Útflutningsverðlaun Forseta Íslands

Baugur að flytja úr landi? Tja..ég er hef eitthvað misskilið þetta. Var forsetinn að verðlauna Baug fyrir að flytja úr landi? Núna  er  Baugur Group  nýbúið að fá Útflutningsverðlaun Forseta Íslands árið 2008 fyrir forystuhlutverk sitt í íslensku útrásinni og þann einstaka árangur sem fyrirtækið hefur náð í sölu- og markaðsmálum í verslunarrekstri á heimsvísu.

Kannski er íslenska útrásin fólgin í að stunda strandhögg við strendur Íslands og annarra óvarinna svæða auðtrúa manna og flytja góssið út í hinn stóra heim. Kannski standa hinir íslensku víkingar núna fyrir stafni og stýra dýrum knerri sem siglir undir hentifána skattaparadísa auðmanna.

Ég veit ekki hvort það er hótun eða brandari að flytja  365 miðla úr landi. Alla vega er það mjög athyglisvert ef fjölmiðlar sem ætlað er að hafa áhrif á íslenskt samfélag eru staðsettir stjórnarlega einhvers staðar í útlöndum.

Sennilega verður ekki neitt af fyrirtækjum Baugs  flutt úr landi nema það borgi sig fyrir eigendur  fyrirtækisins. Það mun reyndar borga sig nema hér séu einhverjar skattareglur eða aðstæður sem gera eftirsóknarvert að hafa stjórnarsetur fyrirtækja hérna. Það getur vel verið að Jón Ásgeir flytji skattalegt aðsetur einhverra Baugsfyrirtækja til útlanda en ástæðan verður ekki dómsmálið. Það verður hins vegar notað sem tylliástæða.  Talandi um Baugsmálið þá er það ótrúlega litlar sakir sem Jón Ásgeir er dæmdur fyrir og ef þetta er eina sem hægt er að  finna á athafnamann í glæfralegum rekstri með margra ára  nákvæmri rannsókn stjórnvalda þá er Jón Ásgeir heiðarlegri en ég hélt.

Vefur Jons Gerald Sullenberger baugsmalid.is er að  miklu leyti níðskrif frá beiskum manni sem svífst einskis til að hefna sín og greinir stundum ekki aðalatriði frá aukaatriðum.  Kaflinn "Árshátíð  aðstoðarforstjóra" er dæmi um óáhugaverð aukaatriði sem engu máli skipta.  En  sumt efni á  vef Sullenbergers veitir innsýn  í heim íslenskra fjárglæfra þar sem fyrirtækin virðast vera  búin til til að versla hvert við annað  eftir krókaleiðum  til að flytja peninga að endingu beint í vasa einstakra manna.  Mér finnst Sullenberger sums staðar spyrja  skynsamlegra spurninga, t.d. í þessum kafla um skytturnar þrjár:

"Rúv.is birti nýlega frétt þess efnis að FL group og Pálmi Haraldsson í Fons, hafi keypt og selt flugfélagið Sterling á milli sín í nokkrum viðskiptum fyrir um 40.000 milljónir.

Pálmi Haraldsson keypti flugfélagið Sterling sem danskir miðlar sögðu á þeim tíma algerlega verðlaust vegna tapreksturs/skuldabagga á 4.000 milljonir krónur en hann seldi það svo nokkrum mánuðum seinna til FL group á 15.000 Milljónir.

Ég spyr:
Hvað gerðist í rekstri Sterling á nokkrum mánuðum sem jók verðmæti félagsins úr 4.000 milljónum í 15.000 milljónir króna sem hluthafar almenningshlutafélagsins FL group greiddu fyrir félagið ?

Hagnaður Pálma Haraldssonar í Fons, eins nánasta samstarfsaðila Jóns Ásgeirs, var á einungis örfáum mánuðum 11.000 milljón krónur á kostnað hins almenna hluthafa almenningshlutafélagins FL Group.

Saman stofna svo FL group og Pálmi Haraldsson félagið Northern Travel Holding og selja Sterling á 20.000 milljónir króna til þessa nýja félags en eignarhlutur Pálma og FL Group samanlagt nemur um 80% en hið öfluga fjárfestingarfélag Sund ehf. er sagt eiga 20%.

Ég spyr:
Hvað gerðist í rekstri Sterling flugfélagsins sem skýrir 500% hækkun á verðmæti félagsins þar sem Pálmi Haraldsson keypti félagið upphaflega á 4.000 milljón krónur?

