Mannréttindi útrásarvíkinga, mannréttindi vítisengla

Ríkisútvarpið, fjölmiðillinn í eigu allra landsmanna og undir stjórn menntamálaráðherra er áhrifaríkur miðill í íslensku samfélagi, rödd Íslendinga. Í gærkvöldi var í fréttum og Kastljósi RÚV tekin fyrir tvö mál, annars vegar kóngulóarvefur gervifyrirtækja sem Björgólfsfeðgar hafa spunnið utan um sig út um allar trissur og þeir hafa fest vef sinn á ýmsum skerjum langt út í hafi, eyjum sem enginn hefur heyrt minnst á nema gegnum frásagnir af ferðum fjármagns þeirra. Ferðalög víkinga nútímans eru nefnilega ekki bara virtual heldur eru þau þannig að maðurinn ferðast ekki, eignirnar ferðast heldur ekki, það sem flæðir á milli er eignarhald og skuldir, það er það sem sogast frá einu skeri á annað í einhverjum skrípaleik kasínókapítalísks hagkerfis.

Hitt málið sem takið var fyrir á Rúv í gær var koma nokkurra vítisengla sem voru boðnir í partý hérna. Þeim var meinaður landgangur, að mér skilst vegna alsherjarreglu og af því að þeir ganga í leðurfötum og keyra mótórhjól og eru í félagi sem sums staðar er skilgreint sem glæpasamtök. Ég hef nú dálitla samúð með fólki sem er sjálfkrafa dæmt óalandi, ég hef reynslu af því að vera af meintri hryðjuverkaþjóð. 

Svo var í Kastljósinu afar, afar ósmekkleg og undarleg sena. Það var einhvers konar auglýsing fyrir skemmtistað (af hverju er Kastljós með svona illa dulbúnar auglýsingar fyrir skemmtibúllur?)en einn liður í því að auglýsa þennan skemmtistað var að auglýsa upp klósettin hjá þeim. Það var miklum tíma eytt í að sýna klósett sem voru myndskreytt með myndum af útrásarvíkingum og eigandi þessa staðar útlistaði í nokkrum smáatriðum gleðina og útrásina sem fólst í að spræna á þessa meinta sakamenn.

Þetta var viðbjóðslegt viðtal.  Ég hef enga samúð með þeim sem komu okkur í þessa stöðu sem við erum í núna en engin réttarhöld hafa farið fram og engin hefur ennþá verið opinberlega ákærður fyrir að bera ábyrgð á hruninu. Og jafnvel þó að þessi menn hefðu verið dæmdir og fundnir sekir um landráð og glæpi gagnvart íslensku þjóðinni þá er það siðlaust og vitfirringslegt að nota myndir af þeim á þenna hátt, það er eins konar hermigaldur að reyna að lítilsvirða þá með því að kúka og pissa á þá. 

Allir menn eiga rétt á heiðarlegri og málefnalegri umfjöllun, líka vítsenglar, líka útrásarvíkingar í ónáð. Við ættum ekki að skerða mannréttindi þeirra sem okkur líkar illa við ef við myndum ekki vilja skerða mannréttindi vina okkar á sama hátt. 

Hvað ef þessi skemmtistaður hefði haft myndir af íslenskum fréttakonum á klósettunum? Hefði þessi frétt verið birt með sams konar gleði í Kastljósinu? Og varðandi vítisenglanna þá er það alveg klárt að þetta er félagsskapur sem dregur að sér svona gæja sem vilja virka hættulegir og eru hugsanlega hættulegir. En ég hugsa að mótorhjólasportið dregi til sín sams konar fólk og fer í þessar flúðaferðir (river rafting), svona fólk sem fær kikk út úr að koma til eldlandsins Íslands og upplifa sig í stöðugri lífshættu og baráttu við náttúruöflin. Ég held líka að vítisenglar dragist upp á hálendið, þeir hafa svona fjalla-eyvindar-mentalitet.  

Mér finnst nú frekar mikil skammsýni að útiloka mótórhjólagengi í að vera túristar á Íslandi og raunar mannréttindamál að þeir fái að fara í ofurhugaferðir hér á landi.

En þá fyrst reynir á hversu mikið við styðjum við mannréttindi þegar kemur að því hvaða mannréttindi við viljum fyrir þá sem okkur er illa við og þá sem við teljum okkur eiga eitthvað sökótt við. 

