harkalega á þeim  Asíuþjóðum sem bæði seldu iðnvarning til Vesturlanda og  lánuðu eða fjármögnuðu á einhvern hátt t.d.  húsnæðisuppbyggingar og undirmálslán í Bandaríkjunum.

Þannig er ástandið, það er mikið ójafnvægi, féð sem er sparnaður í Japan hefur streymt til Vesturlanda vegna þess að vextir eru þar hærri og verið notaðir þar í einhverju peningabóludæmi eins og að fjármagna hérna á Íslandi Kringlur og íbúðahverfi sem engin þörf var fyrir og núna standa auð.  Það er viðbúið að stór hluti af þessum fjárfestingum asíulanda tapist. Bandaríkin eru í þeirri undarlegu stöðu að gjaldmiðillinn er svo stór að þegar órói verður annars staðar þá leitar fé í dollara og veldur gerviþennslu þar og Bandaríkjastjórn fjármagnar sig með því að prenta peninga og safna skuldum. þetta er óhemjustórt dæmi og hvenær springur sú stóra bóla?

En víkjum að stöðunni að Íslandi. Þær bankaskuldir sem okkur er nú sagt að við íslenskur almenningur séum ábyrg fyrir og ríkissjóði okkar beri að borga  hélt ég að væru að stærstum hluta til vegna nokkurra útrásarvíkinga með íslenskt ríkisfang, útrásarvíkinga sem voru ekki íslenskir lengur nema í vegabréfinu, þeir áttu margir hallir og þotur og íbúðir  í útlöndum og voru þar öllum stundum og allir  áttu þeir skjól fyrir peninganna sína  í eignarhaldsfélögum skráðum undir hentifánum undarlegra eylanda. Útrásarvíkingar sem hugsanlega voru leppar aðila sem vildu komast hérna yfir eignir og ná tangarhaldi á íslenskum auðlindum.  Það kann vel að vera að útrásin sem núna hefur breyst í innrás og helskurð á íslensku samfélagi sé að undirlagi stórra alþjóðlegra samsteypna sem nota þessa útrásarvíkinga sem fronta og íslenskan almenning sem ginningarfífl  og hún tengist stjórnmálalegum aðstæðum í heiminum svo sem langtíma orkupólitík stórvelda. Það er miklu einfaldara að lama Ísland með skuldafjötrum en með innrásarher. Það var líka hræbillegt að komast hér til áhrifa og kaupa til liðs við sig þann stjórnmálaflokk sem ráðið hefur ferðinni í efnahagsmálum Íslands  undanfarna áratugi,  það kostaði smáaura að kaupa sér velvild Sjálfstæðisflokkins eins og nýlegt styrkjahneyksli Sjálfstæðisflokksins segir okkur. 60 milljónir eru fáránlegir smáaurar miðað við skuldastöðu Íslands núna, bara tippsið sem ráðuneytisstjóri fjármálaráðuneytisins (sjálfstæðismaðurinn Baldur Guðlaugsson)  fékk undan öllum öðrum um valta stöðu bankanna varð til að hann persónulega gat selt hlutabréf fyrir 100 milljónir rétt fyrir hrun og  bara fjármálaráðgjöfin  sem núverandi aðaleigandi morgunblaðsins fékk um stöðu glitnis  rétt fyrir hrun var miklu meira virði. 

En það er ekki einu sinni þannig að þær skuldir sem núna eru að sliga okkur séu tilkomnar í gegnum leppi með íslenska kennitölu. Núna er einn skrattakollur í viðbót orðinn einhvers konar útrásaríslendingur, þessi mun heita  Robert Tchenguiz. 

Á páskadag skulum við rifja upp málsháttinn að ekki sé gott að setja öll egg í sömu körfuna um leið og við lesum þetta:  "Lán Kaupþings til fyrirtækja á vegum Tchenguiz námu 230 milljörðum króna sl. sumar eða um 46% af innlánum bankans".

Hvers konar stofnanir voru eiginlega íslensku bankarnir?  Voru þeir orðnir að einhvers konar svikamyllum og pýramídafyrirtækjum og blekkingarvefjum?

Það væri gott ef ástandið í heiminum væri þannig að einhver upprisa væri í sjónmáli. Hér á Íslandi er ekki svo, við  trömpum hérna  á eggjaskurninni eftir allt fjöreggjakastið, það kemur aldrei nýtt líf úr eggi sem hefur brotnað og eina sem við getum gert er að búa til úr eggjaskurninni einhvern jarðveg sem ný fræ geta vaxið í. En við getum líka steypt ný fjöregg, við þurfum ekki að vera komin upp á verksmiðjuframleiddar lausnir, lausnir sem hæfa alþjóðlegu hagkerfi þar sem bóluvélar og sjónhverfingar þyrla pappírum til og frá.

