Hryllingur... myndefnasía ríkislögreglustjóra

Ég vil hvetja allt áhugafólk um netfrelsi og ferðafrelsi okkar á Internetinu til að mótmæla af alefli þessum fyrirætlunum um að koma upp einhvers konar netlögreglu til að ritskoða og vakta efni á Internetinu með einhverju sem þeir kalla "síu á myndefni til að koma í veg fyrir dreifingu á myndum sem tengjast barnaklámi og öðru ofbeldi gegn börnum", sjá meðfylgjandi frétt sem núna er á ruv.is. 

 

Fólk verður að átta sig á að allar síur og blokkeringar og hleranir sem settar eru á ferðir okkar á Internetinu eru eins miklar hindranir eins og götutálmanir og hleranir á opinberum og lokuðum rýmum í daglega lífinu. Það kann að þjóna almannahagsmunum að hafa eftirlitsmyndavélar á stöðum þar sem fólk hefur orðið fyrir árásum t.d. á svæðum í miðbænum þar sem eru margir barir og mikið af ölvuðu og æstu fólki safnast saman. Það  kann að þjóna líka hagsmunum viðskiptavina banka að það séu eftirlitsmyndavélar við hraðbanka, það fælir hugsanlega frá árásarmenn og gerir auðveldara að upplýsa afbrot. En myndum við sætta okkur við að það væri settur upp hlerunarbúnaður til hlusta á allar samræður okkar á torgum og kaffihúsum og það væri skannað í gegnum allar bækur sem við keyptum til að tryggja að þar væru ekki ósæmilegar myndir og að allir jólapakkar sem sendir væru í pósti væru opnaðir og skoðaðir til að athuga hvort það væri eitthvað ósæmilegt myndefni.  Svona ritskoðun á myndefni er reyndar  praktíseruð víða, ekki síst í strangtrúarríkjum Múslíma og þar voru Talíbanar fremstir í flokki. Það er skemmtileg frásögn af því í bókinni Bóksalinn í Kabúl hvernig Talibanarnir sem voru flestir ólæsir og óskrifandi komu í bókabúðina til að leita að bókum með myndskreytingum til að brenna, þeir höfðu bannað allar myndskreytingar. Bóksalinn úrráðagóði og slægi sem hafði lifað margar ógnarstjórnir fann alveg ráð við Talíbönum, hann bara límdi bókstafi yfir myndirnar og bókin hefst einmitt á því þegar bóksalinn er að plokka límmiðana af myndunum því Talibanarnir hafa verið hraktir frá völdum. 

 

Alveg eins og bóksalinn í Kabúl fann alveg ráð til að dreifa bókum með myndefni þrátt fyrir bann og eftirlit Talibana þá munu þeir sem vilja dreifa myndefni á ólöglegan hátt finna leið til að fara framhjá tilvonandi myndefnasíu ríkislögreglustjóra. Þeir munu sennilega nota aðeins flóknari aðferðir en að líma stafi yfir myndirnar en í hinum stafræna heimi þá eru margar aðferðir til dulkóðunar og margar aðferðir til að brjóta upp stafræna höfundarréttarlása. 

 

Það er ekki af samúð með þeim sem dreifa ógeðslegu klámefni sem ég vara eindregið við svona myndbandasíu ríkislögreglustjóra. Ég hef sjálf í mörg ár barist fyrir vakningu á þessu sviði, vakningu á því að á Netinu var veröld botnlausrar kvenfyrirlitningar og virðingarleysis fyrir manneskjum, mannfyrirlitningu sem endurspeglaðist hvað best í daglegu safni ógeðslegra klámtengla hjá vinsælum íslenskum unglingavefsetrum eins og tilveran.is og batman.is (sem núna heitir b2.is) og 69.is (sem er rekið af sömu aðilum og reka vinsælan leikjavef fyrir krakka og vísa gjarnan vefsvæðin milli hvers annars). Ég hef einnig sjálf nokkrum sinnum sent ábendingu um meint barnaklám til barnaheilla, ef ég man rétt á var það í flestum tilvikum vegna myndfnis sem bent var á af b2.is og voru það myndir af íslenskum börnum. Þess má geta að vefurinn b2.is var á tímabili og er hugsanlega ennþá rekinn í tengslum og einhvers konar samkrulli við félag frjálshyggjumanna amk voru vefirnir skráðir af sama aðila og á sama stað, Friðbjörn Orri Ketilsson var skráður fyrir báðum lénum.  Það er sjálfsagt að beina spjótum að þeim aðilum sem senda út, benda á eða stuðla að dreifingu á ógeðslegu klámefni og það er sjálfsagt að banna og hafa einhvers konar eftirlit og siðareglur um að ekki megi vera með  slíkt efni t.d. í vefumhverfi skóla og fyrirtækja og stofnana og viðkomandi aðilar sjái um það eftirlit og ákveði viðurlög.

