Afveigaleiddur prestur

Í DV í dag er fjallað um Egil Hallgrímsson prest í Skálholtskirkju sem kynnir fjárfestingaklúbb fyrir fólki og selur Herbalife í aukavinnu meðfram störfum sínum sem sóknarprestur í Skálholtskirkju. 

Sjá má meira um hugðarefni Egils á vefsíðunni http://www.ehallgrimsson.com/ 

Hér er svo sérstök meðmælasíða Egils um Bridge fjárfestingaklúbbinn. 

Egill er líka moggabloggari eins og ég og notar vettvanginn til að rökstyðja að hann megi alveg tala um fjárfestingar í bloggpistli sínum í gær, sjá hérna:Hverjir mega tala um fjárfestingar?

Hér er skjámynd þar sem Egill  mælir með herbalife og bridge fjárfestingum: 

Egill virðist vera skemmtilegur og hress maður en hann er á villigötum varðandi þetta fjárfestingaáhugamál sitt og hvernig hann blandar því saman við hugsjón sína sem sálusorgara. Það er þó ekkert ólöglegt og sennilega ekkert í siðareglum presta sem bannar svona iðju presta. Ég held að lög um réttindi og skyldur opinberra starfsmanna gildi ekki um presta en þessi iðja Egils er klárlega ósamrýmanleg þeim lögum nema hann hafi fengið leyfi yfirmanna sinna biskupsins til að sinna svona aukastörfum og þar með það mat að þetta sé ekki ósamrýmanlegt starfi hans sem prests. 

Egill segir í DV viðtali "Ég hef fengið misjöfn viðbrögð en það er bara eins og þegar ég fékk mér mótorhjól. Fólki fannst það ekki samræmast starfi prestsins að þeysa um á því".

Hérna er Egill á villigötum. Það er reginmunur á því að fá sér mótorhjól og tæta og trylla um á því á sveitasvegum á Suðurlandi og því að sálusorgari - maður í embætti þar sem fólk treystir þvi að hann vaki yfir velferð þess - ráðleggi um afar áhættusamar fjárfestingar. Það myndi enginn fjármálasérfræðingur með sjálfsvirðingu ráðleggja fólki um fjármál á sama hátt og Egill gerir. En því miður þá er líklegt að einhverjir treysti presti betur en einhverjum Jóni eða Gunnu út í bæ og láti frekar ginnast. 

Það er bara flott að prestur sé á mótorhjóli og það er allt í lagi að prestur ráðleggi fólki varðandi lífsstíl sinn m.a. offitu svo fremi sem prestur blekki ekki fólk til að taka inn eitthvað sem getur skaðað það eða taki þátt í að féfletta fólk með að selja því eitthvað gagnlaust rusl. Ég held nú reyndar að herbalife sé ekki gagnlaust, margir telja að það hafi gagnast sér. En sölumennskan í herbalife er mjög vafasöm og margir eru vélaðir til að verða Herbalife sölumenn og kaupa lagera og veit ég til þess að ungt fólk á Íslandi hafi orðið gjaldþrota vegna  þessa. 

En ég vona að séra Egill leiti sér ráðlegginga hjá fjármálasérfræðingum og taki upp samstarf við einhverja virta banka á Íslandi áður enn hann fer að ráðleggja fólki um galgopalegar fjárfestingar. Síðustu ár hafa verið uppgangstími á Íslandi og fólk er andvaralaust í fjármálum og hefur tilhneigingu til að telja að hlutirnir haldi áfram í sömu átt, að húsnæði haldi áfram að hækka í verði og kaupið að hækka og þar með lánin að lækka hlutfallslega. Fólk sem hefur misst allt sitt fé og á ekkert nema skuldir er mjög fjötrað og oft mjög óhamingjusamt. Það er verðugt verkefni fyrir presta sem og aðra sem sinna sálgæslu að skilja og reyna að sporna við auknum vanda þessa fólks en það er alls ekki gott ef prestar eru í broddi fylkingar þeirra sem steypa sér í eitthvað  fjármálafen og ráðleggja öðrum að gera það sama.

Við lauslega gúglun á Bridge ltd. þá virðist mér þetta vera  pýramídasölufyrirtæki. Ég fann m.a. þessar umræður á spjallvef MindArk - con artist?

But Peter Alling, legal expert at the Swedish Lottery Inspection has reviewed Bridge Group and classifies it as a pyramid scheme. Which has resulted in the Lottery Inspection reporting them to the police. The only way for the members of Bridge to make money is to recruit new members.