Táknmynd páskanna eru eggin. Núna eru eggin húðuð súkkulaðiegg. Ég gerði fyrir 11 árum páskavef sem ennþá er óbreyttur. Þar er ein síðan um hvernig maður býr til eigin páskaegg.  Fyrir hverja páska hefur einhver skrifað mér og spurt um hvar þessi páskaeggjamót fáist, ég held að núna hljóti að vera fleiri núna sem vilja gera sín eigin páskaegg. Eða fjöregg.

 

Kaupþing yfirtekur viðskiptaveldi Tchenguiz

Sjarmi yfir þessari hústöku

Það er bara flott hjá hústökufólkinu að taka yfir húsið á Vatnsstíg ef það er satt sem kemur fram í fréttinni að húsið hafi staðið autt lengi og fólkið hafi byrjað að hamast við að þrífa húsið og ætli nú að nota það undir einhverja rótttæka starfsemi. Ég sá auglýsingu á facebook frá þessum hópi sem vakti athygli mína, það var auglýsing um að setja upp fríbúð.

Þessi hugmynd um fríbúð og að taka yfir húsnæði með  samfélagsleg markmið í huga, með eitthvað annað í huga en sölsa undir sig eigur annarra er alveg í takt við mína hugmyndafræði og það hvernig við tökumst á við þær gríðarlega erfiðu aðstæður sem núna skella á okkur.  Við munum  dagana fram að kosningum lifa í blekkingu, stjórnvöld hreinlega þora ekki að horfast í augu við fólkið í landinu og segja því hversu alvarlegt ástandið er og láta eins og það sé "business as usual".

Við verðum að átta okkur á því að það er kerfishrun, ekki bara á Íslandi heldur í öllum heiminum og það lagast ekkert í gegnum þetta sama kerfi sem hrundi, það er alveg í tætlum og það eru ekki mikil líkindi á því að altumfaðmandi stjórnvöld sem birtast okkur í gervi Jóhönnu Samfylkingarformanns geti ráðið við málið, sérstaklega ef þau sömu stjórnvöld neita að horfast í augu við vandamálið og virðast ekki skilja að við óhefðbundið vandamál ganga ekki hefðbundnar lausnir. 

Jóhanna gat ekki einu sinni barið í borðið og dröslast á þennan afmælisfund Nató, ein þjóðarleiðtoga í Evrópu sat hún heima og glundraði þar með niður óhemjugóðu tækifæri til að tala máli Íslands og lýsa óánægju sinni með að bandalagsþjóðin Bretar hefðu ekki verið nein bandalagsþjóð okkar heldur skellt hryðjuverkalögum á heila þjóð út af einhverju fjármálastússi netbanka sem er okkur almenningi á Íslandi alls óviðkomandi.

Við svona aðstæður eins og núna eru komnar upp þá passa engan veginn þær leikreglur sem hingað til hafa gilt og virkað vel. Okkur er innprentuð virðing fyrir eignarétti og okkur er innprentað að skuldaviðurkenning sé kvöð sem við verðum að borga. Núna eru hins vegar þannig aðstæður að verða á Íslandi og í Reykjavík að hætta er á að stór hluti húsnæðis, sérstaklega atvinnuhúsnæðis sé ekki í notkun, rekstri hafi verið hætt af því að fyrirtækin urðu gjaldþrota og svo koma einhverjir og segjast eiga gífurlegar kröfur á okkur fólkið í landinu sem við verðum að borga, ríkissjóður sé með einhvers konar fjárglæfrum og fjárglæringum ábyrgur fyrir því sem útrásarvíkingar og bankaeigendur gerðu.  Það er engin leið fyrir okkur að borga þessar skuldir og við eigum að horfast í augu við það strax og neita að borga. Við verðum sem þjóð að semja um það sem við getum borgað.

Á sama hátt verðum við að skilja að það verður að afskrifa hluta af skuldum fyrirtækja og einstaklinga á Íslandi, annars verður algjört hrun hérna og stór hluti fólks getur ekki staðið í skilum og hefur enga leið aðra en lýsa sig gjaldþrota.

Stór hætta er á því að Reykjavík fari að líta út eins og eitt alsherjar slömm ef hér verður fullt af húsum í eigu einhverra fjármálastofnana og skiptastjóra og annarra sem ekki vita hvað þeir eiga að gera við þessi hús. Það er algjört hrun á leigumarkaði núna og það er öllum til hagsbóta að sem mest af húsnæði í Reykjavík sé nýtt af skapandi fólki sem getur sáð fræum hugmynda og virkja fólk til sameiginlegs átaks. Eiginlega eru núna að skapast góðar aðstæður fyrir ýmis konar listræna sköpun í Reykjavík og Reykjavík er svona víbrant borg, hér gerast hlutir, hér er borg á heitum reit.

En svona yfirtaka þarf að vera formgerð með einhverjum hætti til að tryggja rétt þeirra sem eiga eignina og til að tryggja rétt þeirra sem taka yfir eign. Bendi hér á góðan pistill hjá Tinnu Hústökulög! Taka 3 um svona lagasetningu.