 

En það er stórhættulegt og liður í því að byggja hér upp lögregluríki og eyðileggja flæði þekkingar á Internetinu ef það verður háð einhverju sérstöku eftirliti allt efni sem flæðir hingað um Netið. Svona myndbandasíur og blokkeringar og tálmar undir merki baráttu gegn barnaklámi munu ekki gera annað en gera ferðir okkar sem notum Netið í þekkingarleit og þekkingarsköpun miklu, miklu erfiðari. 

 

Svo ég taki dæmi sem ég þekki vel þ.e. háskólaumhverfið.  Þar eru að sjálfsögðu strangar reglur um hvað má og hvað má ekki, sérstaklega eru þær reglur strangar til að tryggja að ekki berist tölvuvírusar um kerfið og að þar séu bara uppsett á vélum tölvuforrit sem leyfi er fyrir. Þess vegna geta notendur í tölvuverum  ekki hlaðið neinun hugbúnaði  niður og það er lokað fyrir flest sem ekki hefur verið opnað sérstaklega fyrir. Flestir háskólar eru með alls konar síur um hvað má og hvað má ekki á neti skólanna. Þetta er orðið svo óþægilegt og hamlandi í því netumhverfi sem við búum í og við sem vinnum í svona umhverfi (ég er ekki að tala um Ísland sérstaklega, þetta er sama sagan sem kollegar mínir segja hvar í heiminum sem þeir eru) grínumst stundum með það að versti staðurinn til að nota eitthvað nýjungar í netumhverfi (t.d. ýmis web 2.0 verkfæri) sé tölvuver skólanna. Sem er dáldið fyndið vegna þess að þau tölvuver voru beinlínis sett upp til að kenna nemendum á  og þjálfa nýja tækni.

 

Ég vara við því hve allar blokkeringar og hindranir á ferðum fólks í netheimum hafa hamlandi áhrif á flæði þekkingar, sama í hvað göfugum tilgangi þær eru gerðar. Tálmanir sem gerðar eru til að uppræta barnaklám geta haft stórkostlega hamlandi áhrif á netumferð annarra sem eru að nota netið til að skapa þekkingu og í ýmis konar stafrænni framleiðslu.

 

Það er furðulegt að það skuli vera svona mikill skilningur á því að það þurfi að tryggja frjálst flæði peninga í einhvers konar frjálshyggjuæði en menn skuli ekki átta sig á því að margar sömu röksemdir eru varðandi frjálst flæði stafrænnar þekkingar og ýmis konar stafrænna samskipta.

 

Það eru margar til að ráðast á og minnka umfang óæskilegs og siðspillandi efnis á Internetinu en myndefnasía á vegum ríkislögreglustjóra er ein af alverstu leiðum sem ég sé til þess.

 

Fyrst birt: 29.11.2007 08:58

 

Síðast uppfært: 29.11.2007 09:02

Vilja koma upp myndefnasíu á netinu

Embætti ríkislögreglustjóra vinnur að því, í samvinnu við aðra, að koma upp síu á myndefni sem dreift er á netinu til að koma í veg fyrir dreifingu á myndum sem tengjast barnaklámi og öðru ofbeldi gegn börnum.

