Útlitsblæti, litgreiningar, fataúthlutanir og hnífasett

Hér eru 4 mínútur af þessu furðulega viðtali  við Guðjón Ólaf Jónsson í Silfri Egils í dag. Það er ekki hægt annað en kíma af furðulegheitunum og dómgreindarskortinum  í Guðjóni Ólafi sem segist vera með mörg hnífasett í bakinu eftir Björn Inga fyrrum vin sinn. Það er eitthvað svo myndrænt að sjá Guðjón Ólaf fyrir sér eins og steinaldareðlu sem virkar í fyrstu með brodda upp úr bakinu en þegar grannt er skoðað þá eru broddarnir samsettir úr rýtingum sem gengið hafa manna á milli í hjaðningavígum Framsóknarmanna.

 

Þetta er næstum eins fyndin myndræn líking og myndin af Halldóri og Guðna eftir hann Halldór Baldursson þar sem þeir eru á húsþaki og Halldór hoppar niður og heldur að Guðni ætli að fylgja sér til Heljar en Guðni er nú ekkert á því og lætur Halldór hoppa einan af stallinum. Það er ein skemmtilegasta skopmynd  íslenskra stjórnmála síðustu ára. En Halldór Baldurrson er ekki með þá mynd á moggablogginu sínu og ég finn hana því miður hvergi á Netinu. En ég fann þessa mynd hjá Halldóri sem hann gerði 2006 og hver skyldi vera þessi ljóshærði sem hefur saxað allt kvikt niður í spað? Geir Harde veit það alla vega ekki.

 

Ein af stóru ávirðingunum sem Guðjón Ólafur hefur á Björn Inga er að Björn Ingi hafi sagt að hann (þ.e. Guðjón Ólafur) hafi engan kjörþokka og hafi frekar viljað að hann sjálfur (þ.e. Björn Ingi) væri í framboði heldur en Guðjón Ólafur.  Ég skil vel að Guðjón Ólafur sé spældur út af því, það er sárt að heyra svona um sjálfan sig. En þetta sýnir nú bara að Björn Ingi hefur þúsundfalt betra pólitísk nef en Guðjón Ólafur og jafnmikinn metnað og er mörgum sinnum klárari. Það þarf reyndar ekkert sérstakt næmi í stjórnmálum til að skynja að kjörþokki Guðjóns Ólafs er langt undir frostmarki og það þarf ekki annað en líta yfir ferill hans innan Framsóknarflokksins í Reykjavík undanfarin ár til að skynja að það er verulega hættulegt lýðræði í landinu að menn sem viðhafa sömu vinnubrögð  og hafa sömu sýn og Guðjón Ólafur séu í valdastöðum í stjórnmálum. 

En meira um meint útlitsblæti og fataúthlutanir Framsóknarflokksins.

Þetta er orðið spennandi  að leita að ummerkjum um þær pjötlur sem Framsóknarflokkurinn er að spreða í austur og vestur og ég hef eins og  Haukur Logi lagst í rannsóknarbloggmennsku um fötin og fundið merki um gengdarlaust fatabruðl Framsóknar í kosningabaráttunni 2006  í Reykjavík , hér er mynd sem ég tók af því þegar stelpur sem máluðu krakka á fjölskylduskemmtun í þeirri kosningabaráttu voru leystar út með gjöfum. Eins og sést á myndinni þá fengu þær boli með framsóknarmerkjum að gjöf. Ég sá sjálf mörg dæmi um það í kosningabaráttunni að fólk fékk boli. 

Ég átta mig á því að ég kemst ekki með tærnar þar sem Haukur Logi hefur hælana, ég er bara með sönnun um vesæla boli en Haukur Logi hann sá jakkafötin hanga einhvers staðar.  

En mikið er ég fegin að mesti óhróðurinn sem Guðjón Ólafur getur sagt um Björn Inga er að Björn Ingi hafi skynjað að Guðjón Ólafur hafði ekki kjörþokka og ætti ekki að vera ofarlega á listum og að mesta fjárhagshneisan og spillingardæmið sé að einhver kosningasjóður í Reykjavík hafi hugsanlega tekið þátt í einhverjum jakkafatakaupum frambjóðenda í eldlínunni.  Það hneykslar mig ekkert sérstaklega mikið.