Þær aðstæður sem við sjáum núna í Reykjavík hafa verið oft í öðrum borgum og svona hústaka var bara eðlileg leið til að komast yfir húsnæði í Amsterdam þegar ég var þar, ég heimsótti fleiri en eina fjölskyldu sem hafði fengið sitt húsnæði með yfirtöku. Það var kallað kraken ef ég man rétt.  Það hafa verið sett sums staðar hústökulög. Við ættum að huga að svoleiðis hérna.

Mér finnst upplagt að líta á svona hústökufélög sem eins konar samvinnufélög. Það sem heillar mig mest í þessu er að þetta er kerfi sem hafnar peningum. Það er nefnilega meinið við þetta hagkerfi sem við trúum í blindni á núna. Við höldum að engin efnahagsleg samskipti, flæði og verðmætasköpun geti átt sér stað nema það sé mælt í peningum. Ég heillast líka mikið af svona fríbúðum. Það ættu að vera kaupfélög nútímans, svona búðir þar sem þú tekur út eftir þörfum og leggur inn svona ef þú ert í stuði og átt eitthvað sem þú heldur að annar geti notað.

Ég tek sjálf þátt í ýmsum svona samvinnuhreyfingum á Netinu. Þannig skrifa ég oft greinar á íslensku wikipedia og ég er heilluð af svona Almenningum  (á ensku Commons), svona gagnasöfnum og verkfærabönkum sem eru alveg galopin og eru starfendafélög, stýrt af þeim sem taka þátt. Margir halda að svona félög séu óreiða og glundroði en málið er það að sífellt fleira af framleiðslu og sköpun í samfélagi nútímans með þessum hætti og það er að brotna upp þessi skýra markalína sem var milli framleiðanda og neytanda. 

Hér er grein sem lýsir þessum commons hugsunarhætti  Rizhome:Grassroots Conspiracy

Við erum sjálf í auknum mæli að búa til og skapa það sem við notum, oft með því að endurblanda því sem aðrir hafa gert á undan okkur. Við erum á tíma endurblöndunar (remix) og margar leikreglur eins og ýmis konar réttarreglur t.d. höfundarréttur eru alveg á skjön við það sem við þurfum við listsköpun og framleiðslu í svoleiðis kerfi. í þeim hreyfingum sem ég tek þátt í hafa sprottið upp lausnir m.a. annars konar réttarreglur varðandi eignarrétt á hugverkum, svo sem creative commons. Þó áhugi minn hafi hingað til fyrst og fremst beinst að hinum  stafrænu rýmum og stafrænum verkum þá held ég að sama gildi um margt annað. Eignarétturinn eins og við höfum skilgreint hann er ekki að passa við samfélagsgerðina sem við erum með í dag.  

Hústökufólk á Vatnsstíg

Mannfórnir í Valhöll

Hér til hliðar er mynd sem ég tók af Valhöll í vetur þegar mótmælendur höfðu í skjóli nætur úðað þar allt með rauðri málningu.

Núna er föstudagurinn langi og Valhöll lítur aftur út eins og vettvangur mikils blóðbaðs. Og það liggur í loftinu að blóðbaðið er rétt að hefjast. 

Atburðarásin er ekki trúverðug. Svo mikil  er tortryggni okkar gagnvart Geir Haarde sem stýrði Íslandi þegar Hrunið mikla varð að við trúum honum ekki einu sinni lengur þegar hann játar á sig glæpi. Ég trúi ekki einu orði af því sem hann segir núna, það er alveg sama þó Geir játi á sig mútur, ég trúi honum ekki. 

Sérstaklega finnst mér skrýtið að hvað Geir er fljótur að taka þetta 60 milljón króna mál á sig núna, getur verið að hann hafi verið spurður um þessa sömu styrki þegar hann var forsætisráðherra og formaður Sjálfstæðisflokksins og þá neitað tilveru þeirra? Afneitaði Geir öllu þegar hann var forsætisráðherra og formaður, játar Geir öllu núna þegar hann er farinn af vettvangi stjórnmála? 

Bæði Geir Haarde og Ingibjörg Sólrún glíma nú við erfið veikindi og ég vona að þau nái sem fyrst tök á veikindum sínum og skrifi í fyllingu tímans endurminningar sínar svo við fáum einhvern botn í hvað hefur verið að gerast í íslenskum stjórnmálum undanfarin misseri.

Þegar svona uppljóstranir koma fram þá er óhjákvæmilegt að það leiði til einhvers uppgjörs. Núna hefur það gerst að Andri Óttarsson hefur látið af starfi. Það kemur samt í ljós að hann hafi ekki óskað eftir þessum styrkjum frá FL Group og Landsbankanum. Það er samt nokkuð ljóst að hann hefur vitað af þessum styrkjum enda kom þetta inn á starfsvettvang hans.  Andri Óttarsson vakti athygli mína sem einn af Deiglupennum, hann skrifaði oftast mjög málefnalegar og góðar greinar, eina undantekningin var þegar hann skrifaði tvær greinar þar sem hann hallmælti femínistum og þeim aðgerðum sem við gripum til í viðleitni okkar til að benda á hrikalegan órétt og mannréttindabrot í samfélaginu. Andri er lögfræðimenntaður og hann hefði átt að sjá að þessi framlög í kosningasjóði voru á ysta jaðri þess sem siðlegt er og löglegt.

