Riddari tjáningarfrelsisins

Ég átti afmæli í gær og hef verið að halda upp á það með hléum undanfarna daga. Ég var mjög ánægð með að Kastljósið mætti heim til mín á afmælisdaginn með her manns svo ég gæti tjáð mig líka fyrir framan alþjóð í sérstökum bloggþætti.

Hér er mynd af Kastljóshernum fyrir utan húsið hjá mér. 

Mér fannst þetta mikill heiður, ég er að verða einn af elstu bloggurum landsins mælt í bloggúthaldi, ég hef bloggað í  átta ár og ef blogg mitt er skoðað þá hefur það tvö meginstef, annars vegar baráttu fyrir kúguðum hópum og þá sérstaklega konum og hins vegar baráttu fyrir tjáningarfrelsi og athafnafrelsi þeirra valdalausu.

 Hér er mynd af mér á afmælisdeginum í gær. Svona var uppstillingin í viðtalinu.

Það er búið að vera viðtal í Kastljósi við einn bloggara, hann Jens Guð og næst verður sem sagt viðtal við mig. Vonandi birtist það í kvöld. Viðmælandi minn var Helgi Seljan og fór vel á með okkur enda hef ég helgað honum eitt sérstakt blogg forðum daga Sjö mínútur af Kastljósi Helgi Seljan versus Jónína Helgi var greinilega ekkert að erfa þessi skrif eða hann hefur aldrei séð þau.  Ég sá ekki betur en að sá sem stjórnaði kvikmyndakrúinu væri hann Gaukur  Úlfarson sem einmitt þennan sama dag var dæmdur til greiðslu miskabóta til Ómars R. Valdimarssonar fyrir að kalla hann aðalrasista bloggheima. Það er alls ekkert fallegt að kalla fólk slíkum ónefnum.

Ég las yfir þennan dóm og hann er nú alveg brandari. Nema náttúrulega fyrir þann sem er gert að greiða  sektina. Ég vona að þessum dómi verði áfrýjað, þetta er gríðarlega mikilvægt varðandi tjáningarfrelsi á Íslandi. Ég er þó ekki að mæla því bót að fólk skrifi svona, frekar að benda á að í samfélagi þar sem öllum er leyft að tjá sig og tjáningin er margradda þá fylgir líka að það verður að sýna sem mest umburðarlyndi þeim sem ekki kunna eða geta tjáð sig öðru vísi en með öskrum og ragni.

Hér eru nokkrar bloggfærslur sem gefa innsýn í hugarheim hins seka:

 Er Ég Sá Fyrsti Til Að Vera Kærður Fyrir Blog?

• Kæran Er Komin!
• Ég Bíð Og Bíð Ómar..
• Hvenær Kemur Kæran?
• Ómar R. Valdimarsson Ætlar Að Kæra Mig :)
• Aðal Rasisti Bloggheima

Mér sýnist á öllu að hér fari ákaflega ungæðislegur bloggari í skrifum sínum. Hann áttar sig ekkert á hvaða afleiðingar orð hans geta haft og virðist meira segja vera ánægður með að skrifin veki viðbrögð. Hann segir: "Ég er aðeins búinn að vera hér í blogglandi rúmar 2 vikur og er strax kominn með kæruhótun vegna skrifa minna! Ég lít á þetta sem glæsilegan árangur."

Afstaða mín til þessa máls er sú að þessi dómur sé út í Hróa hött. Þetta eru vissulega rustaleg skrif en ekki hvorki neitt sérlega móðgandi eða ærumeiðandi fyrir viðtakandann Ómar. Það er er  upphrópun og dónaskapur að kalla einhvern aðalrasista bloggheima en ef það er orðið refsivert þá þýðir það að listrænt frelsi og tjáningarfrelsi fólks til að tjá sig á litríkan hátt er ógnað. Þetta er þar að auki réttlætismál.  Tjáningarmáti fólks í sumum stjórnmálaflokkum t.d. hjá Samfylkingunni og Vinstri grænum er þannig að það dregur mjög mikið úr möguleikum fjölda  fólks í þessum fylkingum til að tjá sig ef sumir úr þessum fylkingum fá ekki að tjá sig með skítkasti um andstæðinga. Sumir kunna ekki öðru vísi orðræðu. Tökum t.d. nýleg skrif Össurar og tökum stóran part af skrifum Guðmundar Steingrímssonar, skrif eins og þessi Brúnn Björn Ingi þar sem Guðmundur kallar Björn Inga skítadreifara.  Við verðum að hafa í huga að tjáningarfrelsið er ekki bara fyrir okkur góða Framsóknarfólkið sem tjáir sig svo fagurlega að það er eins og næturgalasöngur. Tjáningarfrelsið er líka fyrir hina, líka fyrir þá sem kunna ekki annað en krúnka með rámum rómi.

