Leiðarkortið í Spaugstofu og flísin í auga Gylfa Ægissonar

Spaugstofan heldur áfram að gera grín að okkur og sýna okkur samtímann í spéspegli. Alveg dáist ég að þeim kumpánum sem sífellt koma á óvart með smellnu gríni. Það var bráðfyndið í gærkvöld innslagið um Kjöl  þegar þeir tóku fyrir þessa áráttu mannanna að sjá alls staðar mynstur og tákn og dulrúnir. Sérstaklega var fyndið þegar rýnt var í málverkið á Alþingi af Kópavogsfundinum (þessum "Vér mótmælum allir" fundi) og það  var fundið út að augnsamband karlanna á myndinni sýndi svo ekki verður um villst  leiðarkerfi Strætó. 

Það er nú bara hollt fyrir alla að leita að heimskortum og leiðarstefum í sínu lífi og  það má leita að slíku korti á ólíklegustu stöðum svo sem í Huldubókasafninu í Hafnarfirði eða með því að ráða rúnirnar í rákum marmaraflísa á klósettinu heima hjá manni.

Það gerði Gylfi Ægisson í eftirminnilegum þætti á Stöð 2. Gylfi er frábær en ég var ekki viss um að flísadæmið væri grín frá hans hálfu. En mér stökk bros og er  reyndar búin að brosa síðan að þessu atriði, það var bara svo últra kómiskt að horfa á það eftir Spaugstofuna. Gylfi er frábær og eins og listamanna er siður þá er ímyndunarafl (nú eða skynjun) hans og innsæi mikið og hann getur glætt eina flís svo miklu lífi að hún segir lífssögu hans. Ef þetta eru ekki töfrar þá veit ég ekki hvað töfrar eru. Það er skemmtileg gáfa að geta séð tákn um sína eigin tilveru rista á klósettvegginn heima hjá sér. Reyndar hugsa ég að allir geti þróað með sér svona skynjun, það er hægt að búa til kristalskúlur úr hverju sem er - en það hjálpar að nota hluti þar sem ljósið brotnar eða hluti þar sem eru margir ógreinilegir skuggar og strik, það er í hinu ógreinilega og hverfula sem svona leiðarkort verða til. 

Annars er hér skemmtilegt Heimskort  með frægu fólki. Það er gaman að spreyta sig á því hver er á myndinni. Ég er búin að finna Lenín, Margaret Tatcher, Clinton, Sirley Temple og Maó.

 

 

 

 

Athugasemdir

[Steingerður Steinarsdóttir, 14.1.2008 kl. 10:40]

Já, ég var einmitt í vafa fyrst hvort karlinum væri alvara eður ei en svo skellihló ég. Það er líka svo gaman að sjá fólk sem getur bullað svona og haldið andlitssvipnum fullkomlega alvarlegum.

[Jón Lárusson, 14.1.2008 kl. 12:27]

Það virðist nú þannig að hægt sé að sjá fyrir samsæri hvar sem er, sama hvort þau séu til staðar eða ekki. Hins vegar tel ég persónulega að tengsl Íslands og Musterisriddara hafi verið meiri en fólk almennt geri sér grein fyrir.

Vildi hins vegar benda á að málverkið, sem sést á myndinni, og hangir á Alþingi, er af fundi í MR (þessi "ver mótmælum allir" fundur). Kópavogsfundurinn (þessi frægi) var haldinn á 17. öld þegar Danir áttu að hafa "hótað" okkur inn í einveldi Danakonungs.

Hins vegar held ég að þetta með leiðarkerfið sé ekki svo langsótt. Það þarf náttúrulega eitthvert ómennskt afl til að hanna svona "sustem", enda spurning hvaða skilning menn settu í orðið kerfi þegar þetta var hannað. Er þetta kerfi samanber "system" eða er þetta kerfi samanber að fara í kerfi (panic).

[Gunnar Helgi Eysteinsson, 14.1.2008 kl. 14:05]

[Sigríður Sigurðardóttir, 14.1.2008 kl. 14:19]

  Manstu eftir henni Maríu Mey sem birtist á "sultutausbrauðsneið" í Þýskalandi (held ég)?  Var mygluð hálfétin sneiðin svo seld fyrir fúlgur!!  Og svo var það Jesú sem ekki vildi vera minni maður en móðir sín, og mætti á eina herlega steikarapönnu út í henni Ameríku!  Og ég sem hafði fengið svo flottan KJARVAL á eina kavíarbrauðsneiðina mína, stuttu áður en Maríusneiðin var seld.......og ég bara ÁT HANN!

  Er svo að reyna að leysa lífsgátuna inni á flísunum á baðherbergisgólfinu mínu.  Er búin að sjá Vincent Price sem Drakúla, tvo strumpa (fílustrump og íþróttastrump), huldumær úr Vestmannaeyjum, Davíð Oddson að saga niður mjólkurfernur, en er samt engu nær um hvenær ég fæ stóra vinninginn í DAS, hvort ég eignist haug af barnabörnum, hvernig heilsan verður, hvernig leysa eigi stríðsmálin í austurlöndum nær og hvenær og hvernig vænta megi heimsendis!

[Ólafur Hannesson (IP-tala skráð) 14.1.2008 kl. 18:27]

Góðan daginn allir. ég vildi bara láta ykkur vita að Jafnréttindafélag Íslands verður stofnað í næstu viku.

Fyrsti fundurinn verður miðvikudagskvöldið 23. Janúar kl 20:00.

Nánari upplýsingar eru á síðunni minni.

[Carlos Ferrer (IP-tala skráð) 14.1.2008 kl. 19:48]

Smekkmaður, Brjánn. Mjög frumlegt (eða var það frumstætt, sem ég vildi sagt hafa?).

[Kolgrima, 15.1.2008 kl. 04:26]

Ég er búin að finna Móse, Lenín, Elísabetu drottningu, Kára Stefánsson, Mark Twain, Gandhi, Margaret Tatcher, Maríu Theresu, Maó, Cesar, Osama bin Laden, Arafat og Marilyn Monroe, Marlon Brando, Che, Bush og Napoleon - iss það eru bara þarnir allir sem maður þekkir!