það kemur hins vegar víða fram að upptök þessa máls eru ekki hjá Andra og honum er fórnað vegna þess að ennþá hafa ekki þeir aðilar stigið fram sem söfnuðu þessu fé.  Það hlýtur að gerast fljótlega. Ég óska Andra velfarnaðar og vona að hann taki aftur upp þráðinn sem málefnalegur hugsjónamaður eins og hann var á þeim tímum þegar hann skrifaði greinar inn á Deiglan.is

það er ömurlegt fyrir okkur öll að fylgjast með þessum blóðsúthellingum í Valhöll. Við sem fylgst höfum með Sjálfstæðismönnum vitum að margir þeirra eru heiðarlegir hugsjónamenn. Það er hins vegar þannig að Sjálfstæðisflokkurinn er málsvari athafnamanna og peningamanna og það er raunar eðlilegt að þeir sækist eftir áhrifum m.a. í gegnum fjárframlög. Að sama skapi er mikilvægt að völd þeirra séu takmörkuð svo flokkurinn sé ekki verkfæri í höndum ákveðinna aðila. Það þarf því þannig vinnuaðferðir eins og Kjartan Gunnarsson upplýsti að tíðkuðust á valdatíma Davíðs, vinnuaðferðir þannig að enginn einn aðili mætti leggja of mikið í kosningasjóð og að kjörnir fulltrúar hefðu ekki beina milligöngu um styrki.

 

Ég reyndar notaðu tækifærið og gúglaði smávegis um viðkynni mín af Deigluliðinu og fann t.d. þetta sem ég skrifaði árið 2003. Þá voru einhverjar væringar milli Deiglan.is og frelsi.is 

 

Ég verð að segja að þessar væringar milli fylkinga eru svo óspennandi að ég bara hreinlega hef mig ekki í gegnum eina af þessum fjölmörgum frelsi-frjálshyggjumanna langlokum á deiglunni. Á líka nóg með að lesa og fylgjast með öllum öfga-þetta-og-öfga-hitt greinunum sem spýtast út úr deiglupennum. Hef bara tekið eftir því að allt sem horfir til mannréttinda og framfara hér á landi er kallað öfgar hjá deigluliðinu. Reyndar líka hinu liðinu hvað-sem-það-nú-heitir sem nú ræður ríkjum á Heimdalli. Því liði virðist vera ennþá meira í nöp við mannréttindi og framfarir og hef ég ekki séð neitt til þess liðs nema eitthvað fáránlegt uppsagnardæmi á Ríkisútvarpinu sem sýnir kannski best að það er ekki bara flott þar á bæ að vera á móti mannréttindum og framförum heldur líka að reyna að kyrkja allt sem gott er gert á Íslandi í menningarmálum - ef þau menningarmál eru þeim ekki hugnanleg.

Maður varð bara reiður þegar stjórn einhvers sundursplundraðs félags út í bæ þar sem 72 manns kusu stjórn (það voru 72 sem kusu í Heimdallarkosningunum síðustu var það ekki???) þykist geta sent RÚV uppsagnarbréf fyrir hönd íslenskra skattborgara. Er þetta fólkið sem vill starfa í lýðræðisþjóðfélagi og sem er að æfa sig í að stjórna landinu í umboði íslenskra borgara? Eða er það að æfa sig að stjórna landinu án þess að hafa til þess nokkuð umboð....

Geturðu nefnt einhver dæmi um þessa fullyrðingu þína Salvör? Hér er um alvarlega ásökun að ræða gagnvart tæplega fimmtíu deiglupennum og fróðlegt væri að sjá rökstuðning fyrir henni

Hmm... kannski full djúpt í árina tekið að segja að ALLT sem horfir til framfara sé kallað öfgar. En nógu mikið er það samt

En ég nefni þessi dæmi sem ég fann strax:

http://www.deiglan.com/4097.html
Öfgar í öndvegi II - höfundur Andri Óttarsson
Ég hef á öðrum þræði hérna á málefnunum bent á hvernig Andri í þessari grein að mínu mati vísvitandi sleppir úr orðum og skekkir myndina.
Ég vísa í það:
http://malefnin.com/ib/index.php?showtopic...indpost&p=52536

