Stigamenn og saumakonur taka yfir Ísland!

 Magga P er ein af hetjum vikunnar. Á föstudaginn settist saumakonan Magga P einbeitt við saumamaskínuna og saumaði bleikt klæði.

 Í miðjum mótmælafundinn  á laugardaginn þá mátti sjá stigamanninn Möggu P einbeitta á svip klifra upp í stiga og sveipa sjálfan  sóma Íslands, sverð og skjöld bleikum kjól.

Á sunnudaginn  mætti  Magga P í karlavígið  Silfri Egils og lagði það að velli.

Núna á mánudagskvöldi þrumaði ræðumaðurinn Magga P yfir ráðamönnum og almenningi á borgarafundi í Háskólabíó og sýndi fólki fram á hver ættu að vera einu réttu viðbrögð íslenskra stjórnvalda. Að standa upp úr sæti sínu.

Hér er mynd af Möggu P á saumavélinni á föstudaginn með Steinunni og Kolbrúnu og litlu þriggja mánaða dóttur Möggu P. Ég  hugsa að litla stúlkan eigi eftir að verða stolt af mömmu sinni þegar hún vex úr grasi og syngja undir í baráttulaginu "Seinna börnin segja, sjá mömmu hún hreinsaði til".  Magga P er svo sannarlega kona sem bæði þorir, getur og vill.  

Hér er líka skjámynd af Möggu P sem viðmælanda hjá Agli Helgasyni í sjónvarpsþætti hans á sunnudaginn. 

Áfram Magga P og allir hinir femínistarnir úr  Neyðarstjórn kvenna sem hafa látið til sín taka í vikunni! Silja Bára var frábær á borgarafundinum og Katrín Oddsdóttir átti sviðið í sinni þrumandi barátturæðu á Austurvelli á laugardeginum. 

Megi saumakonur og stigamenn Neyðarstjórnar kvenna taka yfir Ísland og vinna okkur upp úr því neyðarástandi sem við erum í núna.

Bankaleyndina burt

Athugasemdir

[Sigurður Haukur Gíslason, 25.11.2008 kl. 00:04]

Ræða Margrétar var mjög góð enda á mannamáli. Ráðherrarnir aftur á móti hrokafullir og svöruðu í klisjum.

Þessi ríkisstjórn er ekki á vetur setjandi.

[María Kristjánsdóttir, 25.11.2008 kl. 00:13]

Hún var best og frumlegust.

[Einar Sigurbergur Arason, 25.11.2008 kl. 03:30]

Ég náði ekki að sjá ræðurnar á borgarafundinum, þar sem ég var á kvöldvakt á sjúkrahúsi. Gat sest niður þegar fyrirspurnir voru, fannst þetta magnaður fundur - það sem ég sá af honum. Mér fannst lokaorð fundarstjóra góð, þegar hann lét klappa fyrir stjórn og þingmönnum - þeir mættu þó - og sagði að það væri spor fram á við að stjórn og almenningur væru þarna að tala saman. Ég er mjög sammála því, þó ég sé alls ekki stuðningsmaður ríkisstjórnarinnar.

Stjórnin þyrfti að skrá sig hið snarasta á námskeið í almannatengslum og því að sýna vinnuveitendum sínum (kjósendum) sjálfsagða mannasiði. Einn og einn ráðherra kann að tala við almenning, þeir eru bara of fáir, og Geir Haarde getur ekki stært sig af því að vera í þeim hópi. Maðurinn þarf að læra mannasiði.

[Hallgerður Pétursdóttir (IP-tala skráð) 25.11.2008 kl. 12:51]

Margrét var öldungis frábær. Enda eigum við mikið af frambærilegu fólki,fólki sem hefur því miður ekki gefið kost á sér í pólitík.Kannski er það að breytast núna.

[Þórður B. Sigurðsson (IP-tala skráð) 26.11.2008 kl. 01:00]

Sæl Salvör, mig langar að fá leyfi hjá þér til að nota mynd sem þú tókst af stúlku með skilti sem á stendur ,,hættum að borga" til að kynna undirskriftasöfnun í þágu heimilanna.

Það er planið að setja þetta á prent þannig að góð upplausn er vel þegin.

 Ertu til í að senda mér hana á [e-mail] það er ef þú leyfir mér að nota hana. 

[Guðl. Gauti Jónsson, 26.11.2008 kl. 12:58]

Margrét, - þú ert sómi þjóðarinnar sverð og skjöldur. Áfram Margrét.