 

Sekur um meiðyrði á bloggi

Athugasemdir

[Sigurður Þór Guðjónsson, 27.2.2008 kl. 19:21]

Og hver á svo að dæma hvort krúnkið er rámt eða hrein snilld.

[Jonni, 27.2.2008 kl. 19:42]

Sigurður; þetta er einmitt kjarni málsins. Gera ekki alllir sér grein fyrir því að skítkast á borð við það sem dæmt fyrir hér er munnræpa og þvættingur sem ekki skaðar neinn nema þann sem ælir því út úr sér? Þarf dómstóla til þess að skera úr um svona?

Þetta snýst um skoðanir og ekki dreifingu á lygum og röngum staðreyndum.

Ef mér finnst einhver vera asni hlýt ég að mega segja það. Allar fullorðnar manneskjur skilja að þetta er mín skoðun og ekki vísindalegt mat á viðkomandi. Þessi dómur er hrikaleg mistök og getur ekki staðist laganna bókstaf, og er þar af leiðandi álitshnekkir fyrir viðkomandi dómara.

[Heimir Lárusson Fjeldsted, 27.2.2008 kl. 20:24]

Sé þig vonandi á morgun!

[Björn Heiðdal, 27.2.2008 kl. 21:00]

Má þá kalla Ómar ríðara og dómarann brjóstagellu án þess að þurfa borga sektir?  Varla því það sem Gaukur sagði um Ómar var mjög sambærilegt.  Ég hélt nú að Ómar væri alveg sérstakur málsvari málfrelsis eftir gagnrýni hans á netlögguhugmyndir VG.  En svo kom í ljós að Ómar er netlöggan ógurlega.  Hann vildi bara ekki að netlöggunar væru einhverjir kommar heldur alveg helbláir Sjálfstæðisdrengir.

[Jonni, 27.2.2008 kl. 22:15]

Ef ljóst er að ummæli þín um að Ómar sé ríðari er byggt á þinni skoðun finnst mér ekki að þú eigir að borga sekt. Það má svosem leiða líkur að því hvort Ómar sé virkilega ríðari eða ekki en það finnst mér nú að hann geti svarað fyrir sjálfur ef honum finnst þörf á því.

Ef hins vegar þú lætur í það skína að það viti það allir að hann sé ríðari, það hafi ekkert með þína skoðun að gera, nú þá getur náttúrulega Ómar krafist þess að þú sannir að hann sé það ellegar sért þú sekur um rógburð og meiðyrði.

Hvað er annars ríðari Björn?

[Kristján Sigurður Kristjánsson, 28.2.2008 kl. 00:42]

Dómar gegn málfrelsi undanfarin misseri eru þannig að illræmdir skíthælar sjá sína sæng útbreidda og segja, sem þeim hefði aldrei dottið í hug áður, "nú er minn tími kominn".

Var það ekki fyrr í vikunni sem eitt slíkt mál var í aðalmeðferð?

[Salvör Kristjana Gissurardóttir, 28.2.2008 kl. 01:00]

Sigurður Þór: Þú spyrð hver eigi að dæma hversu rámt krúnkið er. Ég held að svarið sé alltaf að það sem er líkast okkkur sjálfum og eins og við myndum sjálf tjá okkur það er fyrir okkur fagur söngur. Hins vegar er tjáning þeirra sem eru ólíkir okkur og hafa gildi sem okkur býður við  eitthvað sem okkur finnst vera krúnk. Það er alltaf tilhneiging hjá þeim sem eru í valdastöðu að takmarka tjáningu sem grefur undan valdinu og gagnrýnir það.

[Sigurður Þórðarson, 28.2.2008 kl. 10:04]

Þakka þér Salvör fyrir þennan ágæta pistil  og innlegg sem hafa sannfært mig.

Dónaskapur getur vissulega verið hvimleiður en hann er skaðlegastur fyrir þann sem beitir honum.  Þarna er meiri hagsmunum fórnað fyrir minni, augljóslega.

[Fanný Guðbjörg Jónsdóttir, 28.2.2008 kl. 15:38]

Innilega til hamingju með afmælisdaginn!

[Marta B Helgadóttir, 28.2.2008 kl. 17:10]

Innilega til hamingju með afmælið Salvör.

[Steingerður Steinarsdóttir, 29.2.2008 kl. 13:45]

Þú varst flott í Kastljósinu. Til hamingju með afmælið.

[erlahlyns.blogspot.com, 29.2.2008 kl. 20:05]

Góð frammistaða í Kastljósinu. Skemmtilegt framtak hjá þeim að ræða við bloggara.

Hvað dóminn varðar er ég sammála, lestur hans er hreinn brandari.  Ég tek líka undir með Andrési hér að ofan sem leggur til að Paul Nikolov fari í mál við Ómar ef Hæstiréttur staðfestir dóminn.