http://www.deiglan.com/2311.html
Í skjóli femínisma I - höfundur Andri Óttasson

http://www.deiglan.com/index.php?itemid=2318&catid=123

http://www.deiglan.com/2124.html
Öfgar í öndvegi - höfundur Andri Óttarsson

http://www.deiglan.com/11.html
Á að banna vangadansinn næst? - Höf. Borgar Þór

http://www.deiglan.com/23.html
Kosin til að taka slaginn Guðmundur Svansson

http://www.deiglan.com/63.html
Óþekkta nektardansmærin - höf. Andri Óttarsson


Þetta eru bara nokkrar greinar sem sýna að Deiglupennar skilgreina frelsið þröngt - mér virðist þeir afar áhugasamir um frelsi ungra vestrænna karlmanna til að ýmis konar neyslu og nautna. Deiglupenninn Borgar Þór endar greinina þar sem hann mælir fyrir kjöltudansi sem margir (flestir) telja dulbúið vændi:"Grundvallarmannréttindi eru ekki einhverjar sunnudagsreglur sem brúkaðar eru við sérstök hátíðleg tækifæri. Þeim er einmitt ætlað að vernda frelsi borgaranna fyrir slíkum hugarfarsbylgjum.." Það eru sem sagt grundvallarmannréttindi að fá að kaupa sér kjöltudans...

Þegar kemur hins vegar að hinni hliðinni - að því að horfa á mannréttindi helming jarðarbúa þ.e. allra kvenna þá er annað hljóð í strokknum. Það að undirokað fólk noti þann rétt sem það hefur í stjórnarskránni til að stofna með sér félag og kveikja umræður um femínisma verður einum Deiglupennanum Andra tilefni til að senda frá sér aðvörun þar sem m.a. segir: "Hópar og félög sem hvetja til lögbrota njóta hvorki verndar félagafrelsis né tjáningarfrelsis stjórnarskrár". Það sem er sorglegt er að sá sem þetta mælir er lögfræðingur og hann notar lögfræðingamál til að ljá orðum sínum myndugleika. Hann á að vita það vel að það eru engin lög sem banna félögum að starfa og halda fundi þar sem félagsmenn tjá sig og það getur undir engum tilvikum talist hvatning til lögbrota að leyfa félagsmönnum að tjá sig í á tölvupóstlista. Það sem sagt var á póstlistanum var einnig ekkert af því lögbrot svo ég viti.

Það er einnig sorglegt að deiglupennar sem að jafnaði skrifa eitilsnjallar greinar s.s. Andri Óttarsson og taka á mörgum þjóðfélagsmeinum eru slegnir einhvers konar blindu þegar kemur að mannréttindum helmings þjóðarinnar. Að mannréttindurm helmings jarðarbúa. Að mannréttindum kvenna.

Sjá svo frekari röksemdafærslu mína um deiglupenna hérna

Andri hættir störfum

Stjórnmál og útrásarvíkingar

 Það er náttúrulega grátlegt hvernig komið er fyrir Íslendingum eftir áratuga stjórnarsetu Sjálfstæðisflokksins sem reyndar við gætum nefnt Sjálftökuflokkinn og þetta fyrirbæri einkavæðinguna sem við getum líka nefnt einkavinavæðinguna.

Fyrir mörgum, mörgum árum þá fór ég á fyrirlestur um þróunarmálefni og fyrirlesarinn  hafði starfað í þróunarlandi þar sem stjórnarhættir voru ansi spilltir, bara einhvers konar ættbálkaveldi og sjálftaka þeirra sem voru við stjórn hverju sinni á öll gæði.  Fyrirlesarinn sagði frá því að  öll þróunarverkefni yrði að vinna í sátt við innfædda og þá sem færu með stjórnina. Það skipti öllu máli að þeir hefðu áhuga á verkefninu annars myndi það ekki ná í gegn. Hún nefndi dæmi um að mig um sundlaug eða eitthvað vatnsverkefni, það hefði tekist að ná því í gegn með því að vekja áhuga innfæddra höfðingja.  Ef áhugi þeirra væri fyrir hendi þá gengi þetta en það var ekki nóg að þeir sýndu áhuga, hefð væri fyrir og þeir ætluðust til að fá eignarhluta skráðan á sig  í öllu sem væri byggt án þess að hafa sjálfir lagt neitt til.  það var nokkurs konar skattur á alla starfsemi í þróunarlandinu og það þýddi ekkert að starfa þarna nema fara að þessu, hluti af allri þróunaraðstoð færi að hluta í eignarhluta ættarvelda og stjórnmálamanna. Ég man hvað ég var hneyksluð eftir þennan fyrirlestur, getur þetta verið hugsaði ég, getur verið að Íslendingar og aðrar vestrænar þjóðir séu að veita þróunaraðstoð í svona bananalýðveldi?

Núna mörgum árum seinna átta ég mig á því að svona hefur stjórnarseta Sjálfstæðisflokksins verið. Í gegnum einhvers konar fjármálaflækjur þá hafa þeir sem fengu einhverja fyrirgreiðslu frá flokknum greitt fyrir hana, greitt með því að leggja stórfúlgur í flokkssjóði.

