Illi Össur

Hæstvirtan iðnaðarráðherra okkar Össur Skarphéðinsson sá ég seinast á málþingi SAFT um netsiðferði.  Hann flutti þar ávarp en yfirskrift málþingsins var “Þú ert það sem þú gerir á Netinu”

Össur er mildur og góðgjarn maður í tali svona dags daglega. En þegar hann bloggar á næturna þá breytist hann stundum í emjandi varúlf. Bloggið Sjálfseyðing ungstirnis er  emj svoleiðis úlfs.

Það er erfitt að sjá hvað Össuri gekk  til. Sennilega missti hann sig bara í orðaflaumnum og komst í einhvers konar trans í öllum þessum myndrænu persónulýsingum. Hugsanlega var hann andvaka og gleymdi stað og stund og hélt að hann væri ennþá hetjan í stúdentapólitíkinni í HÍ og gleymdi að hann er ráðherra á Íslandi og ber sem slíkum að sýna gott fordæmi.

Siðferði í íslenskum stjórnmálum batnar ekki við málflutning eins og þetta blogg Össurar. Persónulýsingar Össurar á pólitískum andstæðingum eru heldur ekki neinn sannleikur, hann teiknar upp þá mynd af Sjálfstæðismönnum sem honum (Össuri) kemur best og það er svo sannarlega ekki sannleikurinn eini og hreini.  Það hefur margoft komið fram að Össur er mjög umfram þessa orkuútrás og sennilega er andúð hans á Gísla Marteini afar tengd því að Gísli Marteinn er líklegri en aðrir til að standa í veginum fyrir þeirri framtíð orkuútrásar sem Össur telur í sjónmáli.

Össur var í Mannamáli hjá Sigmundi Erni í síðustu viku og þar mætti ekki kveldúlfurinn heldur hinn blíði Össur sem getur ekki fengið að sér að atast í fólki sem á bágt eins og Vilhjálmur á blogginu sínu. Allir sjá nú samt að engir eiga eins bágt þessa daganna og hinir fulltrúar Sjálfstæðismanna í borginni, þau áttu einu sinni framtíðina fyrir sér í stjórnmálum. Nú eiga þau bara fortíð með Vilhjálmi.

En hlustið á hinn blíða Össur. Þar talar góður maður:

Pistill Össurar ræddur á þingflokksfundi

Athugasemdir

[Hlynur Jón Michelsen, 21.2.2008 kl. 19:24]

Össur vinur minn virðist ætla að bjarga Villa, hinum vini mínum.

[Steingerður Steinarsdóttir, 22.2.2008 kl. 13:21]

Já, þessi skrif Össurar voru skrýtin svo ekki sé meira sagt.

[Heimir Lárusson Fjeldsted, 22.2.2008 kl. 16:27]

"Hið milda vald". Sagði fyrrverandi umhverfisráðherra fyrir margt löngu ef ég man rétt.

[Guðrún María Óskarsdóttir., 24.2.2008 kl. 01:50]

Tækifærissinnað blaður ekkert annað Salvör.

kv.gmaria.

[Ásthildur Cesil Þórðardóttir, 25.2.2008 kl. 09:31]

Ertu að meina "gott er að hafa tungur tvær og tala sitt með hvorri " Salvör mín.

[Salvör Kristjana Gissurardóttir, 28.2.2008 kl. 01:05]

Cesil: Ég er ekkert að meina um tvær tungur Össurar. Ég held að Össur sé góðgjarn maður og þetta blogg hans er alveg á skjön við hans karakter. Hann getur hins vegar ekki bakkað út úr þessu, hann metur það sennilega þannig að það verði talið veikleikamerki.