 

12 vísað frá landinu

Athugasemdir

[V. Jóhannsson (IP-tala skráð) 7.3.2009 kl. 11:43]

100% sammála þér Jóhann.  " Vítisenglar " hafa aðeins ein lög og það eru þeirra eigin lög.  Þeir virða engin mannréttindi . Þeir berjast við önnur glæpagengi um yfirráð á eiturlyfjasölu- og smygli og hika ekki við að myrða sína eigin félagsmenn ef þeir gera smá mistök sem getur komið upp um þeirra glæpastarfssemi.     Vítisenglar hafa engann áhuga á svaðilförum á Íslandi heldur skipulagi á eiturlyfjasölu og yfirráðum!  Þetta eru einfaldlega siðlausir lagleysingjar sem fara sínar eigin leiðir.

Hitt er annað mál að útrásarvíkingarnir íslensku eru einnig siðleysingjar og  eiga ekkert gott skilið í framtíðinni og vonandi verða þetta " áhrifsorð ".

[Finnur Bárðarson, 7.3.2009 kl. 12:48]

Vítisenglar eru kórdrengir í samanburði við þetta Armani pakk sem valsar inn og út úr landinu óáreitt. Fjórmenningarnir sem Morgunblaðið fjallar um í dag eru hinir einu sönnu englar vítis. Góð grein hjá þér Salvör.

[Fimmta valdið (IP-tala skráð) 7.3.2009 kl. 13:09]

Hell's Angels eru skilgreindir sem glæpasamtök og dæmdum sakamönnum er snúið frá landinu m.t.t. allsherjarreglu. Hefur ekkert með mótorhjól að gera.

Hver var afstaða þín, Salvör, gagnvart málþingi starfsmanna í klámiðnaði árið 2007 sem halda átti hérlendis? Á hvaða forsendum?

[Salvör Kristjana Gissurardóttir, 7.3.2009 kl. 14:02]

Fimmta valdið: Ég vil svara spurningu þinni eins og ég gerði á bloggi á sínum tíma. Ég var mjög ánægð með að hætt væri við að halda þessa ráðstefnu hérlendis en ég dró í efa að hótel hér á Íslandi gætu mismunað svona hótelgestum þ.e. meinað aðgang þeim sem þau teldu ekki vera að gera nógu góða hluti hér á landi. Á sama hátt finnst mér af og frá að Visa fyrirtæki leggist í að rannsaka hvað þeir sem eru með visareikning eru að borga fyrir. Ég veit að margir femínistar eru ósammála mér, þeim finnst að það  í lagi að meina klámfólki að leigja hér hótelherbergi. Þó ég sé harðlínufemínisti sjálf þá er ég líka áhugamanneskja um mannréttindi og frelsi og ef þetta tvennt skarast þá mun ég alltaf taka málstað þess sem er sviptur grundvallarmannréttindum - hvort sem það er Skarphéðinn Nálsson, Björgólfur Guðmundsson eða einhver norskur vítisengill.

[Salvör Kristjana Gissurardóttir, 7.3.2009 kl. 14:09]

ég ætla að notfæra mér aðstöðu mína sem stjórnanda þessa bloggs og þurrka út athugasemdir tveggja rugludalla sem réðust á mig með óbótaskömmum fyrir að verða vítisengla. Mér finnst alveg sérstaklega gaman að meina þeim aðgang að svarhala hér á mínu bloggi, þeim hinum sömu og finnst í lagi að meina hópi Norðmanna að fara í kjötsúpu til vina sinna á Íslandi

 Og varðandi þá sem munu þá jarma yfir að mér farist ekki að tala um frelsið, ég sem sjálf loka á fólk sem segir það sem mér líkar ekki við þá vil ég benda á að það er bloggari sem ræður hvað má birtast á hans athugasemdakerfi og endilega stofnið bara blogg sjálf þið sem hafið verið vísað úr mínu umráðasvæði

Þetta er alveg sérstaklega skemmtilegt að loka svona á hrokagikki sem finnst að allir sem tala ekki eins og þeir sjálfir viti ekkert og hafi ekki kynnt sér málið.

[Salvör Kristjana Gissurardóttir, 7.3.2009 kl. 14:16]

Þegar ég skoðaði svarhalana betur þá sá ég að ekki var tilefni til að vísa út úr minni landhelgi (eylandi þessa bloggs) nema öðrum sem var óssammála mér, þ.e.e þeim sem nefndi sig Jóhann. Ég faldi athugasemd hans og bannaði hans IP tölu. Ástæðan er auðvitað almannahagmunir og alsherjarregla, sama og vítisenglum er vísar úr landi fyrir, við getum ekki leyft alls konar slúbbertum og drusluliði að tjá sig á þessu eðla bloggi mínu.