Margir  æðstu menn í Sjálfstæðisflokknum sem ennþá eru í framboði og leiða lista tengjast svona málum. Það er líka þannig að stundum hefur með samvinnu bankastofnana og stjórnmálamanna í Sjálfstæðisflokknum og stórfyrirtækja verið búnir til einhvers konar pakkar til að gefa einstökum aðilum sem stundum eru bræður þeirra þeirra sem eru í framlínu stjórnmálanna alls konar fyrirgreiðslu. Þannig má rifja upp hvað gerðist þegar íbúðir og byggingar sem bandaríski herinn skildi eftir sig voru seldar. Hverjir fjármögnuðu þau kaup þegar bróðir fjármálaráðherra og fleiri Sjálfstæðismenn keyptu? Á hvaða róli er það mál núna? Hver á þessar byggingar núna? Ég geri ráð fyrir að það séu einhverjar af þeim bankastofnunum sem fjármögnuðu þessi kaup - eða kannski er ekkert búið að borga fyrir þessar eignir?

Sjá hérna:

Háskólavellir: Dumping á leigumarkaði 

Annars er hér til gamans tveir þættir sem gera gys af útrásarvíkingum og stjórnmálamönnum samtímans.

Landsbankinn veitti 2 styrki

Sjálfstæðisflokkurinn er að klofna

Við fylgjumst öll þjóðin með píslargöngu  Sjálfstæðisflokksins núna á föstudaginn langa en ég vona að það sé ekki þórðargleði í nokkrum manni.  Við erum öll að tapa ef það stjórnmálaafl sem stærst er á Íslandi og sem stýrt hefur og ráðið öllu á Íslandi er svona innanétið af spillingu að það er ekkert eftir nema nokkrar feysknar spýtur.  Ég hugsa að ef nóg svigrúm hefði verið til og þessar uppljóstranir hefðu komið fram fyrir tveimur mánuðum eða svo  þá hefðu ný framboð Sjálfstæðismanna  komið fram í Reykjavík og Suðvesturkjördæmi.  Það verður hins vegar að skila framboðslistum strax eftir páska og það er of lítill tími fyrir heiðarlega Sjálfstæðismenn sem vilja breytingar að stilla saman krafta sína og koma saman framboði í öllum kjördæmum.

Núna eru efstu menn á lista Sjálfstæðisflokksins í Reykjavík þeir Illugi Gunnarsson og Guðlaugur Þór. Báðir eru þessir menn með fortíð sem veldur því að við erum full tortryggni gagnvart þeim. Illugi var í enkavæðingarnefnd og hefur skrifað marga pistla með áköfum áróðri fyrir sölu og framsali íslenskrar orkuvinnslu, hann hefur unnið leynt og ljóst að því að selja Landsvirkjun. Guðlaugur þór var stjórnarformaður Orkuveitu okkar Reykvíkinga og hann virðist hafa unnið á sama hátt og viljað einkavæða sem mest. Illugi tengist svo illilega þessu Sjóði 9 spillingarmáli og það er borið á Guðlaug Þór að hann hafi safnað fé frá fyrirtækjum sem höfðu mikla hagsmuni að gæta í þessum málum.

Ég vil nú reyndar vara við að sök sé kastað á Guðlaug Þór einan út af þessu máli. Ég geri ráð fyrir að þetta hafi verið samantekin ráð margra valdamikilla manna í Sjálfstæðisflokknum að ná inn sem mestu áður en lögin sem kváðu um að framlög yrði að upplýsa tækju gildi.

Það má bera saman þessa tvo fulltrúa sem leiða lista Sjálfstæðismanna í Reykjavík saman við þau Sigmund Davíð og Vigdísi Hauksdóttur sem leiða lista okkar Framsóknarmanna.

Við Framsóknarmenn héldum Skírdagsreið við Elliðavatn í Heiðmörk á Skírdag, það er nálægt þeim heilaga stað Þingnesi og fyrir mér var þetta eins konar pílagrímsför á slóð forfeðranna, við skulum muna að hér á Íslandi er löng lýðræðishefð og við Framsóknarmenn viljum stjórnlagaþing. Það væri nú við hæfi að hafa táknræna athöfn á hinu forna Þingnesi fyrir okkur hérna á höfuðborgarsvæðinu um leið og við fögnum nýrri stjórnarskrá. Víst er Þingvellir okkar helgasti staður en Þingnes er líka afar merkilegur sögustaður og ef til vill var þar fyrsta þing á Íslandi.

Ari fróði segir í Íslendingabók sinni, að Alþingi hafi verið sett "at ráði Ulfljóts ok allra landsmanna þar es nú nes, en áður var þing á Kjalarnesi, þat es Þorsteinn Ingólfssonr landnámsmanns, faðir Þorkels mána lögsögumanns, hafði þar ok höfðingjar þeir es at því hurfu".
Enginn veit hvar Kjalarnessþing var háð en það er talið að það hafi um tíma verið í Þingnesi.  Kjalarnesþing var  eins konar undanfari Alþingis það var ekki löggjafarþing, heldur aðeins dómþing og  fræðimenn telja líklegt að upptakanna að stofnun Alþingis sé að leita í hópi þeirra höfðingja, sem stóðu að Kjalarnesþingi. 