En núna á þessum tímum þegar Blóðið fossar í Framsókn er ágætt að lesa spjaldið sem stelpan heldur á hér á myndinni fyrir ofan þegar hún tekur við bol frá Framsókn.

Þar stendur "Allir þurfa á kærleika að halda".
Líka Framsóknarflokkurinn.

 

Til minnis  (bloggumræða um framsókn o.fl.)

Minnisleysi stjórnmálamanna...REYmálið - Byrgismálið....eða vita ekki.......?

Pólitísk spilling.......?

Vinur er sá sem til vamms segir

 

 

 

Með mörg hnífasett í bakinu

Athugasemdir

[Sigrún Jónsdóttir (IP-tala skráð) 20.1.2008 kl. 22:40]

Salvör, ertu dóttir mömmu þinnar?  Hugsaðu!  Af hverju ættu gömlu andstæðingarnir í Framsókn, GÓJ og Haukur Logi Karlsson að vera sammála?

Þetta eru rótgrónir framsóknarmenn úr sitthvorum arminum, segir það þér ekki neitt? Hugsaðu kona! 

[Salvör Kristjana Gissurardóttir, 21.1.2008 kl. 00:07]

Sæl Sigrún. Ég hef ekki séð hvað Haukur Logi og Guðjón Ólafur eru sammála um. Ég held að það séu varla til ólíkari menn. Ég hef ekki reynt Hauk Loga að öðru en málefnalegum vinnubrögðum. Guðjón Ólafur er með dylgjur og Haukur Logi fullyrðir eitthvað um föt. Það getur vel verið að einhver kosningasjóður hafi borgað einhver föt og ef svo er þá er í fína lagi að gagnrýna það.  Það er gott að Haukur Logi er vakandi fyrir eyðslu í kosningabaráttu, ég man einmitt eftir því að hann spurði á innanhúsfundi í Framsókn frambjóðendur í þessum kosningum hvað þeir eyddu í prófkjörsbaráttu og hvernig þeir fjármögnuðu baráttuna. Ég man hvað það kom mér gífurlega á óvart hve miklu var kostað til og satt að segja þá finnst mér það miklu alvarlegra mál hvernig prófkjör voru heldur en hvort einhver föt voru borguð. Mér finnst reyndar miklu eðlilegra ef nógir peningar eru til að styrkja frambjóðendur til að vera sómasamlega til fara heldur en að framboðið leggi þeim til fararskjóta þannig að þeir keyri um á mengandi lúxusjeppum (hér er ég með pillu um Hummer jeppann )  Mér finnst afar alvarlegt ef staðan hjá stjórnmálaflokki er þannig að það þýðir ekki að fara í framboð nema kosta sjálfur einhverjum milljónum til af eigin fé í prófkjör og vera tekjulaus í nokkra mánuði. Þetta útilokar æði marga frá því að bjóða sig fram.

Bloggpistill Hauks Loga er æði galgopalegur enda er hann ungur maður sem ekki hefur öðlast alvöru þess sem vill láta taka sig alvarlega. En hann gefur ýmislegt í skyn og segir hluti eins og þetta: "Það sem vekur upp spurningar við þetta mál er hvert markmið GÓJ sé og fyrir hverja hann moki skurði núna, enda orðinn frægur af endemum fyrir fyrri mannvirkjagerð sína á því sviðinu. Sennilega eru það sem fyrr peningamenn í kringum XXXXXXX sem stýra þessari aðgerð og væntanlega er þetta einungis fyrsta útspilið í einhverjum kappli sem ég í það minnsta er ekki búinn að ráða enn." 