[Salvör Kristjana Gissurardóttir, 7.3.2009 kl. 14:36]

Fimmta valdið: Fann hérna blogg sem ég skrifaði um klámráðstefnuna á sínum tíma, ég get ekki séð annað en ég sé alveg sjálfri mér samkvæm, hvort það séu vítisenglar eða klámhundar. Mannréttindi eiga líka að gilda fyrir þá. Hér er bloggið: Takk allir

[Finnur Bárðarson, 7.3.2009 kl. 14:40]

Got hjá þér Salvör. Maður gerir þá lágmarkskröfu til gesta að þeir sýni af sér háttvísi og almenna kurteisi þegar þeir koma í heimsókn. Þetta er þín síða og við eru gestir.

[Fimmta valdið (IP-tala skráð) 7.3.2009 kl. 15:22]

Þakka svör þín Salvör. Ég vil gera stóran greinarmun á þessum tveimur hópum. Annar þeirra frá einum kima viðskiptalífsins (og ekki þeim ljótasta) í fullkomlega lögmætum erindum og án þess að sannanlega væru meðal þeirra lögbrjótar. Ekki ósvipað því ef hér hefði ætlað að koma hópur frá kaþólskri kirkjudeild í USA. Vilji menn klína óþverra klámiðnaðinn má gera það gagnvart kaþólsku kirkjunni með svipuðum aðferðum, en innan hennar hafa verið framin svæsin níðingsverk á fólki sem þekkt er.

Hinsvegar erum við að verjast innreið glæpasamtaka. Hvar er réttur okkar almennra borgara gagnvart þeim og þeirra "mannréttindum" eða rétti til að útvíkka glæpastarfsemi sína? Eiga mannréttindi heiðvirðra íslenskra borgara hér ekki að vega þyngra? Mitt svar er augljóst af því sem fyrr er sagt.

[Hilmar Gunnlaugsson, 7.3.2009 kl. 15:28]

Hells Angels hafa staðið fyrir morðum, ránum, eiturlyfjasölu og öðru slíku sem ég hef fjallað ítarlega um á vefsíðu minni. Mjög mikilvægt er að koma í veg fyrir að þessir glæpamenn nái ítökum hér og ætti fólk því að hrósa lögreglunni fyrir þessa góðu lausn mála.

[Kári Ólafsson (IP-tala skráð) 7.3.2009 kl. 15:29]

Það er mikil einfeldni að ræða um komu vítisengla á því plani að hér séu að koma túristar á leið í flúðasiglingar og mótorhjólaþeyserí. Jú, þeir eru menn eins og aðrir og njóta því að sjálfsögðu mannréttinda skv. lögum og stjórnarskrá. En stórnarskráin gerir einmitt ráð fyrir því í nánast öllum mannréttindaákvæðunum að nauðsynlegt geti reynst að skerða þau að einhverju leyti séu ákveðin skilyrði uppfyllt.

Staðreyndin er sú að Vítisenglar eru samtök með frekar skýr markmið: ná bólfestu á svæðum til þess að ná þar yfirráðum á fíkniefnamarkaði og fleiri sviðum glæpa. Það er ekkert leyndarmál og því furða ég mig alltaf jafn mikið á því að fólk fari að tala um að þetta séu nú örugglega ágætis piltar, það þurfi að gefa þeim séns, þeir hafi nú enn ekkert gert af sér o.s.frv.

Hverskonar barnaskapur er þetta ?? Hvernig dettur fólki í hug að mála þá í björtum og hvítum litum á þeim forsendum að þeir hafi enn ekki brotið hér af sér ? Sé þeim leyft að ná hér fótfestu er ekki aftur snúið með það, og við þurfum að fást við margfalt harðsvíraðari glæpamenn en nokkurn tíma áður. Bull og vitleysa.

Mannréttindi þeirra eru skert þar sem hagsmunir heildarinnar eru vega svo mun þyngra en þeirra einstöku réttindi að fá að fara frjálsir ferða sinna hvert sem þeir vilja. Og það er vel!

Það má segja hitt og þetta um útrásarvíkinga, og ég er því flestu sammála. En að ætla að gefa vítisenglum prik í samanburði við þá, og bera fram þvætting eins og að fyrst að Jón Ásgeir og félagar fá að valsa um hér þá ættu vítisenglar að fá að gera það líka er í besta falli heimskuleg nálgun. Það er jafn vitlaust og að segja að fíkniefnasmyglarar eigi að fá lægri dóma þar sem nauðgarar fá þá.

[Jóhann (IP-tala skráð) 7.3.2009 kl. 19:55]

Ekki virkaru nú gáfulegri kæra Salvör fyrir það að þurrka út færsluna frá mér.

Ég ætla að vona það að þú og þínir nánustu lendi aldrei í því að kynnast "vítisenglum" persónulega. Reyndar vona ég að Íslendingar losni við þá plágu. Það getur vel verið að fyrir þér sé þetta grín, en ég ætla þá að biðja þig að gæta vel að því sem þú segirá blogginu og íhuga að hverju þú ert að stuðla.