Á ferð og flugi

Nú er ég á leið heim, þegar ég skrifa þetta þá er ég stödd á Logan flugvelli í Boston og flýg héðan í kvöld og kem á morgni föstudagsins langa til klakans. Þegar ég bókaði ferðina þá passaði ég að stilla ferðina þannig að ég kæmist nú örugglega í vinnu á föstudegi. Fattaði svo seinna að þetta var ekki sv sniðugt, ég hafði gleymt að föstudagurinn er helgidagur og  það er víst lítið hægt að útrétta á föstudaginn langa.

Í fyrradag heimsótti ég háskólann í Austin og skoðaði háskólasvæðið, ég hitti Dorothy frá Taiwan sem er hér í doktorsnámi  og sem ég kynntist á ráðstefnunni í San Antoníó og hún sýndi mér háskólann. Það var tilbreyting að ganga um í stað þess að vera alltaf á bíl. Það er nánast ómögulegt að vera á bíl á háskólasvæðinu, það er allt í lagi að keyra um en hvergi má leggja bíl nema hafa einhver sérstök leyfi og passa. Háskólinn rekur mikið almenningssamgöngukerfi sem er frítt fyrir háskólanema, það heitir UT shuttle og reyna háskólanemarnir að taka þessa strætisvagna í skólann þó þeir eigi bíla. Þetta léttir heilmikið á umferðinni í borginni og hefur Austin sérstöðu í USA að þessu leyti, almenningssamgöngukerfi stætisvagna er hér þróaðra en annars staðar. 

Það er brýn nauðsyn á því að pælt sé í samgöngumálum við þá háskóla sem núna eru í Reykjavík og allar líkur eru á að háskólarnir þjappist ennþá meira saman á minna svæði sem mun setja mikinn svip á Reykjavík - Háskóli Reykjavíkur í Vatnsmýrinni, Háskóli Íslands á melunum og Listaháskólinn niður við sjó.  Þó við getum verið sammála um að háskólamenntun eigi að vera ókeypis eða næstum ókeypis og aðgengi að háskólanámi gott þá ætti ekki endilega að gilda það sama um aðgengi að bílastæðum. Er einhver ástæða til að niðurgreiða bílastæði fyrir háskólanemendur? Er það ekki þvert á móti alveg á móti allri umhverfishyggju að stuðla á þann hátt að auknum umferðarþunga og nota peninga sem eru á fjárlögum eyrnamerktir fyrir menntun í eitthvað allt annað - eitthvað sem er frekar ekki-menntun þ.e. að venja nemendur við að gera ráð fyrir að þeir eigi rétt á ókeypis bílastæðum í miðbæ Reykjavíkur og það sé partur af skólagöngu þeirra að taka þátt í að byggja upp borg bílamenningar - í stað þess að niðurgreiða almenningssamgöngur og hafa sérstaka háskólastrætisvagna. Er ekki miklu skynsamlegra að það sé frítt í strætó fyrir háskólanema en þeir sem kjósa að koma á bíl greiði fyrir parkeringu eðlilegt verð.

Þ

Athugasemdir

[Auður H Ingólfsdóttir (IP-tala skráð) 6.4.2007 kl. 12:12]

Ég var í háskóla í Seattle fyrir liðlega 15 árum síðan (University of Washington). Þar höfðu menn komið upp svokölluðu U-Pass kerfi sem virkaði þannig að þegar þú skráðir þig bauðst þér a kaupa svona passa á fremur hagstæðu verði, ca 2000 kr fyrir önnina, og með honum komstu frítt í strætu. Hluti af peningnum var notaður að gera háskólalóðina hjólavæna og hluti af honum var notaður til að greiða niður kostnað við bílastæði. Þeir sem komu á bíl þurftu að borga gjald - nógu hátt til að þeir hugsuðu sig um en lægra en ef þeir voru ekki með U-pass. Ef voru tveir í bílnum með U-Pass þurfti að borga minna fyrir að leggja bílnum og ef það voru 3 eða fleiri með U-Pass í sama bíl var frítt að leggja. Með þessu móti var sáu yfir 90% nemenda sér hag í að kaupa kortið, sem þýddi á móti að hægt var að halda verðinu niðri. Hugsaði oft um þetta í öllu kraðakinu á bílastæðum HÍ þegar ég var að vinna þar

[Gestur Guðjónsson, 6.4.2007 kl. 20:37]

Við í umhverfisráði Reykjavíkur vorum í Seattle í síðasta mánuði og fengum kynningu á þessu kerfi og var það afar áhugavert, svo ekki sé meira sagt. Enginn háskóli í Bandaríkjunum er með ókeypis bílastæði, að sögn þeirra sem kynntu þetta fyrir okkur