Það er reyndar hægt að láta sér detta í hug alls konar samsæriskenningar um hvers vegna Guðjón Ólafur er með svona vitleysisgang og lúalega atlögu  og halda að eitthvað búi að baki en sennilega er skýringin einfaldlega sú að Guðjón Ólafur er bara svona grunnhygginn og sjái ekki sjálfur hve vitfirringsleg og

 Ég tel mig þekkja ágætlega til vinnubragða Guðjóns Ólafs innan Framsóknarflokksins og það er mín skoðun að þau vinnubrögð sem hann hefur viðhaft og telur eðlileg séu mesta mein Framsóknarflokksins. Ég tek fram að Guðjón Ólafur er ekki einn um þessi vinnubrögð, eitthvað hefur gerst í tímanna rás í Framsóknarflokknum þannig að stjórnmálabaráttan snýst bara um plott og undirróðursstarfsemi og að smala saman sem flestum á fundi og jafnvel grípa til mjög óvandaðra meðala svo sem að smala fólki úr öðrum sveitarfélögum til að kjósa. Ég vona að fólk sjái að sér og átti sig á að svona vinnubrögð í stjórnmálahreyfingu eru andstæð öllu eðlilegu starfi í grasrótarhreyfingu og eru kyrking á öllu hugsjónastarfi. 

[Sigrún Jónsdóttir (IP-tala skráð) 21.1.2008 kl. 00:54]

Sæl Salvör og takk fyrir greinargóð viðbrögð við mínum ummælum!  Ég er náttúrulega "fyrrverandi" framsóknarmaður og ætti þess vegna að láta mér í léttu rúmi liggja vandræðagangur flokksmanna í núverandi "leiksýningu"!

  En mér er ekki sama af einhverjum ástæðum og get ekki orða bundist(þ.e. haldið kjafti!). Ég ásamt fleiri fyrrverandi flokksmönnum horfði á viðtalið við Guðjón Ólaf í Silfrinu í dag (komst að því eftirá þar sem margir höfðu þörf á því að tjá sig við mig sem fyrrverandi formann í félagi framsóknarmanna!).  Allir og ég segi og skrifa allir, staðfestu ummæli Guðjóns Ólafs um "framgöngu" Björns Inga í þeirri atburðarrás, sem varð í og í kjölfar "uppstillingar" framsóknarmanna á framboðslista í Reykjavík.

Ég var bara peð, var formaður félagsins í FR-suður og fulltrúi félagsins í uppstillingarnefnd og þekki því framgang mála á þessu tímabili eins vel og hægt er!  Ég hef enga þörf fyrir að upplýsa það á opinberum vettvangi, hvað þarna fór fram i einhverjum smáatriðum, en það sem ég þekki til Hauks Loga, get ég vel ýmyndað mér að við séum sammála um að á þessum tíma vorum við bæði höfð að fíflum á taflborði framapotaranna!  Salvör ekki láta hafa þig að fífli!  Hvað sem um GÓJ má segja, þá er hann ekki að fara með fleipur í viðtali sínu við Egil í dag!  Það get ég staðfest.  Guðjón Ólafur er ekkert fífl, hann hlýtur að gera sér grein fyrir því að þetta útspil hans er honum ekki framdráttar innan flokksins (í bili a.m.k.), en vonandi opnar þetta augu einhverra fyrir því hvers konar "óværa" Björn Ingi er og hefur verið á flokknum og þá var betur af stað farið en heima setið og til þess þurfti kjark, sem ég skal alveg viðurkenna að ég hafði ekki.  Freyjumálið skulum við svo einhverntíma ræða undir 4!  Þar er meira undirliggjandi en sú bábilja sem þú hefur haldið fram!

kv. frá fyrrverandi framsóknarkonu.

[Salvör Kristjana Gissurardóttir, 21.1.2008 kl. 01:21]

Ég efast ekki um að sú atburðarás sem Guðjón Ólafur lýsir varðandi uppstillingamál margar síðustu kosningar  sé rétt. En ég spyr - hver er glæpurinn? Er það glæpur að hafa beitt sínum áhrifum til að komast sjálfur til metorða og er það glæpur að hafa ekki talið Guðjón Ólaf hafa kjörþokka og vera sigurstranglegan á listum?

Ég veit ekki hvort þú ert að gefa í skyn eitthvað meira.

[Salvör Kristjana Gissurardóttir, 21.1.2008 kl. 01:31]

Ég er ekki neinn sjálfskipaður verjandi Björn Inga eða annarra í forustu  í Framsóknarflokknum en mér ofbjóða vinnubrögð Guðjóns Ólafs og skil ekki hvað honum gengur til nema það að ætla að hefna sín með hvaða ráðum sem er á einhverjum sem hann telur eitthvað hafa staðið í vegi fyrir honum. Það er afar  lítilmótlegt og ekki samboðið manni sem hefur setið á þingi fyrir Framsóknarflokkinn. Ég reyndar vorkenni honum mikið, þetta er ótrúlega óskynsamlegt.