Þetta kom fram í máli Björns Bjarnasonar dómsmálaráðherra á Alþingi í gær. Steingrímur J Sigfússon, formaður vinstri grænna, spurði Björn hvort til greina kæmi að beita forvirkum aðferðum gegn barnaníðingum og öðrum sem nota netið í glæpsamlegum tilgangi. Björn sagði að tryggja þyrfti örugg samskipti á þessu sviði sem öðrum.

 

Ríkislögreglustjóri mun jafnframt næsta haust taka við rekstri ábendingalínu sem Barnaheill komu á fót. Þar er hægt að koma á framfæri upplýsingum um ólöglegt efni.

Loks er til skoðunar að koma upp eins konar rauðum hnappi sem nota má til að tilkynna lögreglu um óeðlileg samskipti á netinu.

Tæknin gerir hleranir erfiðari

Athugasemdir

[Alfreð Símonarson, 29.11.2007 kl. 12:41]

Já, allar þessar síur eru reykur og speiglar. Brotavilji barnaníðinganna er fljótur að finna aðrar leiðir en að hafa myndir, og myndefni ódulkóðað osfv..  Síðan þegar svona síur eru teknar til notkunnar er ekkert í fyrirstöðu fyrir því að sía út efni sem kanski er á skjön við pólutískar skoðanir stjórnvalda, allaveganna er ekkert opinbert eftirlit eftir svoleiðis spillingu.

Flott grein og Kær kveðja Alli. 

[DoctorE (IP-tala skráð) 29.11.2007 kl. 13:16]

Þetta mun bara bitna á saklausu fólki... Dear Leader taktík BB er skerðing á frelsi okkar allra og í mínum huga er ísland orðið Norður Kórea

[Tóti (IP-tala skráð) 29.11.2007 kl. 14:14]

Þetta þarf ekki endilega að vera slæmt mál.

Samkvæmt upplýsingum frá einum af gaurunum í tölvudeild löggunnar er meirihluti þeirra barnaklámmynda sem í umferð eru sömu myndirnar aftur og aftur og aftur (eiginlega sem betur fer, þegar maður veltir því aðeins fyrir sér).

Þá er hægt að greina þær auðveldlega í nettraffík, þar sem þær eru auðaðgreinanlegar og þar með hægt að a) stoppa þær eða b) senda löggumann heim til þess sem var að hlaða henni niður.

Þetta hefði engin áhrif á annað efni eða aðra nettraffík þar sem eingöngu væri verið að sigta út þekktar barnaklámmyndir. Miðað við tölurnar sem viðkomandi nefndi á fundi félags tölvunarfræðinga þá væri með þessu móti hægt að taka úr umferð 60-70% þess barnaklámefnis sem menn eru að skiptast á á einu bretti - og síðan sífellt meir og meir.

Þannig að það má frekar líkja þessu við vírusavörn en spamsíu á ruslpóst.

Varðandi komment um að við séum orðin eins og Norður-Kórea, þá má benda á frétt frá því gær þar sem þeir skutu einhvern verksmiðjustjóra fyrir að hringja til útlanda. Við getum t.d. hætt að kjósa BB ef okkur líkar ekki við stefnuna. Jafnvel hringt til útlanda án þess að eiga á hættu að vera skotin, bara rukkuð fullt. 

[Sveinn hinn Ungi (IP-tala skráð) 29.11.2007 kl. 15:17]

Ég sé ekki betur en það sé sjálfsagt mál að setja síur á þetta hroðalega efni. Þannig yrði bætt úr því sem hefur verið helsti galli netsins. Einnig má segja að þetta sé fyrirbyggjandi aðgerð þannig fólk fái ekki svona efni inn í tölvurnar í ógáti.

[Alexander Kristófer Gústafsson, 29.11.2007 kl. 16:38]

Google sían er gott dæmi, sirka 15% af alvöru póstunum mínum endar sem spam en sirka 35% af spamminu kemst í gegn :/

[Alexander Kristófer Gústafsson, 29.11.2007 kl. 16:42]

Þá er hægt að greina þær auðveldlega í nettraffík, þar sem þær eru auðaðgreinanlegar og þar með hægt að a) stoppa þær eða b) senda löggumann heim til þess sem var að hlaða henni niður.

