Ógöngur 2008 - Þegar Borgin rumskar

Ég held mína þrettándagleði hér á blogginu með því að bjóða upp á frumsýningu á kvikmynd minni Ógöngur 2008 sem er meira en 28 mínútur og er mín frásögn af neyðarblysförinni og kryddsíldarmótmælunum á gamlársdag. Slóðin er http://www.esjan.net/kryddsild/ogongur/

Það þýðir sennilega ekki nema fyrir þá sem eru með frekar hraða nettengingu að sjá þetta, það þarf að bíða smátíma í byrjun áður en myndin byrjar að spilast.

Þessi frumraun mín í kvikmyndum lengri en 10 mínútur er gerð í sönnu kreppudogma, ég klippti ekkert til og skeytti saman í tímaröð allar þær vídeóklippur sem ég tók upp af þessum atburði. Vil ég þakka öllum þeim sem voru persónur og leikendur í þessari kvikmynd og sérstaklega þakka tónlistina og hljóðeffectana sem eru blys, pottar, rúðubank, sleifar, hróp, klapp, þvottabretti og ýmis önnur hljóðfæri.

Eins og  Alfred Hitchcock þá er ég einn af leikendunum, ég kem fyrir í byrjun og leik frelsisstyttuna sem í þessari ævintýramynd á mörkum veruleika og draums er í  myrkri og frelsiskyndillinn er bleikt neyðarblys sem baðar himininn, ekki á frelsiseyjunni út af New York heldur á eyjunni Íslandi, eyjunni sem sendir neyðaróp út í geiminn í lok ársins 2008. 

Það hafa margir aðrir séð hversu ljóðræn og ævintýraleg atburðarásin var, sjá þessar frásagnir:

Veruleikarof (nei.is)

Kryddsíld - Bardaginn á Borginni (Eyþór Árnason)

Í tilefni af þessum atburði -hvort sem við köllum hann bardaga eða veruleikarof þá hef ég ort upp að nýju ljóðið mitt. Ég er eins ljóðs skáld og þetta ljóð er eldfimt töfraljóð sem tekur á sig blæ eftir viðburðum.  Ég breytti ljóðinu þannig að núna er stór stafur í Borgin.

 

Eldborg

Þegar Borgin rumskar
læðist steinolíustrákurinn
inn í grátómu húsin
tifar á strengjasteypunni
og safnar sprekum í eldinn.

Þegar borgin sprettur á fætur
með sírennuvæli, hrópum og skarkala
og gráir bólsrar teygja sig til himins
þá veit hann
að þeir njóta eldanna best
sem kveikja þá.

Jólin kvödd með virktum

Athugasemdir

[Carlos Ferrer (IP-tala skráð) 6.1.2009 kl. 21:59]

Ljótt er að sjá hvernig lögreglan kemur fram. Hún á að kunna betur á mótmælendur  en þetta. Fram að því að hún beitti gasi fyrst hafði fólk hátt en gerði að öðru leiti ekkert af sér. Það getur ekki verið góð lögreglumennska að ögra hópi eins og þessum, eða hvað?

[Heiða B. Heiðars, 6.1.2009 kl. 23:15]

Takk fyrir þetta Salvör. Skemmtilega gert hjá þér og stemningin skilar sér vel. Passa mig betur á að verða ekki svona mikið í vegi þínum næst! Fannst hlutverk mitt heldur of stórt í þessari mynd :)

[Ólína Kjerúlf Þorvarðardóttir, 7.1.2009 kl. 00:08]

Athyglisvert myndband - gott ljóð

[Guggan (IP-tala skráð) 7.1.2009 kl. 07:49]

Þakka þér kærlega fyrir Salvör og til hamingju með þína fyrstu alvöru stuttmynd í fullri lengd ; )

Skora á þig að senda hana inn í Stuttmyndadaga eða á Heimildamyndahátíðina hér fyrir vestan,nánar tiltekið á Patreksfirði um Hvítasunnuna. Ég átti reyndar erfitt með að hlaða myndinni hér á síðunni inn til skoðunar. Eins er erfitt að skoða vídeóið efst í færslunni þinni um Þátttökumótmæli eða miðstýrð mótmæli frá 3. janúar. Væri hægt að setja þetta á YouTube einnig?