Fólk ætti að taka sér Guðna til fyrirmyndar um hvernig hann talar um andstæðinga sína og þá sem hafa reynt að leggja stein í götu hans. 

[Sigrún Jónsdóttir (IP-tala skráð) 21.1.2008 kl. 01:54]

Þetta er náttúrulega ekki í lagi!  Við erum náttúrulega að gera nákvæmlega það sama og GÓJ!  Við berum á torg, það sem okkur finnst aflaga farið í flokkstarfinu!

Ég ætla ekki að tíunda frekar að sinni a.m.k. hvað mér fannst að í Framsóknarflokknum en ég get ekki annað en skotið þessum bolta þínum til baka!:

"Er það glæpur að hafa beitt sínum áhrifum til að komast sjálfur til metorða.....?"

Konurnar, sem á sínum tíma sóttust eftir áhrifum í kvennfélaginu Freyju í Kópavogi, voru að þínu mati bara fulltrúar einhverra karla, sem sóttust eftir áhrifum!  Þú kallar þig feminista Salvör!

Stjórnarkonur i Freyju vissu það með viku fyrirvara að "hinar óæskilegu konur" myndu bjóða sig fram til stjórnarstarfa en þóttust koma "af fjöllum" í fjölmiðlum í kjölfar fundarins!  Úps,... svo mikil fórnarlömb!

Ég held við getum verið sammála um að Framsóknarflokkurinn sé "sviðin hjörð", þótt okkur greini á um hverjum eða hverju er um að kenna!

[Salvör Kristjana Gissurardóttir, 21.1.2008 kl. 02:46]

Sæl Sigrún, mér finnst ekki í lagi að það sé borið á torg eitthvað sem er rógburður um fólk og sem ekki hefur komið fram í opinberri umræðu. Ég hef reynt eftir fremsta megni að vanda orðræðu mína og passa að níða fólk ekki niður að ósekju.  Það er hins vegar ekkert að því að ræða afar undarlega og umdeilda framgöngu manna, mér vitanlega er ekki neinn vettvangur annar fyrir það. En mér finnst afar mikilvægt að fólk sýni öðrum virðingu og það gerir þú ekki með því að kalla einhvern "óværu".

Ég á mjög erfitt með að dylja hve lítið álit ég hef á Guðjóni Ólafi og ég held að það hafi því miður haft heilmikið að segja að ég tók í fyrsta skipti eftir hvað hann var að gera þegar hann var með þessi yfirgengilega kvenfyrirlitningarlegu skrif um Freyjumálið. 

Ég veit ekki hvers vegna þú ert að fullyrða um bábyljur mínar um Freyjumálið. Ég hef alltaf vitað að  hluti af þeim konum sem mættu á  Freyjufundinn kom þar vegna þess að þær vildu styðja Sigurbjörgu Vilmundardóttur og voru konur sem virkilega störfuðu í þessu kvenfélagi eða ætluðu sér að gera það. En því miður var stærstur hópurinn hjörð kvenna sem tengist áhrifamönnum í Framsóknarflokknum og virtist hafa verið smalað þangað á þeirra vegum. Því miður eru ýmis fleiri dæmi um svona vinnubrögð, sjá t.d. þetta blogg Svindlari á þingi.- Guðjón Ólafur Jónsson framsókn 

Ég skal finna greinina mína um Freyjumálið og pósta tengil á hana hérna. Ég kynnti mér vel allt sem laut að því máli þó það kæmi ekki nema brot af því fram í greininni. Mér finnst mjög miður að Sigurbjörg o.fl. hafi skemmt fyrir sér með þessum vinnubrögðum.

Varðandi sviðna jörð í Framsóknarflokknum þá er það nú óumdeilanlegt að ennþá brenna þar Mýrareldar. Gamall mór og uppþornaðar mýrar eru mjög eldfimar. Það skapar hins vegar ágætis vaxtarskilyrði fyrir nýgræðing til að vaxa upp.

[Salvör Kristjana Gissurardóttir, 21.1.2008 kl. 02:52]

Grein um Freyjumálið frá 23 feb. 2005: