Oslótrésmótmælin

 

Nýliðnir atburðir hafa ekkert nafn. Í sögunni fær sami atburður kannski mörg nöfn, allt eftir því hver segir söguna. Ég veit ekki hvað mótmælin í gær og í nótt verða kölluð en ég kalla þau til bráðabirgða Oslótrésmótmælin vegna þess að þegar ég fór þá hafði tekist að fella Oslójólatréð og draga það á eldinn sem logaði fyrir utan Alþingishúsið. Ég fór þegar tréð hafði fuðrað upp. Það var nú svolítið hættulegt ástand, eldtungur léku um himinn og þarna nálægt gömul timburhús.

Mér fannst líka  táknrænt við að brenna jólatréð. Ekki bara af því það er skammdegismerki heldur  líka táknrænt að brenna tré frá Noregi þaðan sem Íslendingar komu fyrir þúsund árum, þaðan sem rætur Íslendinga eru, tréð sem er afhent og uppljómað með viðhöfn á hverjum vetri til að minna okkur á upprunann. Skreytt og uppljómað jólatré er skammdegismerki, eins konar hermigaldur þar sem minnisvarði um líf og ljós og grósku er fluttur inn  í hús í svartasta skammdeginu eins og til að hugga mann og fá mann til að trúa því að skammdeginu ljúki einhvern tíma og það birti á ný og næsta vor muni veröldin blómgast að nýju. En þegar við þurfum ekki huggunina lengur þá fleygjum við jólatrénu og tökum niður jólaljósaseríurnar. Í ári Hrunsins mikla þá brennum við jólatréð. Bruni er nýtt upphaf.

Ég reyni að skrásetja þau mótmæli sem ég tek þátt í. Það er erfitt að skrá þessi mótmæli með ljósmyndum. Það nær ekki stemmingunni, ekki hljómlistinni úr ótal hljóðfærum og snarkinum af eldinum. Vídeómyndin nær ekki heldur viðarlyktinni og kaldri janúarnótt í Reykjavík.

En ég tók upp vídeó af  Oslótrésmótmælunum og setti í tvær skrár svo það yrði ekki allt of langt. 

Oslótrésmótmælin 20-21 janúar 2009 fyrri hluti (10 mín)

Oslótrésmótmælin 20-21 janúar 2009 seinni hluti (10 mín) 

 Sjá líka myndina mína frá mótmælum á gamlársdag

 Kryddsíldarmótmælin

 Þetta eru dáldið stórar skrár og tekur tíma þangað til þær byrja að spilast.
Ég er að reyna að setja þetta inn á youtube en það hefur ekki gengið ennþá hjá mér (allt of stórar skrár)

„Stjórnarslit fyrir helgi“

Athugasemdir

[Sigurður Þór Guðjónsson, 21.1.2009 kl. 22:48]

Það er kannski ekki málinu viðkoamndi, enn mikið pirrar mig sá subbuskapur að taka ekki niður jólatré þó komin sé hálfur mánuður fram yfir þrettánda.

[Salvör Kristjana Gissurardóttir, 21.1.2009 kl. 22:49]

mér tókst að hlaða öðru inn á youtube en gæðin eru mun minni en á camtasia upptökunni.

[Salvör Kristjana Gissurardóttir, 21.1.2009 kl. 22:53]

Já Sigurður, ég held að það geti nú ekki verið mikill glæpur hjá piltunum að hjálpa hreinsunardeild borgarinnar. Hins vegar held ég ekki að það hafi kannski beint vakað fyrir þeim. Dóttir mín og vinkonur hennar voru mjög leiðar þegar þær sáu aðfarirnar við tréð, héldu að mótmælendur hefðu rifið niður lifandi tré sem var rótfast á Austurvelli. Svo var nú ekki. Þetta tré átti að fara.

[Ari Guðmar Hallgrímsson, 21.1.2009 kl. 22:56]

Var þetta bara ekki táknræn athöfn, minna ríkisstjórnina á, "það eru ekki alltaf jólin"

Kveðja

[Þórunn Ó (IP-tala skráð) 21.1.2009 kl. 23:05]

Oslóartrésmótmælin finnst mér ekki ná að fanga þá stemningu sem er í kringum þessi mótmæli.

Manndómsbyltingin finnst mér nær sanni. Þjóðin er að sýna manndóm sinn gagnvart valdhöfum. Við erum ung þjóð, lýðveldið er rétt rúmlega 60 ára gamalt. Við erum að ganga sem þjóð í gegnum manndómsvígslu. Höfum ekki gert okkur nógu vel grein fyrir því hingað til hvað við erum sterk þegar við sameinumst í kröftugum mótmælum. Við erum að sýna spilltum valdhöfum hver okkar hugur er og erum að kenna þeim mannasiði. Ef þú gerir mikil mistök þá axlar þú ábyrgð á því. Það gera allar þroskaðar og vel uppaldar manneskjur. Það hefur valdhöfum ekki skilist hingað til.