Málum bæinn bleikan

Hafmeyjan litla fær ekki að vera í friði. Einhverjir máluðu hana bleika í nótt.  Sumir grínast með að hér hafi skærufemínistar frá Íslandi verið á ferð, við höfum jú málað bæinn bleikan í nokkur ár og hvatt alla til að bera bleikt - líka styttur bæjarins. Ég hef sjálf   málað sveitina bleika, ég málaði bleikan stein fyrir nokkrum árum og setti hann við glæstan minnisvarða um nokkra bræður frá Víðivöllum í Blönduhlíð, ég kallaði bleika steininn minnisvarða um óþekktu systurina. En ég veit ekki um neinn femínista sem hefur skemmt eitthvað eða aðhafst eitthvað ólöglegt vegna málstaðarins.  En það stendur nú til halda bleika samkomu í Kaupmannahöfn 8. mars í Jónshúsi, það verður örugglega gaman þar. Rósa flytur þar ræðu.

Varðandi spellvirkin á styttunni þá minnir mig að það hafi verið hafmeyjustytta í tjörninni í Reykjavík en hún hafi verið afhausuð og listamaðurinn (var það Nína Tryggvadóttir?) hafi tekið það mjög nærri sér.

 

Litla hafmeyjan máluð bleik

Athugasemdir

[Anna Ólafsdóttir Björnsson, 3.3.2007 kl. 19:46]

Mæti á bleiku kúrekastígvélunum mínum! En varðandi styttuna þá var sú danska afhausuð (held tvisvar) en sú íslenska var sprengd í loft upp ;-) á gamlárskvöld fyrir langa löngu og Nína Sæmundsson, höfundur styttunnar (Art Deco gella sem gerði m.a. flotta styttu á Waldorf Astoria í New York) var ekki sérlega hrifin. Margt flott eftir Nínu Sæm en þessi stytta var skelfilega ljót og flestir glöddust ósegjanlega þegar hún var sprengd upp.

[Salvör Kristjana Gissurardóttir, 3.3.2007 kl. 23:44]

Takk fyrir upplýsingarnar Anna. Það rifjast núna upp fyrir mér. Það var sýnd mynd um Nínu Sæmundsdóttir fyrir einhverjum árum í RÚV og þá kom þetta fram með styttuna. Það væri samt fróðlegt að pæla í hvort fólk sé sama sinnis núna - kannski var styttan svo skrýtin og utanveltu að hún hefði verið mikið punt.

[graskerid (IP-tala skráð) 6.3.2007 kl. 12:42]

Hvernig væri að heiðra minningu "konunnar á bakvið manninn" ?

Óþekkta konan ?  Hin skráða saga er full af karlmönnum sem hafa afrekað eitt og annað en enginn er eyland, ekki einu sinni karlmenn......