Ég spyr:
Af hverju er Pálmi Haraldsson sem græddi 11.000 milljónir á verðlausu flugfélagi, að kaupa sama verðlausa flugfélagið á 20.000 milljónir tilbaka í gegnum nýtt félag þar sem hann er jafnframt Stjórnarformaður sem og stærsti hluthafinn ásamt FL Group ?  "  

Indriði H. Þorláksson skrifar athyglisverðar greinar

Eignarhald á íslenskum fyrirtækjum

Útrás og innrás, efnahagsleg og skattaleg áhrif

Indriði mælir spaklega um íslensku útrásina:

Lítill hluti af hagnaði af starfsemi íslenskra útrásarfélaga erlendis skilar sér í hendur innlendra aðila og er ráðstafað hér á landi. Skatttekjur íslenska ríkisins af þessari starfsemi eru tengdar þeim hagnaði sem tekin er til landsins og gildandi skattareglum svo og leiða til að koma hagnaði óskattlögðum úr landi. Áhrif útrásar íslenskra aðila á íslenskt efnahagslíf eru því að líkindum ekki ekki mjög mikil og skatttekjur íslenska ríkisins af atvinnurekstri íslenskra aðila erlendis eru ekki miklar. Ástæðan fyrir hvoru tveggja er að hluta til sú að eignarhald á íslenskum eigendum útrásarfyrirtækjanna er að nokkuð miklu leyti í höndum aðila sem skráðir eru erlendis en einnig af því að skattareglur í þessum efnum hér á landi eru ófullnægjandi.

Hver ætli fái útflutningsverðlaun forseta Íslands á næsta ári? Fons? Geysir Green Energy? 

 

 

Mun flytja einhver félög Baugs til annarra landa

Athugasemdir

[samúel (IP-tala skráð) 29.6.2008 kl. 05:44]

eina sem Al capone var dæmdur fyrir voru smávægileg skattsvik

[Predikarinn - Cacoethes scribendi , 29.6.2008 kl. 12:49]

Þessir menn voru dæmdir sekir um lögbrot en svo virtist sem héraðsdómur þyrði ekki í upphafi að taka á 36 af ákærunum sem voru vel rannsakaðar og 2-3 óháðir mismunandi aðilar, sérfróðir á hverju sviði, sammála um sekt í hverjum ákærulið. Vísað var frá dómi vegna orðalags í ákærunum ekki vegna þess að þær ættu ekki við rök að styðjast. Ég myndi nú segja að þeir ættu að prísa sig sæla að þeir sluppu við þessar frávísuðu ákærur, en gleymið ekki því að Hæstiréttur sagði JÁJ  sekan um ólögmæta sjálftöku á fjármunum upp á hundruðir milljóna króna frá meðeigendum sínum í almenningshlutafélaginu, en ekki hægt að sakfella vegna fyrningar.

Þetta er alla vega ekki fólk sem venjukegur maður getur átt viðskipti við nema tryggja sig fyrirfram í bak og fyrir - þeir virðast ekki allir þar sem þeir eru séðir og greinilega ekki eins og þeir vilja sjálfir vera láta.

[Árni Gunnarsson, 29.6.2008 kl. 15:06]

Ég hef alltaf staðið með Baugsmönnum í þessari styrjöld þeirra við persónulega óvild Davíðs Oddssonar og jábræðra/lærisveina hans sem ævinlega sungu "eia, eia" þegar hann tók til máls, eins og englarnir í Gullna hliði Davíðs Stefánssonar gerðu þegar María Mey birtist.

Án þess að hafa lesið til hlítar þennan pistil þinn Salvör hygg ég að flest - bæði frá þínu brjósti og tilvitnað megi til sanns vegar færa. Og í stuttu máli þá hygg ég að fáir-ef nokkur okkar ævintýralegu ævintýramanna útrásarinnar svonefndar þyldu nákvæma skoðun í tilliti fyllsta lögmætis.

En aldrei fæ ég skilið til fulls hvers vegna samráðsmál olíufélagan fékk svo ómarkvissa rannsókn. Né heldur tekst mér ennþá að skilja hvernig félag getur sýnt af sér refsivert athæfi án aðildar starfsmanna/stjórnenda.

Og auðvitað er mér aldeilis fyrirmunað (eins og Davíð Oddssyni) að skilja þá ofboðslegu ósvinnu að tengja forseta Alþingis við þetta vandræðamál þó rannsóknarlögreglan brytist inn á skrifstofu fyrirtækis þar sem maki hennar var stjórnarformaður! Og í leit að sönnunargögnum í umsvifamesta sakamáli efnahgsbrota í sögu lýðveldisins.

Í fullri alvöru þá fæst ég ekki til að trúa því að subbulegri pólitísk spilling finnist í neinu þokkalega virtu lýðræðisríki en hér á okkar ágæta landi. 

Og það fyrir augum allrar þjóðarinnar.  

[Júlíus Valsson, 29.6.2008 kl. 21:21]

Forsetinn okkar hefur e.t.v. misskilið orðið "útflutningur".

[Árni Gunnarsson, 30.6.2008 kl. 10:03]

Hugsanlega er þetta rétt hjá þér Júlíus?

Einn ágætur bloggari, Fannar frá Rifi bendir á að í BNA séu menn sviptir ríkisborgararétti ef þeir borga ekki skattana sína heima!

[Guðrún María Óskarsdóttir., 4.7.2008 kl. 02:20]

Mjög góður pistill og þarfur hjá þér Salvör, er þér innilega sammála í þínum vangaveltum.

kv.gmaria.