Passíusálmur númer 51

Ég fylgist með fréttum í dag og ég man í svipinn ekki á hvaða öld ég er. Er ég stödd í miðri hryllingsmynd þar sem sögusviðið eru hinar  myrku miðaldir og  aðalskemmtanir almúgans eru opinberar hengingar eða er ég að spila netleik þar sem ég flakka milli tilverustiga og er núna í svipinn föst á borðinu Helvíti þar sem ofbeldi og vald er dýrkað.  

Í greininni Metaphor and War, Again eftir George Lakoff fjallar hann um hvernig táknmyndir eru notaðar til að réttlæta stríð. Hann bendir á hvernig utanríkisstefna Bandaríkjanna notar einn mann sem tákn fyrir þjóð, hvernig Saddam  Hussein er tákn fyrir óvininn.

Ég velti fyrir mér hvernig Lakoff myndi útskýra  þá atburðarás sem nú er teiknuð upp fyrir okkur í fréttum. Hér eru tvær skjámyndir sem sýna þá mynd af atburðum sem Morgunblaðið heldur að okkur, fyrsta fréttin af aftökunni og svo aftakan í máli og myndum og vídeóklippum.

Skáldið Steinn Steinarr orti þennan Passíusálm um aftöku og áhorfendur.

Á Valhúsahæðinni er verið að krossfesta mann
og fólkið tekur sér far með strætisvagninum
til þess að  horfa á hann

það er sólskin og hiti og sjórinn er sléttur og blár
þetta er laglegur maður með mikið enni
og mógult hár

og stúlka með sægræn augu segir við mig
skyldi manninum ekki leiðast að láta
krossfesta sig?

 

Skiptar skoðanir um aftöku Saddams Hussein

Athugasemdir

[Kristján Sig. Kristjánsson (IP-tala skráð) 30.12.2006 kl. 22:02]

Það gerðist í Bretlandi fyrir röskum 100 árum að 11 ára telpa var hengd.

Þetta olli gífurlegu hneygsli og voru blöðin uppfull dagana á eftir af frásögnum af nefndri hengingu, hneygslið var fólgið í því hvernig telpan hagaði sér á aftökupallinum að böðlarnig gátu vart unnið sitt göfuga starf.

[Guðrún María Óskarsdóttir., 31.12.2006 kl. 00:40]

Mikið er ég sammála þér Salvör. Maður veit varla í hvaða tíma maður er staddur né heldur maður hafi yfirsýn yfir hvað margir eru á ferðalagi með strætisvagninum til þess að horfa á krossfestinguna.

Bókstaflega með ólíkindum.

kv.gmaria.

[Sveinn Ingi Lýðsson, 31.12.2006 kl. 10:50]

Mamma, hvernig dó Jesús? Var hann hengdur?

Æi ég man það ekki.  Það var löngu fyrir mína tíð.  Viltu svo ganga frá þessum kaðli þegar þið eruð búin að leika ykkur!

Sagan endurtekur sig í sífellu.  Skrifin hans Lakoff eru góð. 

[Svala Jónsdóttir, 1.1.2007 kl. 18:05]

Góð grein hjá Lakoff og athyglisverðar pælingar.