 

Þar fann ég líka tengil í þessa áhugaverðu sænsku grein um Bridge:

Entropia-bolaget värt 200 miljoner

 

Athugasemdir

[Matthías Ásgeirsson, 21.8.2007 kl. 15:17]

Ég er sammála þér í einu og öllu en velti samt einu fyrir mér.

Af hverju ættum við að gera meiri kröfur til þess sem prestur boðar um fjármál en þess sem hann boðar um lífsspeki?

[áhugasamur (IP-tala skráð) 21.8.2007 kl. 19:44]

Sammála þér í einu og öllu. Þér tekst á mjög skemmtilegan hátt að segja hreint út hvað þér finnst (og mér!). Sálusorgari og sölumaður passar ekki saman. En kannski á hann auðvelt með að redda sér kúnnum með sínum titli. 

Ekki það að ég hafi áhuga á þessum "presti" yfirhöfuð, meiri er minn áhugi á þessu fjárfestingabrjálæði Íslendinga í dag/í gær. Og það er ekki hægt að vara fólk nógu mikið við píramídakerfinu (sem er jú stórkostlegt, en bara meðan það virkar). Fólk virðist vera ansi andvaralaust...

[Guðrún Sæmundsdóttir, 21.8.2007 kl. 21:34]

Salvör, ég er svo gjörsamlega sammála þér í pistlinum þínum. Þessi viðskipti sem presturinn er talsmaður fyrir fara engan veginn saman við sálgæslu.  Píramídaviðskiptin ná einhverju heljartaki á meðlimum sínum, fyrrverandi tannlæknirinn minn var á kafi í þessu og reyndi mikið að selja mér gull á meðan hann var að rótfylla tönn í mér 

[Sveinn Ingi Lýðsson, 21.8.2007 kl. 22:41]

Ég var boðinn á svona kynningarfund hjá Bridge Investments í fyrravetur og þekki nokkra sem eru í þessum "buissness" af lífi og sál.  Og virðast ekki á horriminni fjárhagslega.  Ég var svo sem búinn að lesa mér til um fyrirtækið og conceptið sem það byggist á þannig að ekkert kom mér á óvart þarna.  

Nema eitt:  Salurinn var meira og minna setinn af mönnum úr "ysta jaðri" fjármálaheimsins, þ.e. þeirra sem eru að sýsla með peninga þeirra efnameiri.   Vörslu- og ávöxtunarmenn.  Þarna voru þeir með dollaraglampann í augunum því þarna sáu þeir færi á "gráa markaðnum", markaði sem annars er öllum lokaður nema björgúlfum, wernersonum og svoleiðis hákörlum.

Að lokum svona til fróðleiks:  Séra Egill er ekki eini presturinn í þessum bransa.  Fróðlegt væri fyrir blaðamenn að mæta á þessa fundi og sjá hverjir sækja þá.  Ekki að ástæðulausu því þarna hafa menn verið á ávaxta fjármuni sína á ævintýralegan hátt. 

[Óli Ágústar (IP-tala skráð) 22.8.2007 kl. 09:06]

Góður pistill og tímabær. Takk fyrir hann. Ljóðlínan sem hann Guðmundur Jónsson, óperusöngvari, söng um árið, kemur svo oft í hugann þegar heyrist af guðsmönnum landsins: ,,Annar er blindur og hinn ekki sér..." Bókin helga segir um slíka: ,,Ef blindur leiðir blindan, falla báðir í gryfju." Hann er breiður og flottur vegurinn sem þangað liggur og áreiðanlega fróandi að spæna þar á mótorhjóli!

[Pétur Henry Petersen, 23.8.2007 kl. 20:50]

Margur verður af aurum api

gaman að sjá guðsmanninn dansa 12 kg léttari í kringum gullkálfinn

[Anna Margrét Bjarnadóttir (IP-tala skráð) 23.8.2007 kl. 22:19]

Það er nú meira hvað þeir hljóta að vera máttugir þessir vafasömu Herbalife sölumenn samkvæmt því sem þú segir, véla ungt fólk til að kaupa sóra lagera og gera þau gjaldþrota!!! Þetta vesalings unga fólk eru greinilega FÓRNALÖMB þessa vafasama gengis og hafa alls ekki verið þess megnug að vera ábyrg fyrir sjálfum sér.