A) Nei það er ekki hægt, þú hefur augljóslega ekki mikla tölvukunnátu ef þú heldur að það sé hægt.  Talaðu við einhvern sem er lærður um þetta og hann mun segja það sama. Það er hægt að sjá hvaða ip tölur(notendur) hafa verið á, það er ekki hægt að sjá hvort Kalli út í bæ sendi Lalla í hafnarfirði barnaklám gegnum lokaðan ftp server

B) Ef það er hægt að rekja ip-töluna já, þeir sem eru í þessu hafa oftar en ekki mikla tölvukunnátu og nota brögð sem koma í veg fyrir að það sé hægt. 

[Alexander Kristófer Gústafsson, 29.11.2007 kl. 16:43]

60-70% eru draumórar, ég mundi segja 3-5% væru tæknilega mögulegt og varla meira en það

[Þórbergur Torfason, 29.11.2007 kl. 18:13]

Salvör. Það hlýtur að vera okkur foreldrum, mikið kappsmál að við getum leyft börnum okkar að þvælast um netið án þess að eiga á hættu að lenda í klóm aðila sem freista þeirra með allskyns gylliboðum um hitt og þetta. Ýmislegt finnst á netinu sem hvorki er hollt börnum né fullorðnum og að sjálfsögðu er það kappsmál allra sem vilja þó hafa netið, að ekki sé hætta á að barn eða unglingur sem er að fikta sig áfram, detti niður á miður heilbrigða síðu sem leiðir áfram inn á ógeð sem hugsanlega er frekar auðvelt að sía út og uppræta.

Netið er að mörgu leyti gott þótt það sé mikill tímaþjófur. Þess vegna hlýtur það að vera lykiatriði að viðhalda siðlegu heilbrigði þar inni.

Ég styð og hef alltaf stutt strangt eftirlit með því hvað sett er inn og vistað á netinu.

[Þórbergur Torfason, 29.11.2007 kl. 18:17]

Hvað er það annars sem þú flettir upp á netinu sem ekki má koma fyrir almennings augu?

Ég skil engan veginn þennan hræðsluáróður gegn svona sjálfsögðu eftirliti.

[Soffía Sigurðardóttir, 29.11.2007 kl. 18:33]

Bönnum hætturnar!

Þar er svo skelfilega pínlegt að þurfa að ræða við börnin sín um rétt og rangt, siðferði, réttlæti, sjálfsvirðingu, kynlíf og ofbeldi. Börn spyrja líka svo hreinskilinna spurninga að maður þarf þá að setja sig inn í svona snúin mál og getur fengið af því bæði hausverk og svefntruflanir.

Nei, gerum lífið auðveldara og látum lögguna banna það sem ekki má! 

[Alexander Kristófer Gústafsson, 29.11.2007 kl. 19:43]

Ég styð og hef alltaf stutt strangt eftirlit með því hvað sett er inn og vistað á netinu.

 Jeminn eini þú hljómar eins og Kínverska ríkistjórnin 

[Tóti (IP-tala skráð) 29.11.2007 kl. 19:58]

Alexander, ég hef reyndar þokkalega tölvukunnáttu. Það er hægt - hjá ISPanum - að trakka nánast hvaða nettraffík sem er og skoða hvað er í henni. FTP líka.

Nema hún sé dulkóðuð náttúrulega.

En ISParnir geta t.d. vitað nákvæmlega hvaða Torrenta þú ert að sækja, hvort þú hafir sent einhverja mp3 skrá eitthvað osfrv. Það eru meira að segja til kerfi sem reikna út STEFgjöld eftir því hvaða tónlist fólk er að flytja á milli sín.

ISParnir vita líka hver var á bak við hvaða IPtölu og hvaða session hverju sinni. Utanfrá er náttúrulega ekki hægt að trakka þetta að einhverju ráði, en innan frá, blessaður vertu, ekki mikið mál.

Og já, 'sumir' þessara perra eru ferlega klárir og kunna að hylja slóð sína. En margir eru bara venjulegir netnotendur og eru að senda þetta á milli óhulið, óbrenglað og ógeðslegt. Það er massanotkunin, það er hún sem er hægt að stoppa / upplýsa.

