Matador spilapeningar

Í grein í DV er útskýrðir þessir gjörningar hjá BYR og MP banka, mér virðist að þetta sé einhvers konar afbrigði af matadorspilamennsku,  bréfum í eigu starfsmanna bankans og sem bankinn hefur lánað þeim fyrir með einhvers konar kúlulánum er komið í verð með því að bankinn sjálfur fái einhvern til að leppa kaupin. Þannig poppast upp verð á bréfum, bankinn þarf ekki að ganga að kröfum (skuldum starfsmanna) sem hann  hvort sem er fær ekkert upp í.  Á sínum tíma leit út fyrir að MP banki væri á einhvern veginn öðruvísi róli en aðrar banka- og fjárfestingarstofnanir. Svo virðist ekki vera, þetta er sams konar matador spilamennska.

Tiltrú mín á íslenska bankakerfið og þar með á íslenskt athafnalíf sem allt er botnveðsett í einhverjum peningaleik er minna en engin. Tiltrú mín á ríkisstjórnina er heldur ekki mikil, Jóhanna og Steingrímur eru ærlegar manneskjur sem ég ber virðingu fyrir en litlum sögum fara af fjármálasnilld og hagfræðikunnáttu þeirra alla þá áratugi sem þau hafa gengið um garða á Alþingi. Og ekki sáu þau fyrir það ástand sem er núna þó þau væru eins og aðrir stjórnmálamenn í miklu betri aðstæðum en við almenningur til að skynja hættumerkin. 

Og mér virðist félagsmálaráðuneytið núna vera einhvers konar griðastaður kúlulánþega og helsti ráðgjafi félagsmálaráðherra og forsætisráðherra hefur komið sér í skjól þar og gerir nú svimandi kröfur á sína fyrri vinnuveitendur í bankakerfinu og lögum sem sögð eru til bjargar heimilunum í landinu er lætt gegnum þingið með ákvæðum til bjargar kúlulánaþegum.

Á sama tíma kemur félagsmálaráðherrann í fjölmiðla og kastar fúleggjum í atvinnulaus ungmenni, kastar fúleggjum í þá kynslóð sem þarf að bera ofurþungar byrðar einmitt út af glapræðum ráðgjafa hans.

Yfirlýsing frá Ágústi Sindra Karlssyni

Athugasemdir

[Einar Guðjónsson, 25.11.2009 kl. 15:52]

Mæltu manna heilust.

[Þorsteinn Úlfar Björnsson (IP-tala skráð) 26.11.2009 kl. 09:28]

Hann er kúnstugur þessi félagsmálaráðherra. Það hefur komið fram að hann er með sjö aðstoðarmenn. Og að sjálfsögðu eru þeir allir minna spámannlega vaxnir en ráðherrann. Annars gætu þeir skyggt á hann. Og við vitum öll að lögmálið í ríkiskerfinu er: „Every employee shall rise to the level of his or her highest incopetence.“ Þessvegna hefur Ari fróði rétt fyrir sér þegar hann segir; „ því ver gefast heimskra manna ráð sem þeir koma fleiri saman.“ Eða er þetta kannski í annari bók?

[Salvör Kristjana Gissurardóttir, 26.11.2009 kl. 10:41]

Þorsteinn: Ætlaru að segja með að Árni Páll sé einhvers konar Mjallhvít íslenskra stjórnmála? Hverjir eru sjö dvergarnir hans? Endilega nefndu nöfnin? Er það allt fólk sem kom beint úr stjórnunarstöðum úr bönkunum?