Það var auðvitað tekið lagið í Skírdagsreiðinni og eitt lagið sem var sungið var "Útileigumenn í Ódáðahraun, eru kannski að smala fé á laun". Þegar ég kom heim og les fréttirnar þá held ég barasta að þessir útileigumenn séu þeir menn í Sjálfstæðisflokknum sem smöluðu á laun fé (60 milljónir) inn í Valhöll. En hér er myndband frá Skírdagsreið okkar Framsóknarmanna.

Við Framsóknarmenn tökum vel á móti öllum þeim mörgu Sjálfstæðismönnum sem óánægðir eru með Sjálfstæðisflokkinn núna og hvetjum ykkur til að koma í  kosningamiðstöðina okkar í Borgartúni 28 og kynna ykkur hvað Framsóknarflokkurinn stendur fyrir núna. já og lært hvernig á að breyta flokki:-) Þar hefur verið unnið mikið uppbyggingarstarf í Framsóknarflokknum og því er ekki nærri lokið. Við þurfum að breyta öllum flokkum í heiðarlegar og lýðræðislegar hreyfingar og virkja grasrótina. Hér er yfirlýsing frá Framsóknarflokknum varðandi styrki sem betur fer þá virðist okkar flokkur ekki hafa tekið við svona styrkjum eins og Sjálfstæðisflokkurinn.

 

Skeytasendingar á vefsíðum

SkírdagsREI Sjálfstæðismanna og Skírdagsreið Framsóknarmanna

Á meðan Sjálfstæðisflokkurinn logar stafnanna á milli og spjótin ganga á milli með meiri þunga en hnífasettin hentust til í Framsóknarflokknum fyrir margt löngu þá nutu Framsóknarmenn í Reykjavík veðurblíðunnar og hinnar fögru borgar Reykjavíkur

Í dag var Skírdagsreið Framsóknarflokksins. Það eru margir Framsóknarmenn miklir hestamenn enda flokkurinn nátengdur sveitinni og íslenskri náttúru.

 Og það er ólíkt skemmtilegra að njóta fyrstu vordaganna  upp í Heiðmörk við Elliðavatn í hópi hestamanna heldur en velta fyrir sér hvort Guðlaugur Þór og Geir sögðu satt og segja satt. Við vitum nú reyndar öll að Geir hefur ekki alltaf sagt satt en það er verra ef sama lenska er hjá Guðlaugi Þór, það er ekki gott fyrir  Reykvíkinga í Reykjavík suður að hafa hann í fyrsta sæti hjá Sjálfstæðismönnum ef hann lýgur mikið. Þá er nú ólíkt betri kostur hún Vigdís Hauksdóttir sem er í 1. sæti hjá okkur Framsóknarmönnum í Reykjavík suður, fólk ætti að bera þau saman og spá í hvort þau vilja frekar sem fulltrúa Reykvíkinga á þingi.

Hvort vill fólk styðja gerspilltan og sundurtættan Sjálfstæðisflokk eða  Framsóknarflokkinn sem hefur gengið í gegnum sinn hreinsunareld og sækir að nýju þrótt sinn og styrk til sveitanna og samvinnuhugsjóna og félagshyggju og þar er nú algjör endurnýjun og við flest sem erum í efstu sætum þar erum með hagfræði-, viðskipta- eða stjórnmálafræðibakgrunn og tilbúin að taka þátt í að byggja upp atvinnulíf á Íslandi, taka þátt í uppbyggingu samfélags þar sem efnahagsmálin hljóta að vera í brennidepli. Þó að Framsóknarflokkurinn sé félagshyggjuflokkur þá er hann flokkur þar sem unnið er af skynsemi og yfirvegun og ekki fylgt neinum öfgum eða kreddum hvorki til hægri eða vinstri.

Hér er mynd af Ástu sem er í 2. sæti í Reykjavík Norður og Vigdísi sem er í 1. sæti í Reykjavík suður og Guðrúnu sem er í 3. sæti í Reykjavík suður

 Óskar borgarfulltrúi og Hallur kosningastjóri og moggabloggari taka sig vel út á hestbaki

 Hér er líka vídeó af Skírdagsreið Framsóknarmanna

 

Fleiri myndir (yfir 90)  úr Skírdagsreiðinni má sjá hérna.

Hér er Eiríkur frambjóðandi í 15. sæti í Reykjavík norður með syni sínum og hestinum þeirra í taumi.

Hér er Valgerður frambjóðandi í 13. sæti í Reykjavík suður með einn af sínum mörgu hestum.

Hérna er mynd af kosningabíl okkar Framsóknarmanna núna í kosningunum. Þetta er allt önnur lína en Hummerinn sem var kosningabíll í síðustu borgarstjórnarkosningunum. Framsóknarflokkurinn hefur breystst. Ísland hefur breyst og vonandi mun Sjálfstæðisflokkurinnn ná að breytast einhvern tíma. Það verður því miður ekki tími fyrir hann að gera það fyrir næstu kosningar. Það er ekki hægt að sópa öllum syndunum undir teppið og bjóða okkur upp á sama fólkið og sömu vinnubrögðin og komu okkur í Hrunið.