En ég er sammála þér með frelsið, það er gott svo framarlega sem það er haft virkt eftirlit með því :) 

[Alexander Kristófer Gústafsson, 29.11.2007 kl. 21:26]

Ég mundi telja að það væri mjög lítið um barnaklám á torrentum vegna þess hversu opið það er.

Svo hvað? Fara manually yfir alla traffík? :D  

[Alexander Kristófer Gústafsson, 29.11.2007 kl. 21:31]

Auðvitað er lítið mál að tracka torrenta enda er það svo opið.

Ég tel besta ráðið gegn barnaklámi eru svokallaðir honey pots, hefur verið gert í Bna þar sem eru settar upp plat-barnaklám síður í sem leiða beint á heimasíðu fbi og að ip talan hafi verið logguð og hefur leidd til einhverja handtaka ef ég man rétt. 

[Baldur Fjölnisson, 29.11.2007 kl. 23:01]

Salvör er alveg módel kennari. Nú þarf maður alltaf að passa sig þegar fólki er hrósað vegna þess að það getur auðveldlega snúist í andhverfu sína en þetta er virkilega manneskja sem við þurfum að virkja enn betur. Helst vildi ég gera hana strax að menntamálaráðherra, eins og ég hef áður nefnt.

[Þórbergur Torfason, 29.11.2007 kl. 23:56]

Sveinn er með þetta. Nákvæmlega það sem málið snýst um. Við eigum að geta leyft börnunum okkar að vafra um á netinu, æfa sig á tölvur sem er framtíðin án þess að vera með lífið í lúkunum um að upp dúkki einhver óhroði sem einhver andskotans perri hefur troðið sem viðhengi inn á einherja sakleysislega leikjasíðu.

Ég spyr aftur, hvað er fólk að sýsla með á netinu sem þolir ekki dagsins ljós. Hvern andskotann er fólk að fjargviðrist þó netsíður séu skoðaðar af eftirlitsaðilum. Hörmungar netkláms, ekki bara barnakláms eru þekktar. Leyfum netinu að njóta sín án perrahátts. Hættið að vera með einhver myrkraverk á netinu. Fagnið opnum netheimum sem þola dagsbirtu, skoðun almenns eftirlits.

[Alexander Kristófer Gústafsson, 30.11.2007 kl. 00:32]

Það er einfalta að segja þetta Þórbergur en að gera þetta er tæknilega ómögulegt.

Nei ég fagna ekki kínversku interneti  

[Sveinn Valdimar Ólafsson, 30.11.2007 kl. 00:40]

Sammála aðvörunarorðum Salvarar

Það er nú einföld staðreynd að svokallað "barnaklám" = kynferðislegt ofbeldi gagnvart börnum er best að taka á með því að finna það á netinu. Síur er rugl og þvælast fyrir, það er miklu betra að finna sökudólgana beint með vöktun almennings. 

Hvað varðar eitthvað annað á netinu þá tel ég alfærasælast að yfirvöld taki ekki að sér að skilgreina svonefndan "perraskap" þegar fullorðið fólk á í hlut.  Kynlíf eins er finns öðrum stundum vera ógeð. Við veljum hvað okkur finnst gott eða ógeðslegt.  Kynlíf samkynhneigðra finnst einum spennadi en öðrum beinlínis ógeðslegt.  Mér finnst hákarl ógeðslegur og skata verri og þeir sem borða þetta eru hálfgerðir "perrar" í mínum huga. Og hvað með það?

Verndum samt alltaf börnin en leyfum fullorðunm að vera fullorðnum. Kona með karl, karl með karl, kona með konu eða eitthvað ennþá flóknar munstur. Ég fíla regnboga en ekki svarthvít sjónarmið.

kær kveðja

Sveinn

[Alexander Kristófer Gústafsson, 30.11.2007 kl. 19:59]

Björn Bjarni er eflaust hættulegasti maður lýðræðinu á Íslandi í augnabliki,maðurinn virðist taka USSR sem fyrirmynd