Svo má ég til með að líma hér inn til samanburðar við Skírdagsreið okkar Framsóknarmanna hvernig staðan er núna í SkírdagsREI hjá Sjálfstæðismönnum. Loksins fatta allir hvers vegna Geir gerði ekki neitt þegar sex borgarfulltrúar Sjálfstæðismanna fóru á fund hans og klöguðu undan Vilhjálmi og REI ævintýri hans sem óneitanlega virðist hafa töluverða snertifleti við þessa styrki hjá Fl group og Landsbankanum. 

En maður skilur reyndar ekki hvað Valhöll gerði við alla þessa peninga. Líka hvernig allir nema Geir gátu troðist þarna inn þegar allt var stútfullt af  fé án þess að teka neitt eftir neinu.

 

„Hvítþvegin bleyjubörn“

Sigmundur Davíð að kanna stöðuna hjá Framsókn

Það var flott viðtalið við Sigmund Davíð um efnahagsmálin. Framsóknarflokkurinn er eini flokkurinn sem leggur áherslu á efnahagsmálin og það má minna á að við sem erum í efstu sætunum í Reykjavíkurkjördæmunum erum mörg með sérmenntun í hagfræði og viðskiptafræðum. Efnahagsmál Íslands eru í góðum höndum hjá Framsóknarmönnum og það eru erfiðir tímar þar sem miklu máli skiptir að skynsamt, réttlátt og framsýnt fólk komi að stjórn landsins.

Það gleður mig að Sigmundur Davíð ætlar að kanna hvort að Framsóknarflokkurinn fékk einhverja slíka óeðlilega háa styrki á þessum tíma frá einstökum fyrirtækjum.

Það eru nokkrar vikur síðan fjölmiðlar tóku upp ofstopa og ofsóknir Ólafs Magnússonar þegar hann réðst á Óskar Bergsson fyrir að hafa boðið nokkrum sveitastjórnarmönnum upp á glas að loknum kynningarfundi í Ráðhúsinu þar sem Óskar var að útskýra fyrir þessum sveitarstjórnarmönnum hvernig öll hringavitleysan væri búin í Reykjavík og nú unnið þar af skynsemi eftir að Framsókn tók við. Þetta var í tengslum við ráðstefnu sveitarstjórnarmanna utan af landi og kostaði heilar 90 þúsund krónur.  Ég bið fólk að bera saman þessar 55 milljónir sem runnu í Sjálfstæðisflokkinn saman við þessa mótttöku. Ef Framsóknarflokkurinn býður upp á kaffi og kleinur þá er það spilling en ef Sjálfstæðisflokkurinn stingur á sig 55 milljónum það þá heitir það "traust efnahagsstjórn".

Hér er kosningaáróðursplagg frá Sjálfstæðisflokknum árið 2007

 

Greiðsluaðlögun stórhættuleg ein og sér

Þegar öllu er á botninn hvolft

Það er lítið hægt að segja um þær uppljóstranir sem nú koma fram um Sjálfstæðisflokkinn nema samhryggjast öllum heiðarlegum Sjálfstæðismönnum sem núna eiga mikið verk framundan að byggja upp stjórnmálaflokk sem er rjúkandi rúst.

Hér er ein af kosningaáróðursmyndunum sem birtust almenningi fyrir kosningarnar 2007. Sjáum við á brosinu á þessum manni að hann er þá nýbúin að taka við 30 milljón króna framlagi frá FL Group í sjóði Sjálfstæðisflokksins? Sjáum við að hann er þarna að plata? Ætlar þú að kjósa Sjálfstæðisflokkinn í vor?

 

 

Geir segist bera ábyrgðina

Hið ríka ríki verður ríkara

Vá, hvað þetta er sniðugt hjá ríkinu. Breyta skuldum sem aldrei verða borgaðar og engin leið er að verði borgaðar í hlutabréf í opinberu hf fyrirtæki (ohf) sem ríkið átti 100 % fyrir í. Hvað skyldi ríkið eiga núna mörg hundruð prósent í skuldum Rúv? Ríkið hefur verið í læri hjá útrásarvíkingum og bólupeningagerðarmönnum Íslands og býr núna til peninga úr skuldum.

Svakalega sem þetta virkar vel þessi einkavæðingarárátta Sjálfstæðismanna, maður fellur í stafi yfir þessum árangri. Hér er smálexía fyrir þá sem eru ekki ennþá búnir að fatta hvernig skuldir búa til eignir í því kasínó kapitaliska hagkerfi sem við búum við.

Nr. 1

 

Nr. 2

Nr. 3

 Nr. 4

Nr. 5

Skuld RÚV breytt í hlutafé